1Vivi‘i atu ia ‘outou i le ALI‘I;
vala‘au atu ia i lona suafa;
‘ia ‘outou fa‘ailoa atu i nu‘u ana mea na fai.
2‘Ia pepese ‘outou ‘iā te ia, ‘ia ‘outou fai pesega ‘iā te ia;
talatala atu ia ‘outou i ona vāvega uma lava.
3‘Ia ‘outou mitamita i lona suafa pa‘ia;
‘ia ‘oli‘oli loto o ē sā‘ili‘ili i le ALI‘I.
4Sā‘ili‘ili ia ‘outou i le ALI‘I ma lona malosi;
sā‘ili‘ili i ona fofoga, ‘aua le aunoa.
5‘Ia ‘outou manatua ana mea mamana na ia faia,
o ona vāvega, ‘atoa ma fa‘amasinoga a lona fofoga.
6O ‘outou le fānauga a lana ‘au‘auna o Aperaamo,
o atali‘i o Iakopo na ia filifilia.
7O ia lava o le ALI‘I lo tatou Atua;
o i le lalolagi uma lava ana fa‘amasinoga.
8E manatua o ia e fa‘avavau o lana feagaiga,
o le ‘upu na ia poloa‘i mai i tupulaga e afe.
9O le feagaiga sa la osia ma Aperaamo,
ma lana tautoga ‘iā Isaako.
10‘Ua ia fa‘amauina fo‘i ‘iā Iakopo e fai ma tulafono,
o le feagaiga e fa‘avavau mā Isaraelu.
11‘Ua fa‘apea atu ‘iā te ia,
“‘Ou te avatu ‘iā te oe le lau‘ele‘ele o Kanana,
o le vaega lea o lo ‘outou tofi.”
12‘Ina o to‘aitiiti i latou,
e to‘aitiiti lava, mōna o tagata ‘ese i lea mea.
13Na feoa‘i fo‘i i latou i lea nu‘u ma lea nu‘u,
nai le tasi itū mālō i le tasi nu‘u.
14‘Ua lē tu‘ua e ia ‘ia fa‘asauā se tagata ‘iā i latou;
‘ua ia a‘oa‘i atu fo‘i i tupu ‘ona o i latou.
15‘Ua fa‘apea atu i ai, “‘Aua le tago i ē ‘ua ‘ou fa‘au‘uina,
‘aua fo‘i le agaleaga atu i a‘u perofeta.”
16‘Ua ia vala‘au fo‘i i le oge e o‘o i le nu‘u;
‘ua ia gagau le to‘oto‘o o le mea e ‘ai uma.
17‘Ua ‘auina atu e ia o le tagata e muamua atu ‘iā i latou,
o Iosefa lea na fa‘atauina e fai ma ‘au‘auna.
18‘Ua latou fa‘atigā i ona vae i le noanoaga;
‘ua o‘o lava o ia i le u‘amea;
19‘ua o‘o i le tau na taunu‘u ai lana afioga.
O le afioga a le ALI‘I na tofotofo ai ‘iā te ia.
20‘Ua ‘a‘auina atu nisi e le tupu e tatala ‘iā te ia;
o lē na pule i le nu‘u ‘ua fa‘asa‘oloto ‘iā te ia.
21‘Ua na tofia o ia e fai ma ali‘i i lona ‘āiga,
ma ia pule i ana mea uma lava.
22‘Ina ‘ia noanoa e ia ali‘i na ‘iā te ia i lana faitalia,
ma a‘oa‘o atu i lona ‘au faipule ‘ia popoto.
23‘Ua o‘o atu fo‘i Isaraelu i Aikupito,
‘ua āumau fo‘i Iakopo i le nu‘u o Hamo.
24‘Ua ia fa‘ato‘ateleina fo‘i lona nu‘u,
‘ua na fa‘amalolosia i latou e sili i ē na fa‘asauā ‘iā i latou.
25‘Ua ia liua fo‘i o latou loto e ‘ino‘ino atu i lona nu‘u,
ma ia togafiti pepelo i ana ‘au‘auna.
26‘Ua ia ‘auina atu lana ‘au‘auna o Mose,
o Arona fo‘i na filifilia e ia.
27‘Ua la tu‘u atu ‘iā i latou ona lava fa‘ailoga,
o vāvega fo‘i i le nu‘u o Hamo.
28‘Ua na ‘auina atu le pouliuli, i le ‘ua fa‘apouliuligia ai,
e le‘i fōua fo‘i lana afioga.
29‘Ua ia liua o latou vai i le toto,
ma fa‘amamate i o latou i‘a.
30‘Ua fa‘atutupu tele mai o rane i lo latou lau‘ele‘ele,
‘ua o‘o lava i afeafe o latou tupu.
31‘Ua ia fetalai ane, ‘ona ō mai ai lea o le vao garova ma ‘utu,
‘ua o‘o i o latou nu‘u uma lava.
32‘Ua ia tu‘uina atu ‘iā i latou o le uato‘a e sui a‘i le timu,
ma le afi mumū i lo latou nu‘u.
33‘Ua na taia fo‘i o latou vine ma o latou mati;
‘ua gauia fo‘i la‘au i lo latou nu‘u.
34‘Ua fetalai ia, ‘ona ō mai lea o sē akerise,
ma sē aleka e lē mafaitaulia.
35‘Ua ‘aina ai le vao iti uma i lo latou nu‘u,
‘ua ‘aina lava le fua o lo latou lau‘ele‘ele.
36‘Ua ia fafasi i ulumatua uma lava i lo latou nu‘u,
o le amataga lea o lo latou malosi uma.
37‘Ua ia ‘aumaia i latou ma le ario ‘atoa ma le auro;
e leai fo‘i se tasi sa vaivai i o latou itū‘āiga.
38‘Ua fiafia Aikupito ‘ina ‘ua ō atu i latou;
auā na maua i latou i le fefe ‘ona o i latou.
39‘Ua ia fofola le ao e fai ma fa‘apaologa,
o le afi fo‘i e fa‘amalamalama a‘i le po.
40‘Ua ole atu i latou, ‘ona avatu lea e ia o salu,
ma le mea e ‘ai mai le lagi ‘ua ia fa‘amā‘o‘ona ai ‘iā te i latou.
41‘Ua ia susu‘e le papa, i le ‘ua puna mai ai le vai;
‘ua tafe i le nu‘u naumati, o le vaitafe lava.
42Auā ‘ua ia manatua lana afioga pa‘ia
i lana ‘au‘auna o Aperaamo.
43‘Ua na ‘aumaia lona nu‘u ma le ‘oli‘oli,
o ē na filifilia e ia ‘ua ia ‘aumaia ma le leo fiafia.
44‘Ua ia avatu fo‘i ‘iā i latou o fanua o nu‘u ‘ese;
na maua fo‘i e i latou o mea sa galulue ai nu‘u;
45‘ina ‘ia tausi i latou i ana sauniga,
ma usiusita‘i i ana tulafono.
‘Ia ‘outou vivi‘i atu i le ALI‘I.
Who We AreWhat We EelieveWhat We Do
2025 by iamachristian.org,Inc All rights reserved.