Iopu 19 - Revised Samoan Catholic Bible

O le Tali a IopuIopu

1‘Ona tali atu ai lea o Iopu, ‘ua fa‘apea atu,

2“Tou te fa‘atigāina ‘ea lo‘u loto,

ma ‘outou tu‘imomomoina a‘u i ‘upu se‘ia afea?

3‘Ua fa‘asefulu lava ‘ona ‘outou fa‘aleagaina o a‘u,

‘ua ‘outou le mamā ‘ona ‘outou taia mai o a‘u.

4‘Āfai fo‘i e moni ‘ua ‘ou sesē,

‘ua i ai pea ‘iā te a‘u lava lo‘u sesē.

5‘Āfai lava e moni tou te fa‘amaualuga mai ‘iā te a‘u,

ma ‘outou ta‘uta‘u mai ‘iā te a‘u mea e fai mo‘u luma.

6‘Ia ‘outou iloa lava; o le Atua ‘ua fa‘aliliuina a‘u,

‘ua na si‘omia fo‘i a‘u i lona ‘upega.

7Fa‘auta, ‘ou te ‘alaga atu ‘ona o le ‘sauā,’

a ‘ua lē fa‘afofogaina a‘u;

‘ou te uiō atu lava, ‘ae leai se fa‘amasinoga.

8‘Ua ia puipuia lo‘u ala, ‘ou te lē mafai ‘ona sopo‘ia atu lava,

‘ua ia tu‘uina fo‘i le pouliuli i o‘u magāala.

9‘Ua ia ‘ave‘eseina lo‘u mamalu ‘iā te a‘u,

‘ua ia tō ‘ese fo‘i le paleali‘i i lo‘u ulu.

10‘Ua ia fa‘aumatia a‘u i itū uma; o le a ‘ou alu atu i ai;

‘ua ia lia‘iina fo‘i lo‘u fa‘amoemoe e pei o le la‘au.

11‘Ua matuā to‘asā mai fo‘i o ia ‘iā te a‘u,

e peiseaī fo‘i ‘ua na faia a‘u mōna fili.

12‘Ua ō mai fa‘atasi ana ‘au ma latou tanu lo latou ala e tau ma a‘u,

ma latou tolauapi e si‘osi‘omia ai lo‘u fale ‘ie.

13“‘Ua ia fa‘amamaoina lava o‘u uso ‘iā te a‘u,

o ē na matou masani fo‘i ‘ua latou faia a‘u ma tagata ‘ese ‘iā te i latou.

14‘Ua tu‘ua a‘u e i latou matou te tuā‘oi,

‘ua fa‘agalogalo fo‘i ‘iā te a‘u e a‘u aumea mamae.

15O ē ‘ua āumau i lo‘u fale, ‘atoa ma a‘u ‘au‘auna fafine,

‘ua latou faia a‘u ma tagata ‘ese;

‘ua fai a‘u ma tagata ‘ese i o latou manatu.

16‘Ua ‘ou vala‘au i la‘u ‘au‘auna, a ‘ua lē tali mai o ia;

‘ua ‘ou ‘ai‘oi atu ‘iā te ia i lo‘u lava gutu.

17‘Ua ‘ino‘ino lo‘u lava ‘āiga ‘iā te a‘u,

‘ua ‘inosia fo‘i la‘u mānava e la‘u avā.

18‘Ua ‘ino‘ino mai lava tamaiti ‘iā te a‘u,

‘ua latou fai ‘upu leaga mai ‘iā te a‘u.

19‘Ua ‘inosia a‘u e a‘u aumea mamae uma;

o i latou fo‘i na a‘u alofa i ai ‘ua latou liliu ‘ese ‘iā te a‘u.

20‘Ua pipi‘i o‘u ivi i lo‘u pa‘u ma lo‘u ‘a‘ano,

‘ua ‘ou sao ma le pa‘u o o‘u nifo.

21Alofa mai ia ‘outou ‘iā te a‘u,

‘inā alofa mai ia ‘iā te a‘u ‘outou o a‘u uō;

auā ‘ua papa‘i mai le ‘a‘ao o le Atua ‘iā te a‘u.

22Se a ‘ea le mea tou te tulituliloa mai ai ‘iā te a‘u,

e pei o le Atua ma ‘ua ‘outou lē mā‘o‘ona i lo‘u tino?

23“E, fia tusia lava o a‘u ‘upu! e,

fia tusia ai i le tusi!

24‘Ia togitogiina i le peni u‘amea

ma le pulu u‘amea i le papa e fa‘avavau.

25Auā ‘ua ‘ou iloa, o lo‘o soifua lē na te togiolaina a‘u;

o aso amulī fo‘i e tula‘i mai ai o ia i luga o le ‘ele‘ele.

26E ui lava fo‘i ‘ina fa‘aumatia lenei tino pe a mavae atu lo‘u pa‘u,

‘ae ‘ou te iloa atu le Atua i lo‘u tino.

27‘Ou te iloa atu ‘iā te ia mo a‘u lava,

e va‘ai atu fo‘i o‘u mata ‘iā te ia,

‘ae lē o se tasi; pe a lē toe i ai o‘u mana‘o i totonu ‘iā te a‘u.

28Auā ‘ua tatau pe ‘ana ‘outou fai mai,

‘Se a le mea ‘ua tatou tuliloa atu ai ‘iā te ia?’

ma ‘O le mafua‘aga lava o lo‘o ‘iā te ia lava.’

29‘Ia ‘outou fefefe i le pelu;

auā o le ita, o le agasala lea e o‘o mai ai le pelu;

‘ina ‘ia iloa e ‘outou e fai le fa‘amasinoga.”