Salamo 34 - Malagasy Catholic Bible

SALAMO 34 (Volgata 33)Fiderana ny rariny ataon’Andriamanitra

1Nataon’i Davida, tamin’izy nody adala teo anatrehan’i Abimeleka, ka noroahiny izy, dia lasa.

Alef

2Te hisaotra an’i Iaveh mandrakariva aho;

ho eo am-bavako mandrakariva ny fiderana Azy.

Bet

3I Iaveh no ireharehan’ny fanahiko;

aoka handre sy hifaly ny manetry tena.

Gimel

4Miaraha amiko ianareo hankalaza an’i Iaveh:

aoka isika hiara-midera ny Anarany.

Dalet

5Nitady an’i Iaveh aho, dia nihaino ahy Izy,

ary nanafaka ahy tamin’ny tahotro rehetra.

He

6Raha mitodika azy ny olona dia miramiran’ny hafaliana,

Vao

ary tsy safo-kenatra ny tavany.

Jain

7Niantso ity olo-mahantra, dia nohenoin’i Iaveh,

sy novonjeny tamin’ny fahoriany rehetra.

Het

8Ny Anjelin’i Iaveh mitoby,

manodidina izay matahotra Azy, ka mamonjy azy.

Tet

9Andramo ka zahao ange izany hatsaran’i Iaveh.

Sambatra ny olona manao Azy ho fialofany.

Iôd

10Matahora an’i Iaveh ianareo olo-masiny,

fa tsy ho voan’ny fahantrana izay matahotra Azy.

Kaf

11Ny liona tanora mety noana aman-tsy ampy hanina ihany,

fa izay mitady an’i Iaveh tsy orin-java-tsoa akory.

Lamed

12Avia, anaka, mihainoa ahy,

hampianariko ny fahatahorana an’i Iaveh ianareo.

Mem

13Iza no olona mankamamy ny aina,

iza no maniry andro lava hanaranam-po amin’ny fahasambarana?

Non

14Arovy amin’ny ratsy ny lelanao,

ary amin’ny teny fitaka ny molotrao.

Samek

15Mandosira ny ratsy ary manaova ny tsara,

mitadiava fihavanana ary katsaho izany.

Ain

16Ny mason’i Iaveh mitsinjo ny marina

ary ny sofiny mihaino ny fitarainany.

Fe

17Ny Tavan’i Iaveh manandrina ny mpanao ratsy,

mba hamongorany ny fahatsiarovana azy eo amin’ny tany.

Tsade

18Fa mitaraina kosa ny marina, dia mihaino azy i Iaveh,

ka manafaka azy amin’ny fahoriany rehetra.

Kôf

19Eo akaikin’izay torotoro fo i Iaveh,

ary mamonjy izay rera-panahy Izy.

Resh

20Iharam-pahoriana matetika ny marina,

fa esorin’i Iaveh amin’izany rehetra izany kosa.

Shin

21Miaro ny taolany rehetra Izy,

tsy hisy ho tapaka ireny, na dia iray aza.

Tao

22Ny ratsy no mahafaty ny ratsy fanahy;

ary sazina ny mpankahala ny olo-marina.

23Fa avotan’i Iaveh kosa ny fanahin’ny mpanompony;

ary tsy misy faiziny izay rehetra mialoka aminy.