1O le tausaga e tasi le selau ma le limagafulu ma le tasi, na alu ‘ese ai Temetiu, le atali‘i o Seluko, i le ‘a‘ai o Roma ma ‘ua a‘e, fa‘atasi ma nai tagata e to‘aitiiti, i le tasi ‘a‘ai tumatafaga ma ‘ua ia nofo ai ma tupu.
2Ma ‘ua fa‘ato‘ā o‘o atu o ia i le mālō o ona tua‘ā, fa‘auta ‘ua pu‘eina o Atioko ma Lusia e le itūtau‘a ‘ina ‘ia molia mai ai i lā‘ua ‘iā te ia.
3Ma ‘ua iloa e ia lea mea ma ‘ua fai atu, “‘Aua lava tou te fa‘aali mai ‘iā te a‘u o latou mata.”
4Ma ‘ua fasia i lā‘ua e le itūtau‘a ma ‘ua nofo o Temetiu i le nofoāli‘i o lona mālō.
5Ma ‘ua ō mai ‘iā te ia o tagata agasala ma le amio leaga mai Isaraelu, i le o lo latou ta‘ita‘i o Alekimo sa fia tofia ma ositaulaga;
6ma ‘ua latou ta‘uleaga lo latou nu‘u i luma o le tupu, o fai atu, “‘Ua fa‘aumatia e Iuta mōna uso o āu uō uma lava ma ‘ua na tulia i matou a‘i lo matou lau‘ele‘ele.
7O lenei, ‘ia e ‘auina atu se tagata ‘e te fa‘atuatua i ai, na te alu ma va‘ava‘ai i mea uma ‘ua fa‘aleagaina ai i matou ma le lau‘ele‘ele o le tupu, ma ‘ia fa‘asalaina o ana uō uma ma ē fesoasoani ‘iā te i latou.”
8Ma ‘ua filifilia e le tupu ai ana uō, o Pakite, sa pule o ia i tala atu o le vaitafe, o le tagata mamalu i le mālō ma le fa‘amaoni i le tupu.
9Ma ‘ua ‘auina atu o ia na te va‘ava‘ai i mea na fa‘aleagaina e Iuta; ‘ua na tofia fo‘i ma ositaulaga le tagata amio leaga o Alekimo ma ‘ua poloa‘i atu ‘iā te ia ‘ia taui ma sui i le fānauga a Isaraelu.
10Ma ‘ua latou tūtūla‘i ma ‘ua latou ō mai ma le itūtau‘a tele i le ‘ele‘ele o Iuta ma ‘ua latou ‘auina mai o savali ma ‘ua latou tautala mai ‘iā Iuta mōna uso i ni ‘upu o le filemū ma le fa‘a‘ole‘ole.
11Ma ‘ua latou lē ‘amana‘ia a latou ‘upu, auā ‘ua iloa ‘ua latou ō mai ma le itūtau‘a tele.
12Ma ‘ua ō atu ‘iā Alekimo ma Pakite nisi o le ‘au tusi‘upu e sā‘ili i ai o mea tonu;
13o i latou fo‘i sa tumua i le fānauga a Isaraelu, o le ‘au Hasitaia, ‘ua latou tagi atu i ai i se fa‘aleleiga.
14Auā sa latou fa‘apea ifo, “‘Ua sau le tagata ositaulaga, o le gafa o Arona; na te lē fa‘a‘ole‘ole ‘iā te i tatou.”
15O Alekimo na feutaga‘i mai i latou i ‘upu o le filemū ma ‘ua tautō ‘iā te i latou, o fai mai, “Matou te lē fa‘ao‘o se leaga ‘iā te ‘outou po o a ‘outou uō.”
16Ma ‘ua latou talitonu ‘iā te ia ‘ae peita‘i na pu‘eina e Alekimo o tagata e to‘aonogafulu o i latou ma ‘ua fasioti ‘iā te i latou i le aso e tasi, e tusa ma le ‘upu ‘ua tusia:
17“‘Ua latou fa‘ataugāina tino o ou tagata amio Atua,
ma fa‘amaligi o latou toto,
‘ua so‘o ai Ierusalema;
na leai fo‘i sē na te tanua i latou.”
