Prédikarinn 11 - Biblían (2007)

Starfa meðan dagur er

1Varpaðu brauði þínu út á vatnið.

Þegar margir dagar eru liðnir muntu finna það aftur.

2Skiptu hlutanum sundur meðal sjö eða jafnvel átta

því að þú veist ekki hvaða ógæfa bíður landsins.

3Þegar skýin eru orðin full af vatni

hvolfa þau regni yfir jörðina.

Þegar tré fellur til suðurs eða norðurs,

þá liggur það kyrrt á þeim stað.

4Sá sem sífellt gáir að vindinum sáir ekki

og sá sem sífellt horfir á skýin uppsker ekki.

5Þú veist ekki hvaða veg vindurinn fer

og hvernig beinin myndast í móðurlífi þungaðrar konu,

eins þekkir þú ekki heldur verk Guðs sem allt gerir.

6Sáðu sæði þínu að morgni

og láttu hendur þínar ekki hvílast að kvöldi

því að þú veist ekki hvort muni heppnast þetta eða hitt

eða hvort tveggja verði jafngott.

7Indælt er ljósið

og ljúft er augunum að horfa á sólina.

Æska og elli

8Lifi maðurinn mörg ár,

þá á hann að vera glaður öll þau ár

og minnast þess að dagar myrkursins verða margir.

Allt sem á eftir kemur er hégómi.

9Gleð þig, ungi maður, í æsku þinni

og láttu liggja vel á þér unglingsár þín

og breyttu eins og hjartað leiðir þig

og eins og augun girnast

en vita skaltu að fyrir allt þetta leiðir Guð þig fyrir dóm.

10Vísaðu gremju burt frá hjarta þínu

og láttu ekki böl koma nærri líkama þínum

því að æska og morgunroði lífsins eru hverful.