Sálmarnir 27 - Biblían (2007)

1Davíðssálmur.

Drottinn er ljós mitt og fulltingi,

hvern ætti ég að óttast?

Drottinn er vígi lífs míns,

hvern ætti ég að hræðast?

2Þegar illvirkjar þrengja að mér

til þess að gleypa mig

verða það andstæðingar mínir og óvinir

sem hrasa og falla.

3Þó að her setjist um mig

óttast hjarta mitt ekki,

þó að stríð brjótist út gegn mér

er ég samt öruggur.

4Eins hef ég beðið Drottin,

það eitt þrái ég,

að ég fái að dveljast í húsi Drottins

alla ævidaga mína

til þess að horfa á yndisleik Drottins

og leita svara í musteri hans.

5Því að hann geymir mig í skjóli sínu

á óheilladeginum,

hylur mig í fylgsnum tjalds síns

og lyftir mér upp á klett.

6Nú ber ég höfuðið hátt

gagnvart óvinum mínum umhverfis mig,

með fögnuði færi ég fórnir í tjaldi hans,

syng og leik Drottni.

7Heyr, Drottinn, ég hrópa hátt,

ver mér náðugur og bænheyr mig.

8Ég minnist þess að þú sagðir:

„Leitið auglitis míns.“

Ég vil leita auglitis þíns, Drottinn.

9Hyl eigi auglit þitt fyrir mér,

vísa þjóni þínum ekki frá þér í reiði,

þú, sem hefur hjálpað mér.

Hrind mér eigi burt

og yfirgef mig eigi,

þú Guð hjálpræðis míns.

10Þótt faðir minn og móðir yfirgefi mig

tekur Drottinn mig að sér.

11Vísa mér veg þinn, Drottinn,

leiddu mig á beina braut

vegna óvina minna.

12Ofursel mig ekki græðgi hatursmanna minna,

falsvitni rísa gegn mér

og blása af heift.

13En ég treysti því að fá að sjá gæsku Drottins

á landi lifenda.

14Já, vona á Drottin,

ver öruggur og hugrakkur,

vona á Drottin.