1‘Ona tali atu ai lea o Iopu, ‘ua fa‘apea atu,
2“‘Inā matuā fa‘alogologo mai ia ‘outou i la‘u ‘upu,
‘ia faia fo‘i lea ma a ‘outou fa‘amafanafanaga.
3‘Inā ‘onosa‘i ia ‘iā te a‘u, a se‘ia ‘ou tautala atu,
a mavae atu la‘u ‘upu, i le tauemu mai pea ia.
4A o a‘u nei, ‘ou te tagi atu ‘ea i tagata?
a fa‘apea, se a le mea e lē tigā ai lo‘u loto?
5‘Ia ‘outou va‘ai mai ‘iā te a‘u, ma ‘ia ‘outou femēmēa‘i,
ma ‘ia tu‘u a‘e o ‘outou lima i o ‘outou fofoga.
6A ‘ou manatu i ai, ‘ona ‘ou atuatuvale ai lea,
‘ua maua ai fo‘i lo‘u tino e le tetemū.
7Se a le mea ‘ua ola mai ai o ē amio leaga,
‘ua o‘o ‘ina toeaina, ma fa‘ateleina lava o latou ‘oloa?
8‘Ua fa‘atumauina a latou fānau i o latou luma e fa‘atasi ma i latou,
ma ē o tutupu mai ‘iā te i latou ‘ua fa‘atumauina i o latou luma.
9‘Ua saogalemū o latou fale e leai se mea e matata‘u ai,
‘ua lē i ai fo‘i i o latou luga le sasa a le Atua.
10‘Ua ofia a latou povi, ma ‘ua lē papā,
e fānanau a latou povi, ‘ae lē fānau lē au.
11E ‘a‘auina atu e i latou o latou tamaiti e pei o se lafu mamoe,
e ta‘a‘alo fo‘i a latou fānau.
12‘Ua latou ‘ava‘e le topa ma le kitara,
ma latou ‘oli‘oli i le leo o le fa‘aili.
13E fa‘auma o latou aso o manuia,
e pei o le ‘emo o le mata ‘ona ō ifo o i latou i le tu‘ugamau.
14‘Ua latou fai atu fo‘i i le Atua,
‘‘Inā alu ‘ese ia oe ‘iā te i matou, auā matou te lē fia iloa ou ala.
15O ai ‘ea Lē e ona le malosi uma lava, matou te ‘au‘auna ai ‘iā te ia?
Se a fo‘i sona aogā ‘iā te i matou pe a matou tatalo atu ‘iā te ia?’
16Fa‘auta, e lē o i o latou lima lo latou manuia;
‘ia mamao ‘iā te a‘u le filifiliga a ē amio leaga.
17“E tineia fa‘afia ‘ea le lamepa a ē amio leaga,
ma o‘o atu ‘iā te i latou lo latou malaia,
ma na tufatufa i ai o puapuagā i lona to‘asā?
18E tutusa i latou ma ‘au o saito e lelea i le matagi,
‘ua tutusa fo‘i ma le aputi o saito ‘ua lelea i le afā.
19‘E teu e le Atua lana agasala mā lana fānau.’
Na te tauia o ia, e iloa ai fo‘i e ia.
20E iloa e ona mata lona malaia,
e inu fo‘i e ia i le to‘asā o Lē e ona le malosi uma lava.
21Auā se a ‘ea sona fiafia i lona ‘āiga pe a mavae atu o ia,
ma vaeluaina ona masina ‘ua faitauina.
22E a‘oa‘o atu ‘ea se tasi le poto i le Atua?
O ia lava le fa‘amasino i ē maualuluga.
23E oti le tasi a o ‘ato‘atoa lona manuia,
‘ua matuā saogalemū lava o ia ma le filemū.
24‘Ua tūtūmu ana fagagāmanu i le suāsusu,
‘ua susū fo‘i le ‘a‘ano o ona ivi.
25E oti fo‘i le tasi a o fa‘anoanoa lona loto,
e le‘i ‘ai fo‘i o ia ma le fiafia.
26La te ta‘o‘oto fa‘atasi i le ‘ele‘ele,
e liloia fo‘i i lā‘ua i ilo.
27“Fa‘auta, ‘ua ‘ou iloa o ‘outou mafaufauga,
ma mānatunatuga tou te fa‘asauā mai ai ‘iā te a‘u.
28Auā ‘ua ‘outou fai mai, ‘O ifea o i ai le fale o le fa‘asauā?
O ifea fo‘i fale ‘ie o ē mau ai o ē ‘ua amio leaga?’
29‘Ua ‘outou le fesili ‘ea ‘iā te i latou o ē ui ane i le ala?
pe tou te lē iloa fo‘i o latou fa‘ailoga?
30‘Ua tu‘u le tagata amio leaga mo le aso o le malaia;
e ta‘ita‘iina atu i latou i le aso o le to‘asā tele.
31O ai ‘ea na te ta‘u atu lona ala i ona luma?
O ai fo‘i na te taui atu ‘iā te ia o mea na ia faia?
32E ‘avea fo‘i o ia i tu‘ugamau,
e leoleo fo‘i se tasi i le loa.
33E suamalie ‘iā te ia le ‘ele‘ele o le vanu,
e mulimuli solo atu fo‘i ‘iā te ia o tagata uma,
o ē ‘ua muamua fo‘i ‘iā te ia e lē ma faitaulia.
34A fa‘apefea ‘ona ‘outou fa‘amatalaloto mai fua ‘iā te a‘u?
Auā ‘ua pepelo a ‘outou tali.”
Who We AreWhat We EelieveWhat We Do
2025 by iamachristian.org,Inc All rights reserved.
