Önnur Mósebók 27 - Biblían (2007)

Altarið

1Þú skalt gera altari úr akasíuviði, fimm álnir á lengd og fimm álnir á breidd. Altarið á að vera ferhyrnt. Hæð þess skal vera þrjár álnir.

2Þú skalt gera horn á það upp af á fjórum hornum þess. Hornin skulu vera föst við það. Þú skalt leggja altarið eir.

3Þú skalt gera ker undir fórnaröskuna, skóflur, skálar fyrir dreypifórnir, gaffla og eldpönnur. Öll áhöld altarisins skaltu gera úr eir.

4Þú skalt gera grind úr eir um altarið eins og riðið net, setja fjóra hringi úr eir á netið, á fjögur horn altarisins. Grindina skaltu festa

5og koma fyrir neðan við umgjörð altarisins þannig að netið nái upp á mitt altarið.

6Þú skalt einnig gera stengur fyrir altarið, stengur úr akasíuviði og þú skalt leggja þær eir.

7Stöngum altarisins skal smeygt í hringina þannig að þær séu á báðum hliðum altarisins þegar það er borið.

8Þú skalt gera altarið úr borðum, holt að innan. Þeir skulu gera það eins og þér var sýnt á fjallinu.

Forgarðurinn

9Því næst skaltu gera forgarð tjaldbúðarinnar. Á suðurhliðinni skal forgarðurinn búinn veggtjöldum úr tvinnuðu, fínu líni, hundrað álnir á lengd á þá hliðina.

10Þar eiga að vera tuttugu súlur ásamt tuttugu sökklum úr eir en naglarnir í súlunum og þverslárnar skulu vera úr silfri.

11Að norðanverðu eiga einnig að vera veggtjöld eftir endilangri hliðinni, hundrað álnir á lengd, einnig tuttugu súlur ásamt tuttugu sökklum úr eir, en naglarnir í súlunum og þverslárnar skulu vera úr silfri.

12Á þverhlið forgarðsins að vestanverðu skulu vera fimmtán álna löng tjöld og tíu súlur ásamt sökklum.

13Þverhlið forgarðsins að austanverðu á að vera fimmtíu álnir

14og öðrum megin skulu vera fimmtán álna löng tjöld og þrjár súlur ásamt þremur sökklum

15og hinum megin einnig fimmtán álna löng tjöld og þrjár súlur ásamt þremur sökklum.

16Fyrir hliði forgarðsins skal vera tuttugu álna forhengi úr bláum purpura, rauðum purpura og skarlati, ásamt tvinnuðu, fínu líni myndofnu, og fjórar súlur ásamt fjórum sökklum.

17Allar súlur umhverfis forgarðinn skulu tengdar með þverslám úr silfri og naglarnir í þeim skulu vera úr silfri en sökklar þeirra skulu vera úr eir.

18Forgarðurinn skal vera hundrað álnir á lengd, fimmtíu álnir á breidd og fimm álnir á hæð. Tjöldin skulu vera úr tvinnuðu, fínu líni og sökklarnir úr eir.

19Öll áhöld í bústaðnum, sem ætluð eru til allrar guðsþjónustu, og allir tjaldhælar hans og allir tjaldhælar forgarðsins eiga að vera úr eir.

Olían

20Þú skalt gefa Ísraelsmönnum fyrirmæli um að þeir færi þér tæra olíu úr steyttum ólífum fyrir ljósastikuna svo að setja megi upp lampa sem brenni sífellt.

21Í samfundatjaldinu framan við fortjaldið, sem er fyrir framan sáttmálstáknið, eiga Aron og synir hans að sjá um að lamparnir logi frá kvöldi til morguns frammi fyrir augliti Drottins. Þetta er ævarandi skuldbinding fyrir Ísraelsmenn frá kyni til kyns.