Fyrri konungabók 7 - Biblían (2007)

Höll Salómons

1Salómon var þrettán ár að fullgera höll sína.

2Hann byggði einnig Líbanonsskógarhúsið. Var það hundrað álna langt og fimmtíu álna breitt og þrjátíu álna hátt. Í því voru þrjár raðir af súlum úr sedrusviði og ofan á súlunum voru bjálkar úr sedrusviði.

3Þak úr sedrusviði var lagt ofan á bjálkana sem lágu á súlunum. Þær voru fjörutíu og fimm, fimmtán í hverri röð.

4Þrjár gluggaraðir voru á húsinu. Var þar gluggi gegnt glugga í þremur röðum.

5Allar dyr og gluggar höfðu ferhyrnda umgjörð og var gluggi gegnt glugga í þremur röðum.

6Hann byggði einnig súlnasal sem var fimmtíu álna langur og þrjátíu álna breiður. Framan við hann byggði hann forsal með súlum og skyggni þar fyrir framan.

7Hann byggði einnig hásætissal, dómsalinn, þar sem hann hélt dómþing. Var hann þiljaður með sedrusviði frá gólfi til lofts.

8Íbúðarhús hans sjálfs stóð í öðrum forgarði frá súlnasalnum og var reist með sama hætti. Salómon reisti einnig hús, sem líktist súlnasalnum, handa dóttur faraós sem hann hafði tekið sér fyrir konu.

9Öll þessi hús og útveggurinn að stóra forgarðinum voru úr völdum steini frá grunni og upp á veggbrúnir. Steinarnir voru höggnir til eftir viðurkenndu máli og sléttaðir innan og utan með steinsög.

10Undirstaðan var gerð úr völdum steinum, stórum steinum, sem voru tíu álnir og átta álnir.

11Ofan á þeim voru verðmætir steinar, höggnir eftir máli, og sedrusviður.

12Múrinn umhverfis stóra forgarðinn og innri forgarðinn umhverfis musteri Drottins og forsal hallarinnar var úr þremur lögum af höggnum steinum og einu lagi af sedrusbjálkum.

Áhöld musterisins

13Salómon konungur sendi eftir Híram frá Týrus.

14Hann var sonur ekkju af ættbálki Naftalí en faðir hans var frá Týrus og hafði verið eirsmiður. Híram var hagleiksmaður og gæddur skilningi og kunnáttu til þess að vinna að hvers konar eirsmíði. Hann kom til Salómons konungs og sá um alla smíðavinnuna fyrir hann.

15Hann mótaði báðar eirsúlurnar. Hvor þeirra var átján álnir á hæð en tólf álna langan þráð þurfti til að ná utan um þær.

16Hann gerði einnig tvö súluhöfuð til þess að setja ofan á þær. Þau voru steypt úr eir og var hvort þeirra fimm álnir á hæð.

17Á hvoru súluhöfði voru sjö fléttur og net úr festum.

18Hann gerði einnig granatepli sem voru í tveimur röðum umhverfis netið svo að þau þöktu höfuðið ofan á súlunni.

19Höfuðin, sem voru ofan á súlunum í forsalnum, voru mótuð eins og lótusblóm. Voru þau fjórar álnir.

20Höfuð voru á báðum súlunum ofan við bunguna hjá netinu og tvö hundruð granatepli í röðum umhverfis höfuð annarrar súlunnar.

21Hann reisti súlurnar við forsal musterisins. Aðra súluna reisti hann hægra megin og nefndi hana Jakin og hina reisti hann vinstra megin og nefndi hana Bóas.

22Efst voru súlurnar í laginu eins og lótusblóm. Þannig lauk smíði súlnanna.

23Hann steypti einnig hafið. Tíu álnir voru milli barma. Það var hringlaga og fimm álnir á dýpt. Þrjátíu álna langa snúru þurfti til að ná umhverfis það.

24Neðan við barm þess voru blómhnappar allan hringinn, tíu á hverri alin. Blómhnapparnir voru í tveimur röðum og voru þeir steyptir í sama móti og hafið.

25Hafið stóð á tólf nautum. Sneru þrjú í norður, þrjú í vestur, þrjú í suður og þrjú í austur. Hafið hvíldi á þeim og sneru bakhlutar þeirra inn.

