Salamo 145 - Malagasy Catholic Bible

SALAMO 145 (Volgata 144)Fiderana an’i Iaveh Mpanjaka Hira fiderana. Nataon’i Davida.

Alef

1Sitrako ny mankalaza Anao, ry Andriamanitro Mpanjaka ô,

sy ny misaotra ny Anaranao mandrakizay doria.

Bet

2Sitrako ny misaotra Anao isan’andro,

sy ny mankalaza ny Anaranao mandrakizay doria!

Gimel

3Lehibe i Iaveh ka mendrika ny fiderana rehetra,

ary tsy takatry ny saina ny fahalehibeazany!

Dalet

4Ny taona rehetra samy hilaza amin’izay mandimby azy

ny fiderana ny asanao;

hitory ny fahagagana nataonao ny olona.

He

5Hihira ny famirapiratan’ny fiandriananao be voninahitra aho,

sy ny asanao mahagaga.

Vao

6Horesahin’ny olona ny herinao mahatahotra;

ary hotantaraiko ny fahalehibeazanao.

Jain

7Hambaran’ny olona ny fahatsiarovana ny hatsaram-ponao lehibe indrindra,

ary hankalazainy ny fahamarinanao.

Het

8Mamindra fo sy miantra i Iaveh,

ary mahari-po sy feno hatsaram-po.

Tet

9Tsara fo amin’ny olona rehetra i Iaveh,

ary mihatra amin’ny zava-boaariny rehetra ny famindram-pony.

Iôd

10Midera Anao avokoa ny asanao rehetra, ry Iaveh,

ary misaotra Anao ny mpino Anao.

Kaf

11Milaza ny voninahitry ny fanjakanao izy,

ary mitory ny fahefanao;

Lamed

12mba hampahalalàny ny zanaky ny olona ny asany mahagaga,

sy ny famirapiratry ny fanjakany be voninahitra.

Mem

13Fanjakana mandrakizay ny fanjakanao,

ary maharitra amin’ny taona rehetra ny fanapahanao.

Samek

14Manohana an’izay rehetra lavo i Iaveh,

ary mampitraka an’izay rehetra mitanondrika.

Ain

15Mitodika miandry Anao ny mason’ny zavatra rehetra,

ary omenao izay haniny amin’ny fotoany izy.

Fe

16Sokafanao ny tananao,

dia vokisanao soa avy aminao ny miaina rehetra.

Tsade

17Marina amin’ny lalany rehetra i Iaveh,

ary mamindra fo amin’ny asany rehetra.

Kôf

18Eo akaikin’izay rehetra miantso Azy I Iaveh,

dia izay rehetra miantso Azy amin’ny fony tokoa.

Resh

19Manatanteraka ny fanirian’izay matahotra Azy Izy,

mihaino ny fitarainany sy mamonjy azy.

Shin

20Miambina izay rehetra tia Azy i Iaveh,

ary mandringana ny ratsy fanahy rehetra.

Tao

21Aoka ny vavako hitory fiderana an’i Iaveh,

ary ny nofo rehetra hisaotra ny Anarany masina

mandrakizay doria!