Kenese 22 - Revised Samoan Catholic Bible

‘Ua ‘ave Isaako e fai ma Taulaga

1‘Ua mavae ia mea, ‘ona tofotofo lea o le Atua ‘iā Aperaamo, ‘ua fa‘apea mai ‘iā te ia, “Aperaamo e;” ‘ona tali atu lea o ia, “O a‘u lenei.”

2‘Ona fetalai mai lea o ia, “‘ia e ‘ave lou atali‘i, o lou atali‘i e to‘atasi, o lē ‘ua pele ‘iā te oe, o Isaako lava ma e alu i le nu‘u o Moria; ma avatu ‘iā te ia e fai ma taulaga mū i lea mea i le tasi mauga ‘ou te ta‘uina atu ai ‘iā te oe.”

3‘Ona ala tula‘i lea o Aperaamo i le taeao ma fa‘anofoa lana asini, ‘ua ‘ave fo‘i e ia ni ona taulele‘a e to‘alua ma Isaako lona atali‘i; ma na taisi fafie e fai a‘i le taulaga mū, ‘ona tula‘i lea o ia ma alu i le mea na ta‘uina mai ai e le Atua ‘iā te ia.

4‘Ua o‘o i le aso tolu ‘ona tepa a‘e lea o Aperaamo ma ‘ua iloa lea mea ‘ae mamao.

5‘Ua fai atu fo‘i Aperaamo i ona taulele‘a, “Tali atu ia ‘i‘inei ma le asini, a o a‘u ma le tama ma te ō i o e tapua‘i ai, i le ma toe fo‘i mai ‘iā te ‘oulua.”

6‘Ua ‘ave fo‘i e Aperaamo le fafie e fai a‘i le taulaga mū ma fa‘ae‘e ai ‘iā Isaako lona atali‘i, ‘ua ‘ave fo‘i e ia i ona lima le afi ma le polo, ‘ona ō ai lea o i lā‘ua.

7‘Ona fai atu lea o Isaako i lona tamā o Aperaamo, ‘ua fa‘apea atu, “Lo‘u tamā e.”

‘Ona tali mai lea o ia, “Lo‘u atali‘i e, o a‘u lenei.”

‘Ona fai atu lea o ia, “Fa‘auta, o le afi ma le fafie; a o ifea se tama‘i mamoe e fai a‘i le taulaga mū?”

8‘Ona tali mai lea o Aperaamo, “Lo‘u atali‘i e, e ‘aumai e le Atua se tama‘i mamoe māna e fai a‘i le taulaga mū.” ‘Ona ō fa‘atasi ai lea o i lā‘ua.

9‘Ua o‘o atu lā‘ua i le mea na ta‘uina mai ai e le Atua ‘iā te ia; ‘ona faia lea e Aperaamo o le fatafaitaulaga i lea mea, ma fa‘aafu le fafie; ‘ua na fusifusi fo‘i lona atali‘i o Isaako ma fa‘ae‘e ‘iā te ia i le fata i luga o le fafie. Epe 11.12

18O lau fānau fo‘i e manuia ai atu nu‘u uma lava o le lalolagi auā ‘ua e usiusita‘i i la‘u ‘upu.”Galu 3.25

19‘Ua toe fo‘i Aperaamo i ona taulele‘a; ‘ona latou tula‘i lea ma latou ō fa‘atasi i Peresepa; ‘ua mau ai fo‘i Aperaamo i Peresepa.

O le Gafa o Nakori

20‘Ua mavae fo‘i ia mea, ‘ona ta‘ua mai lea ‘iā Aperaamo, ‘ua fa‘apea mai, “Fa‘auta mai, ‘ua fānau fo‘i e Meleka ana tama i lou uso o Nakori.

21O lana ulumatua o Usa, ma lona uso o Pusa, ma Kimueli le tamā o Arama,

22ma Kiseta, ma Haso, ma Pilitaso, ma Itelafo, ma Petueli.”

23‘Ua fānaua fo‘i e Petueli o Repeka; o i latou nei e to‘avalu ‘ua fānau mai e Meleka ‘iā Nakori le uso o Aperaamo.

24O lana palake fo‘i, o Reuma lona igoa, ‘ua fānau mai fo‘i e ia o Tepa, ma Kaamo, ma Taaso, ma Maaka.