26Það var þverhandarþykkt og barmur þess mótaður eins og barmur bikars, eins og útsprungið lótusblóm, og tók tvö þúsund böt.

27Híram gerði einnig tíu grindarvagna úr eir. Hver grind var fjórar álnir á lengd, fjórar álnir á breidd og þrjár álnir á hæð.

28Grindurnar voru gerðar úr slám og rimlum milli hornstólpanna.

29Á rimlunum voru myndir af ljónum, nautum og kerúbum og einnig á hornstólpunum. Ofan og neðan við ljónin og nautin voru hamraðir blómsveigar.

30Á hverri grind voru fjögur eirhjól og öxlar úr eir. Á fjórum fótum þeirra voru stoðir neðan við kerið og var hver þeirra skreytt blómsveig.

31Barmar kersins voru mótaðir eins og blómsveigur og voru ein alin á hæð. Opið var hringlaga, ein og hálf alin, og við opið var einnig grafið skraut. Slárnar voru ferstrendar, ekki sívalar.

32Undir slánum voru fjögur hjól og sat festing hjólanna á grindinni. Hvert hjól var ein og hálf alin á hæð.

33Hjólin voru gerð eins og vagnhjól. Festingar, gjarðir, rimlar og nafir var allt steypt.

34Fjórar stoðir voru tengdar við fjóra hornstólpa hverrar vagngrindar og mynduðu stoðirnar og vagngrindin eina heild.

35Ofan á hverri vagngrind var pallur, hálf alin á hæð, og var hann hringlaga. Á palli grindarinnar voru festingar hennar og slár.

36Hann gróf myndir af kerúbum, ljónum, pálmum og blómsveigum á hliðarfestingar pallsins, hvar sem eyða var.

37Þannig gerði hann vagngrindurnar tíu. Þær voru allar steyptar á sama hátt, jafnstórar og eins í útliti.

38Híram steypti einnig tíu ker úr eir, eitt fyrir hverja hinna tíu vagngrinda. Hvert ker tók fjörutíu böt og var fjórar álnir í þvermál.

39Fimm vagngrindum kom hann fyrir við suðurvegg hússins og fimm við norðurvegg. Hafið setti hann við suðurvegginn, suðaustan megin.

40Híram gerði einnig kerin, skóflurnar og skálarnar. Að lokum smíðaði hann fyrir Salómon konung í musteri Drottins:

41tvær súlur, tvö hvelfd höfuð ofan á súlunum, bæði netin til að hylja hvelfdu súlnahöfuðin,

42fjögur hundruð granatepli á báðum netunum í tveimur röðum á hvoru neti sem huldu bæði hvelfdu súlnahöfuðin,

43vagngrindurnar tíu og kerin tíu sem voru á vagngrindunum,

44hafið og nautin tólf undir hafinu,

45kerin, skóflurnar og skálarnar. Öll áhöldin, sem Híram smíðaði í musteri Drottins fyrir Salómon konung, voru úr fægðum eir.

46Konungur lét steypa þau í leirmótum í Jórdanardalnum, milli Súkkót og Saretan.

47Salómon kom öllum áhöldunum fyrir en vegna hins gífurlega fjölda þeirra var ekki hægt að giska á þyngd eirsins.

48Salómon lét smíða allan búnað í musteri Drottins: gullaltarið og gullborðið sem skoðunarbrauðin lágu á,

49fimm ljósastikur úr skíragulli sunnan megin og fimm ljósastikur norðan megin framan við innsta herbergið og auk þess blómin, lampana og skarbítana úr gulli,

50enn fremur kerin, hnífana, skálarnar, bollana og eldfötin, allt úr skíru gulli. Hjarirnar á hurðunum fyrir innsta hluta hússins, hinu allra helgasta, og á báðum hurðarvængjunum fyrir musterissalnum voru úr gulli.

51Þegar öllu því verki, sem Salómon konungur lét vinna við musteri Drottins, var lokið flutti Salómon þangað helgigjafir Davíðs, föður síns. Silfrinu, gullinu og kerunum kom hann fyrir í fjárhirslum húss Drottins.