Jobsbók 42 - Biblían (2007)

Lokasvar Jobs

1Job svaraði Drottni og sagði:

2Nú skil ég að þú getur allt,

ekkert, sem þú vilt, er þér um megn.

3Hver myrkvar ráðsályktunina án þekkingar?

Ég hef talað af skilningsleysi

um undursamleg kraftaverk.

4Hlustaðu, nú ætla ég að tala,

ég ætla að spyrja, þú skalt svara.

5Ég þekkti þig af afspurn

en nú hefur auga mitt litið þig.

6Þess vegna tek ég orð mín aftur

og iðrast í dufti og ösku.

Eftirmáli

7Þegar Drottinn hafði mælt þessum orðum til Jobs sagði hann við Elífas frá Teman: „Reiði mín logar gegn þér og báðum vinum þínum því að þér hafið ekki sagt satt um mig eins og Job, þjónn minn.

8Takið nú sjö naut og sjö geithafra, farið til Jobs, þjóns míns, og færið brennifórn fyrir yður. Job, þjónn minn, mun biðja fyrir yður. Hans vegna mun ég hlífa yður við smán því að þér sögðuð ekki satt um mig eins og Job, þjónn minn.“

9Þá fóru Elífas frá Teman, Bildad frá Súa og Sófar frá Naama og gerðu það sem Drottinn hafði boðið og Drottinn bænheyrði Job.

10Drottinn sneri við högum Jobs því að hann hafði beðið fyrir vinum sínum, og Drottinn gaf Job tvöfalt það sem hann hafði áður átt.

11Síðan komu allir bræður Jobs og systur og allir kunningjar hans frá fyrri tíð og snæddu með honum í húsi hans, sýndu honum samúð vegna alls þess böls sem Drottinn hafði látið koma yfir hann. Þau hugguðu hann og sérhvert þeirra gaf honum einn kesíta og nefhring úr gulli.

12Drottinn blessaði síðari æviár Jobs meira en hin fyrri. Hann eignaðist fjórtán þúsund fjár, sex þúsund úlfalda, þúsund sameyki nauta og þúsund ösnur.

13Hann eignaðist einnig sjö syni og þrjár dætur.

14Hann gaf þeirri fyrstu nafnið Jemíma, annarri Kesía og þeirri þriðju Keren Happúk.

15Fegurri konur en dætur Jobs fundust hvergi í öllu landinu og faðir þeirra fékk þeim erfðahlut með bræðrum þeirra.

16Eftir þetta lifði Job í hundrað og fjörutíu ár og sá börn sín og barnabörn í fjóra ættliði.

17Og Job dó gamall og saddur lífdaga.