Salamo 25 - Malagasy Catholic Bible

SALAMO 25 (Volgata 24)

1Salamon’i Davida.

Alef

Ianao, ry Iaveh, no anandratako ny fanahiko,

ry Andriamanitra ô!

Bet

2Ianao no itokiako, aoka tsy ho menatra aho,

aoka tsy hifalian’ny fahavaloko aho!

Gimel

3Tokoa fa tsy hisy ho menatra izay rehetra manantena Anao;

izay mivadika foana dia ireo no ho menatra.

Dalet

4Iaveh ô, ampahafantaro ny lalanao aho;

ampianaro ny sakeli-dalanao aho.

He

5Tariho amin’ny fahamarinanao aho,

Vao

ary ampianaro, fa Andriamanitry ny famonjeko Ianao;

Ianao no antenaiko mandritra ny andro.

Jain

6Tsarovy ny famindram-ponao, ry Iaveh,

sy ny hatsaram-ponao, fa mandrakizay ireny.

Het

7Aza tsarovanao ny fahotan’ny fahatanorako, na ny hadisoako,

fa tsarovy araka ny famindram-ponao aho,

noho ny hatsaram-ponao, ry Iaveh.

Tet

8Tsara sy mahitsy fo i Iaveh;

izany no anoroany lalana ny mpanota.

Iôd

9Mampizotra ny manetry tena amin’ny fahamarinana Izy,

mampianatra ny manetry tena ny lalany Izy.

Kaf

10Famindram-po amam-pahamarinana avokoa ny lalan’i Iaveh

amin’izay mitandrina ny fanekeny sy ny didiny.

Lamed

11Noho ny Anaranao, ry Iaveh,

dia hamela ny heloko Ianao fa lehibe izy.

Mem

12Iza no olona matahotra an’i Iaveh?

Hampianarin’i Iaveh azy ny lalana tokony hofidiny.

Non

13Mandry amim-piadanana ny fanahiny,

ary hanana ny taniny ny taranany.

Samek

14Ny fifankazarana amin’i Iaveh dia anjaran’ny matahotra Azy.

Hampahafantariny azy ny fanambinana avy amin’ny fanekem-pihavanany.

Ain

15Mitodika any amin’i Iaveh mandrakariva ny masoko,

fa Izy no hanafaka ny tongotro amin’ny fandrika harato.

Fe

16Jereo aho, ka amindrao fo,

fa manirery aho, ka mahantra.

Tsade

17Mihalehibe ny fahorian’ny foko,

afaho amin’ny fahaporetako aho!

18Jereo ny fahoriana amam-pijaliako;

ary avelao ny fahotako rehetra.

Resh

19Jereo ity hamaroan’ny fahavaloko,

sy izato halozan’ny fankahalany ahy.

Shin

20Arovy ny fanahiko, ary vonjeo aho;

aoka tsy ho menatra aho, fa Ianao no nametrahako ny fitokiako.

Tao

21Haharo ahy anie tsy fananan-tsiny amam-pahitsiana,

fa Ianao no antenaiko.

22Ry Andriamanitra ô, afaho i Israely

amin’ny fahoriany rehetra.