18Ma ‘ua maua le nu‘u uma i le mata‘u ma le gatete, auā sa latou fai ane, “E lē o i ai se fa‘amaoni po o se amiotonu ‘iā te i latou; auā ‘ua latou solia le feagaiga ma le tautoga na latou tautō ai.”
19Ma ‘ua alu ‘ese Pakite a‘i Ierusalema, ‘ua tolauapi o Peteseta; ‘ona ‘auina atu lea nisi ma ‘ua pupu‘e i tagata Iutaia e to‘atele na latou sōsōla ‘ese ‘iā te ia; ma ‘ua na fasiotia nisi o le nu‘u ma ‘ua lafoina i latou i se vai ‘eli tele.
20Ma ‘ua na tu‘u atu le lau‘ele‘ele ‘iā Alekimo; ma ‘ua tu‘uina ‘iā te ia le vaega ‘au e fesoasoani ‘iā te ia; ‘ona alu lea o Pakite i le tupu.
21Ma ‘ua matuā tauivi o Alekimo e tāofi mā ia le tofiga o ositaulaga;
22ma ‘ua fa‘apotopoto ‘iā te ia o i latou uma sa fa‘atupu fa‘alavelave i lo latou nu‘u ma ‘ua latou maua le ‘ele‘ele o Iuta ma ‘ua latou matuā fa‘ataugā ‘iā Isaraelu.
23Ma ‘ua iloa e Iuta o mea leaga uma na faia e Alekimo ma ē sa fa‘atasi ma ia, o le fānauga lava a Isaraelu; e sili mamao lava i mea leaga a nu‘u ‘ese;
24ma ‘ua fealua‘i solo i le lau‘ele‘ele uma o Iuta, ma ‘ua na sui ma taui i tagata fouvale; ma ‘ua latou lē toe salalau i le lau‘ele‘ele.
25‘Ae ‘ua iloa e Alekimo ‘ua manumālō o Iuta ma ē sa fa‘atasi ma ia ma ‘ua na iloa na te lē lavā tete‘e atu ‘iā te i latou, ‘ona fo‘i atu lea o ia i le tupu ma ‘ua na tu‘ua‘i ai ‘iā te i latou i ni soligātulafono e tele.
26Ma ‘ua ‘auina e le tupu o Nikanora, o le tasi o ona ta‘imua aupito mamalu, sa ‘ino‘ino lona loto ‘iā Isaraelu ma ‘ua poloa‘i atu ‘iā te ia ‘ia fa‘aumatia le nu‘u. 1 Maka 3.38; 2 Maka 14.12-14; 8.9, 34-36; 15.3
27Ma ‘ua sau Nikanora i Ierusalema ma le itūtau‘a tele, ma ‘ua ‘auina mai le savali ‘iā Iuta mōna uso i ni ‘upu o le filemū ma le fa‘a‘ole‘ole, 2 Maka 14.15-24
28o fa‘apea mai, “‘Aua le vātau o ‘outou ma a‘u. ‘Ou te alu atu ma ni tagata e to‘aitiiti, ‘ina ‘ia ‘ou iloa atu o ‘outou mata ma le filemū.”
29Ma ‘ua sau ‘iā Iuta ma ‘ua la feofoa‘i i ‘upu o le filemū; ‘ae sa nofo sauni le fili e pu‘e ‘iā Iuta. 2 Maka 14.30
30Ma ‘ua iloa le tala e Iuta, ‘ua sau Nikanora ma le fa‘a‘ole‘ole ‘iā te ia, ‘ona ia mata‘u ai lea ‘iā te ia ma ‘ua lē toe loto e feiloa‘i ma ia.
31‘Ua iloa e Nikanora ‘ua lē toe lilo lana taupulega, ‘ona tula‘i lea e fa‘afetaia‘i ‘iā Iuta i le tau‘a e lata ane i Kafasalama.
32Ma ‘ua fasia o tagata pe limagaafe o le itūtau‘a a Nikanora, ‘ona latou sōsōla lea i le ‘a‘ai o Tavita.
33‘Ua mavae atu mea ia, ‘ona alu a‘e lea o Nikanora i le mauga o Siona ma ‘ua ulufafo ai ni isi o le ‘au ositaulaga ma le nu‘u e ofo alofa ‘iā te ia ma le filemū ma fa‘aali ‘iā te ia taulaga mū ‘ua molia mo le tupu. 2 Maka 14.31-36
34Ma ‘ua ula ‘iā te i latou ma le tauemu ma ‘ua fa‘aleaga ‘iā te i latou; ma ‘ua tautala i ‘upu fa‘asausili.
