Failauga 7 - Revised Samoan Catholic Bible

O le Ta‘uleleiina ma le ‘Onosa‘i ma le Poto e Māmā ai le Tigā ‘ona o Mea Valea

1E sili ‘ona lelei o le ta‘uleleia i le suāu‘u lelei,

ma le aso e oti ai e sili i le aso e fānau mai ai.

2E sili ‘ona lelei o le alu i le fale o i ai le fa‘anoanoa, i le alu i le fale ‘ua fai ai le tausamiga;

auā o le i‘uga lea o tagata uma; e manatua fo‘i e le tagata ola i lona loto.

3E sili ‘ona lelei o le tigā, i le ‘ata‘ata;

auā o le fa‘anoanoa, o mata e lelei ai le loto.

4O le loto o le tagata poto ‘ua i le fale o i ai le fa‘anoanoa;

a o le loto o ē vālelea, ‘ua i ai lea i le fale o i ai le ‘oli‘oli.

5E sili ‘ona lelei o lē fa‘alogo i le a‘oa‘iga a le tagata poto,

i le fa‘alogo o se tasi i le pese a ē vālelea.

6Auā e pei o le talalī o la‘au talatala i lalo o le ‘ulo,

e fa‘apea le ‘ata‘ata o le vale; o le mea fa‘atauva‘a fo‘i lea.

7O le sauā e fa‘avalea ai lava le tagata poto;

o le mea foa‘ifuaina fo‘i e leaga ai le loto.

8E sili ‘ona lelei o le i‘uga o se mea i lona amataga.

E sili ‘ona lelei o lē ‘ua ‘onosa‘i i lē ‘ua loto fa‘amaualuga.

9‘Aua le fa‘ata‘alise ‘ona ita o lou loto;

auā e tumau le ita i loto o ē vālelea.

10‘Aua ‘e te fa‘apea, “Se a le mea ‘ua sili ai ‘ona lelei o ona po anamua i nei ona po?”

Auā e lē o le poto ‘ua e fesili ai i lea mea.

11E lelei le poto e fa‘atasi ma le tofi,

e sili ‘ona aogā fo‘i i ē o iloa atu le lā;

12auā ‘ua fai le poto ma mamalu, ‘ua fai fo‘i tupe ma mamalu;

a o le aogā lenei o le poto ‘ua maua, e ola ai ē ‘ua i ai.

13‘Inā mānatunatu ia i le galuega a le Atua;

auā o ai sē na te mafaia ona fa‘asa‘oina o le mea ‘ua fa‘api‘opi‘oina e ia?

14‘Inā fiafia ia i le aso e manuia ai, ‘ia mafaufau fo‘i i le aso e malaia ai;

‘ua tu‘u feagai e le Atua le tasi i le tasi, ‘ina ‘ia lē iloa e le tagata se mea e tupu pe a mavae atu o ia.O mea e Faigatā ‘ona Malamalama i ai

15‘Ua ‘ou iloa nei mea uma i ‘ou nei aso fa‘atauva‘a; o le tagata amiotonu e oti o ia i lana amiotonu; o le tagata amio leaga fo‘i e ola umi o ia i lana amioleaga.

20E leai lava se tagata amiotonu i le lalolagi, o lē na te faia amio lelei, ma le lē agasala.

21‘Aua fo‘i ‘e te manatu i ‘upu uma ‘ua faia; ne‘i e fa‘alogo i lau ‘au‘auna o fetu‘u ‘iā te oe;

22auā fo‘i ‘ua iloa lou loto, o oe lava ‘ua atu lasi ‘ona e fetu‘u i nisi tagata.

23‘Ua ‘ou tofotofo ma le poto i nei mea uma; na ‘ou fa‘apea ifo, “O le a ‘ou poto;” a ‘ua mamao lava lea ‘iā te a‘u.

24O le mea ‘ua mamao ma le matuā loloto, o ai sē na te mafaia ‘ona iloa?