Pese 1 - Revised Samoan Catholic Bible

1O le pese silisili a Solomona.O le Ulua‘i PeseTama‘ita‘i.

2‘Ia sogi mai o ia ‘iā te a‘u i sogi o lona fofoga;

auā e sili ‘ona lelei o lou alofa i le uaina.

3O le nanamu o ou u‘u lelei ‘ua ‘avea ai lou suafa

e pei o le u‘u ‘ua liligiina;

o le mea lea ‘ua manana‘o ai taupou ‘iā te oe.

4‘Ia e tōsina atu o a‘u,

matou te taufetuli ma mulimuli atu ‘iā te oe.

‘Ua ta‘ita‘iina o a‘u e le tupu i ona potu;

matou te fiafia ma ‘oli‘oli ‘iā te oe.

E tele lo matou fiafia i lou alofa mai,

‘ae itiiti i le uaina;

‘ua manana‘o tagata amiotonu ‘iā te oe.

5Tama fafine a Ierusalema e, e uliuli a‘u,

‘ae lālelei, e pei o fale ‘ie o Kitara,

e pei o ‘ie puipui o Solomona.

6‘Aua tou te va‘ava‘ai mai ‘iā te a‘u, ‘ina ‘ua uliuli o a‘u;

auā ‘ua lāina a‘u.

Na ita mai ‘iā te a‘u o fānau a lo‘u tinā;

na latou tofia a‘u e fai ma leoleo tōvine;

a o lo‘u lava tōvine ‘ou te le‘i leoleoina.

7O oe na ‘ua mana‘o i ai lo‘u loto,

‘inā ta‘u mai ia ‘iā te a‘u le mea ‘e te fafaga ai i a‘u mamoe,

o le mea ‘e te ‘ave ai lo‘u lafu e ta‘oto ai i le aoauli.

Auā se a le mea e ‘avea ai a‘u e pei o sē ‘ua lailoa,

i fealualua‘i i lafu o ē ‘ua fa‘atasi ma oe?

Ali‘i.

8‘Āfai ‘e te lē iloa, o oe na le sili ‘ona lālelei i fafine,

‘inā alu atu ia oe i tulagāvae o le lafu,

ma fafaga i a‘u tama‘i ‘oti fafine,

o latalata ane i mea e nonofo ai leoleo mamoe.

9La‘u uō e,

‘ua fa‘atusaina oe i solofanua i kariota o Farao.

10‘Ua matagofie ou alafau i sei;

o lou ua fo‘i i asoa.

11Matou te faia mo oe,

ni pale auro e ema i ario.

Tama‘ita‘i.

12‘Ua pua‘iina le manogi o lo‘u nato,

‘ina o afio le tupu i lana tautega.

13O le ‘ofu‘ofu pulu muro lo‘u manamea ‘iā te a‘u;

e asoa ia i lo‘u ua i le po ‘atoa.

14O le fuifui kofero lo‘u manamea,

‘iā te a‘u i tōvine o Enokati.

Ali‘i.

15Fa‘auta, la‘u uō e, ‘ua e lālelei, fa‘auta, ‘ua lālelei oe,

‘ua ni mata o se lupe ou mata.

Tama‘ita‘i.

16Fa‘auta, lo‘u manamea e, e lālelei oe,

e matagofie lava;

‘ua uluuluola lo tā moega.

17O utupoto o lo tā fale o arasi ia,

o lo tā falealuga ‘ua faia i perosi.