Fa‘ata‘oto 18 - Revised Samoan Catholic Bible

1O lē ‘ua vavae ‘ese, ‘ua sā‘ili o ia i lona mana‘o;

e finau o ia i le poto uma lava.

2E lē mana‘o le vale i le fa‘autauta;

‘ua na ‘ona ia fa‘aali o lona loto.

3A sau le tagata agasala, ‘ua sau fa‘atasi ai fo‘i le ‘ino‘ino;

e sau fo‘i le luma fa‘atasi ma le amio matagā.

4O ‘upu a le gutu o le tagata, o vai loloto ia;

o le puna o le poto, o le alia ola lava lea.

5E lē lelei ‘ona ‘au ma le tagata agasala,

‘ina ‘ia faia‘ina i le fa‘amasinoga lē ‘ua amiotonu.

6E ō atu laugutu o le vale i le misa;

‘ua vala‘au fo‘i lona gutu i ta.

7O le gutu o le vale e fano ai o ia; o ona laugutu fo‘i,

o le mailei lea o lona ola.

8O ‘upu a lē fa‘atuaupua, e tusa ia ma mea suamalie;

‘ua o‘o ifo i totonu lava o le manava.

9O lē ‘ua paiē fo‘i i lana galuega, la te uso ma lē na te fa‘amaumau mea.

10O le suafa o le ALI‘I, o le ‘olo malosi lea;

e sola atu i ai lē amiotonu, ‘ona sao ai lea o ia.

11O le ‘oloa o le mau‘oa, o lona ‘olo malosi lea;

e pei o le pā maualuga fo‘i i lona lava manatu.

12E muamua ‘ona fa‘amaualuga o le loto o le tagata i le malaia o ia;

‘ae muamua le fa‘amaulalo i le mamalu.

13O lē na te tali atu i le ‘upu, a o le‘i fa‘alogo i ai,

e fai lea mōna valea ma mea e fa‘amāina ai o ia.

14O le loto o le tagata, na te fa‘ato‘ato‘a ai lona ma‘i;

a o le loto fa‘anoanoa, o ai sē na te lavā ‘onosa‘i?

15O le loto o lē ‘ua mafaufau na te maua le poto;

o taliga fo‘i o lē ‘ua poto, e sā‘ili ia i le poto.

16O le mea alofa a le tagata e fa‘alauteleina ai se ala mōna;

e ta‘ita‘iina ai fo‘i o ia i luma o ali‘i.

17E tonu lē ‘ua muamua i lana finauga,

‘ae sau le tasi tagata, ‘ona su‘esu‘e ai lea o ia ‘iā te ia.

18O le vili e i‘u ai misa; e māvae ai fo‘i ē fitafita.

19O le tagata ‘ua agaleagaina e lona uso, e sili o ia ‘ona faigatā i le ‘olo;

o misa fo‘i o uso e tusa ia ma fa‘amaufa‘alava o le ‘olo.

20O le fua o le gutu o le tagata e mā‘ona ai lona manava;

e mā‘ona o ia i mea e tupu mai i ona laugutu.

21O le oti ma le ola, o lo‘o i le pule a le laulaufaiva ia;

o ē manana‘o i ai latou te ‘a‘ai i lona fua.

22O lē ‘ua maua le avā, ‘ua maua e ia le mea lelei;

‘ua maua fo‘i e ia le alofa mai le ALI‘I.

23E tautala mai ma le ‘ai‘oi lē ‘ua mativa,

a o le mau‘oa e tali atu o ia ma le fa‘asiasia.

24O le tagata ‘ua fai ana uō, e i‘u ‘ina tigāina ai o ia,

a o i ai le tagata alofa e sili ona pipi‘i mai i lo le uso.