35Ma ‘ua tautō ma le ita, o fai ane, “‘Āfai e lē tu‘uina mai loa i o‘u lima e Iuta ma lana itūtau‘a, ‘ona ‘ou susunu lea o lenei fale pe a ‘ou toe fo‘i mai ma le manumālō.” Ma ‘ua alu ma le ita tele lava.
36Ma ‘ua ulufafo o ositaulaga ma ‘ua tutū i luma o le fatafaitaulaga ma le mea pa‘ia ma ‘ua latou fētāgisi o fai ane:
37“O oe, le Ali‘i e, ‘ua e filifilia lenei fale ‘ia vala‘auina i ai lou suafa, ‘ina ‘ia ‘avea ma fale o le tatalo ma le ‘ai‘oi atu mo le nu‘u.
38‘Ia e taui ma sui i lenei tagata ma lana itūtau‘a ma ‘ia fasia i latou i le pelu. ‘Ia e manatua a latou ‘upu fāifai ma ‘aua le tu‘uina i latou e ola.”
39Ma ‘ua alu Nikanora nai Ierusalema ma ‘ua tolauapi i Peteorana ma ‘ua ‘au‘aufa‘atasi ‘iā te ia le itūtau‘a o Suria,
40ma ‘ua tolauapi Iuta i Atasa ma tagata e to‘atolugaafe ma ‘ua tatalo Iuta ma ‘ua fai ane,
41“O ē ‘ua ‘auina e le tupu o Sanerivi, le Ali‘i e, ‘ona ‘ua latou fāifai ‘iā te oe, ‘ua alu ai le agelu ma ‘ua na fasia le selau afe ma afe e valu sefulu ma afe e lima o i latou. 2 Maka 15.22-24; 2 Tu 18.17-19; 17
42‘Ia fa‘apea ‘ona e tu‘imomomo lenei itūtau‘a i o matou luma i le aso nei ma ‘ia iloa e nisi uma ‘ua na ‘upuleagaina lau mea pa‘ia; ‘ia e fa‘amasino fo‘i ‘iā te ia e tusa ma lona loto leaga.”
43Ma ‘ua feosofi ‘au i le tau‘a i lona sefulu ma le tolu o aso o le masina o Atara ma ‘ua tu‘ipalaina le togālauapi o Nikanora ma ‘ua fasia muamua lava ia i le tau‘a. 2 Maka 15.25-36
44A ‘ua iloa e lana itūtau‘a ‘ua fasia Nikanora, ‘ua latou lafo ifo a latou ‘au‘upega ma ‘ua latou sōsōla;
45ma ‘ua tuliloaina e tagata Iutaia i latou e tusa ma le sāvaliga o le aso e tasi, e āfua mai i Atasa se‘ia o‘o atu i Kasara; ma ‘ua latou ili a latou pū vala‘au mulimuli atu ‘iā te i latou.
46Ma ‘ua ulufafo tagata nai ‘a‘ai felāta‘i uma lava o Iuta ma ‘ua sisi‘o ‘iā te i latou; ‘ona latou liliu lea o fa‘asaga atu le tasi i le tasi; ma ‘ua fasia i latou uma lava i le pelu, ma ‘ua lē tu‘ua se to‘atasi lava o i latou.
47Ma ‘ua latou maua o latou vete e fai ma latou, ma ‘ua latou vavae ‘ese le ulu o Nikanora ma lona lima taumatau sa na si‘itia ma le fa‘asausili ma ‘ua latou ‘aumaia ma ‘ua latou fa‘atautau i luma o Ierusalema.
48Ma ‘ua matuā fiafia tele le nu‘u ma ‘ua faia lea aso ma aso o le ‘oli‘oli tele.
49Ma ‘ua fa‘atonuina e fai lenā aso i tausaga uma lava, i lona sefulu ma le tolu o aso o le masina o Atara,
50ma ‘ua filemū le lau‘ele‘ele o Iuta i ni nai aso itiiti.
Who We AreWhat We EelieveWhat We Do
2025 by iamachristian.org,Inc All rights reserved.
