Sálmarnir 67 - Biblían (2007)

1Til söngstjórans. Með strengjaleik. Sálmur. Ljóð.

2Guð sé oss náðugur og blessi oss,

hann láti ásjónu sína lýsa meðal vor (Sela)

3svo að þekkja megi veg þinn á jörðinni

og hjálpræði þitt meðal allra þjóða.

4Lýðir skulu lofa þig, Guð,

þig skulu allar þjóðir lofa.

5Lýðir skulu gleðjast og fagna

því að þú dæmir þjóðirnar réttvíslega

og leiðir lýði á jörðinni. (Sela)

6Lýðir skulu lofa þig, Guð,

þig skulu allar þjóðir lofa.

7Jörðin hefur gefið ávöxt sinn,

Guð, vor Guð, blessi oss,

Guð blessi oss

svo að öll endimörk jarðar megi óttast hann.