3 Ioane 1 - Revised Samoan Catholic Bible

O le Tusi ‘iā Kaio

1O a‘u le toeaina:

O la‘u tusi lenei ‘iā Kaio, o le pele, o lē ‘ou te alofa fa‘amaoni i ai.

2Le pele e, ‘ia e manuia i mea uma, ma ‘ia e mālōlō, fa‘apei ‘ona manuia o lou agaga.

3Auā ‘ua tele lava lo‘u fiafia ‘ina ‘ua ō mai le ‘au uso, ma fa‘ailoa mai lou fa‘amaoni, ‘ina ‘ua e savali i le ‘upu moni.

4E leai so‘u fiafia e sili i lenei, pe ā ‘ou fa‘alogo ‘ua sāvavali la‘u fānau i le ‘upu moni.

O le Vi‘ia o Kaio

5Le pele e, na e fa‘amaoni lava i mea uma o faia e oe i le ‘au uso ‘ae maise tagata ‘ese,

6o ē ‘ua fa‘ailoa mai lou alofa i luma o le ekalesia; ‘āfai ‘e te fesoasoani i lo latou moliga e tusa i le Atua, e lelei lau mea e fai.

7Auā na latou ō atu ‘ona o lona suafa, le le‘i talia sina mea mai nu‘u ‘ese.

8O lea e tatau ai ‘ona tatou talia tagata fa‘apea, ‘ina ‘ia tatou fai ma fesoasoani i le ‘upu moni.

O Tioterifi ma Temetiu

9Na ‘ou tusi atu i le ekalesia a o Tioterifi, o lē fia sili ‘iā te i latou, e lē talia i matou e ia.

10O le mea lea, Pe a a‘u alu atu, ‘ou te fa‘amanatu ai lana amio o lo‘o faia e ia, o lo‘o taufa‘aleaga mai i a‘i matou i ‘upu leaga. E lē gata fo‘i i ia mea, ‘ae lē talia lava e ia le ‘au uso, e vavao atu fo‘i i ē loto i ai, na te fa‘ate‘aina fo‘i i latou i le ekalesia.

11Le pele e, ‘aua ‘e te fa‘aa‘oa‘o i le leaga, na o le lelei. O lē amio lelei, mai le Atua lava lea; peita‘i o amio leaga, e le‘i iloa atu lava e ia le Atua.

12‘Ua logoleleia Temetiu e tagata uma lava, ‘atoa ma le ‘upu moni lava; o a‘u fo‘i ‘ou te molimau i ai, ‘ua ‘outou iloa fo‘i e moni la‘u mau.

O ‘Upu Fa‘ai‘u

13‘Ua ‘iā te a‘u mea e tele e tusi atu ai, ‘ae ‘ou te lē fia tusi atu ‘iā te oe i le vaitusi ma le fulu tusi.

14Auā ‘ou te fa‘amoemoe o le a vave feiloa‘i i tā‘ua, ‘ina ‘ia tā fetautalatala‘i.

15‘Ia ‘iā te oe le manuia.

O lo‘o alolofa atu le aumea mamae uma lava.