Jesaja 2 - Biblían (2007)

Ævarandi friður

1Þetta er það sem Jesaja Amotssyni vitraðist um Júda og Jerúsalem.

Friður

2Það skal verða á komandi dögum

að fjallið, sem hús Drottins stendur á, bifast ekki,

það ber yfir hæstu fjallstinda og gnæfir yfir allar hæðir.

Þangað munu allar þjóðir streyma

3og margir lýðir koma og segja:

„Komið, göngum upp á fjall Drottins,

til húss Jakobs Guðs

svo að hann vísi oss vegu sína

og vér getum gengið brautir hans.“

Því að fyrirmæli koma frá Síon,

orð Drottins frá Jerúsalem.

4Og hann mun dæma meðal lýðanna

og skera úr málum margra þjóða.

Og þær munu smíða plógjárn úr sverðum sínum

og sniðla úr spjótum sínum.

Engin þjóð skal sverð reiða að annarri þjóð

og ekki skulu þær temja sér hernað framar.

5Ættmenn Jakobs, komið,

göngum í ljósi Drottins.

Dagur Drottins

6Þú hefur hafnað ætt Jakobs, lýð þínum,

því að hún er uppfull af austrænni hjátrú

og spásögnum eins og Filistear iðka

og handsalar samning við útlendinga.

7Land þeirra er fullt af silfri og gulli

og fjársjóðir þeirra eru óþrjótandi.

Land þeirra er fullt af hestum

og hervagnar þeirra óteljandi.

8Land þeirra er fullt af skurðgoðum,

menn falla fram fyrir eigin handaverkum,

fyrir því sem fingur þeirra hafa gert.

9Þá var maðurinn beygður

og mannkindin auðmýkt.

Fyrirgef þeim eigi.

10Gakk inn í bergið,

fel þig í jörðu

fyrir ógn Drottins

og ljóma hátignar hans.

11Hrokafull augu manna munu auðmýkt

og dramb þeirra lægt.

Drottinn einn mun upphafinn

á þeim degi.

12Dagur Drottins herskaranna kemur

yfir allt dramblátt og hrokafullt,

yfir allt sem gnæfir hátt,

13yfir öll sedrustré á Líbanon,

há og gnæfandi,

og allar Basanseikur,

14yfir öll gnæfandi fjöll

og yfir allar háar hæðir,

15yfir alla háreista turna,

yfir alla ókleifa borgarmúra,

16yfir öll Tarsisskip,

yfir öll skip hlaðin glysi.

17Þá verður hroki mannanna beygður

og dramb þeirra lægt.

Drottinn einn mun upphafinn á þeim degi.

18Skurðgoðin munu hverfa með öllu.

19Flýið í klettahella

og í gjótur í jörðinni

fyrir ógn Drottins

og ljóma hátignar hans

þegar hann rís upp og skelfir jörðina.

20Á þeim degi varpa menn fyrir moldvörpur og leðurblökur

silfurgoðum sínum og gullgoðum

sem þeir gerðu sér til að tilbiðja.

21Þeir munu leita inn í klettaskúta og hamraskorur

undan ógn Drottins

og ljóma hátignar hans

þegar hann rís upp og skelfir jörðina.

22Hættið að treysta mönnum,

hverfulan lífsanda hafa þeir í nösum,

hvers virði er hann?