Sálmarnir 11 - Biblían (2007)

1Til söngstjórans. Davíðssálmur.

Hjá Drottni leita ég hælis,

hvernig getið þér sagt við mig:

„Fljúgðu sem fugl til fjalla.“

2Sjá, hinir óguðlegu hafa spennt boga,

lagt örvar á streng til að hæfa hina hjartahreinu í skjóli myrkurs.

3Sé grunnurinn brostinn,

hvað megnar þá hinn réttláti?

4Drottinn er í sínu heilaga musteri,

hásæti Drottins er á himnum.

Augu hans sjá,

sjónir hans reyna mannanna börn.

5Drottinn reynir réttlátan og ranglátan,

hann hatar þann sem elskar ofríki.

6Yfir óguðlega lætur hann rigna glóandi kolum;

eldur, brennisteinn og glóðheitur vindur er hlutskipti þeirra

7því að Drottinn er réttlátur, hann elskar rétta breytni,

hinn ráðvandi fær að sjá auglit hans.