1Lo‘u atali‘i e,
‘ia e tausi a‘u ‘upu ma e teu a‘u poloa‘iga ‘iā te oe.
2‘Ia e tausi a‘u poloa‘iga, ‘e te ola ai ma a‘u tulafono e pei o lou tamatama‘imata;
3‘ia e fusi ai i ou tamatama‘i lima;
‘ia e tusi ai i le papa o lou loto;
4‘ia e fai atu i le poto, “O oe o lo‘u tuafafine;”
ma ‘ia e ta‘ua le atamai, o lou ‘āiga lea.
5‘Ina ‘ia leoleo ‘iā te oe a‘i le fafine ‘ese,
o le fafine ‘ese na te fa‘a‘ole‘ole i ana ‘upu.O le Fafine Fa‘a‘ole‘ole
6Auā o le fa‘amalama o lo‘u fale na ‘ou va‘ava‘ai atu ai i le mea fa‘amata‘upega;
7‘ona ‘ou va‘ai atu ai lea i ē faigofie;
na ‘ou iloa ‘ua i taulele‘a le tasi tama, ‘ua leai sona mafaufau;
8na ui ane o ia i le ala e lata ane i le fetaulaigāala e nofo ai le fafine;
na ia alu ane i le ala i lona fale,
9i le segisegi, i le afiafi, i le tulua o po, i le pouliuli;
10fa‘auta fo‘i, na fetaia‘i ma ia le fafine ‘ua ‘ofu i le ‘ofu o le fafine talitane,
‘ua ‘iā te ia fo‘i le loto pepelo;
11‘ua leoleoā o ia ma le vaogatā;
‘ua lē nofo tumau ona vae i lona fale.
12Se itū aso ‘ua i fafo, se itū aso ‘ua i malae;
na te lamalama fo‘i e lata ane i fetaulaigāala uma lava.
13Na ia pu‘e atu fo‘i ‘iā te ia ma sogi ‘iā te ia ‘ua mata fa‘alēmā;
ma ‘ua fa‘apea atu ‘iā te ia,
14“‘Ua ‘iā te a‘u taulaga fa‘afetai;
o le aso nei, ‘ua ‘ou avatu ai mea na ‘ou tautō ai;
15o le mea lea na ‘ou sau ai e fa‘afetaia‘i ‘iā te oe;
e sā‘ili lava ‘iā te oe, ‘ua ‘ou maua fo‘i oe.
16‘Ua fofola lo‘u moega i ‘ie ‘afu,
o le ‘ie pulepule mai Aikupito.
17‘Ua ‘ou lūlūina lo‘u moega i le muro ma aloe, ma le kinamomi;
18sau ia, ‘inā tā fa‘amalilie i le alofa,
se‘ia o‘o i le taeao, ‘ia tā fiafia lava i le fealofani.
19Auā e lē i ai la‘u tane i lona fale;
‘ua alu o ia i le malaga mamao.
20‘Ua alu ma ia le taga tupe;
e sau o ia i lona ‘āiga i le masina e fa‘ato‘ā va‘aia.”
21Na ia fa‘asesē ‘iā te ia i le tele o ana togafiti;
na ia tōsina o ia i ona laugutu fa‘a‘ole‘ole.
22‘Ua mulimuli loa o ia ‘iā te ia, e pei o le povi ‘ua alu a fasia;
e pei o le vale ‘ua alu i le a‘oa‘iga o noanoaga;
23se‘ia ati le u i lona ate, e pei ‘ona fa‘avave atu le manu i le mailei;
na te lē iloa ‘ua saunia lea e mate ai o ia.
24O lenei, le fānau e,
‘ia ‘outou fa‘alogo mai ‘iā te a‘u;
‘ia ua‘i mai o ‘outou taliga i ‘upu a lo‘u gutu;
25‘aua ne‘i afe lou loto i ona ala; ‘aua ne‘i e sesē atu i ona magāala.
26Auā e to‘atele ‘ua lafotūina e ia ‘ua manunu‘a;
o ē malolosi lava o i latou uma o ē ‘ua fasiotia e ia.
27O lona fale, o le ala i seoli lea, e alu ifo ai i ana o le oti.
Who We AreWhat We EelieveWhat We Do
2025 by iamachristian.org,Inc All rights reserved.
