Sirako 44 - Revised Samoan Catholic Bible

O le Vi‘iga i Tupuga

1O lenei, ‘ia tatou fa‘alupe o tagata mamalu,

o ē fai ma o tatou tua‘ā talu mai anamua.

2‘Ua faia e le Ali‘i ni galuega ofoofogia ‘iā te i latou,

‘ua fa‘ailoa mai ai lona mamalu talu mai le amataga.

3O tupu sa pule i o latou mālō,

o ali‘i na ta‘uta‘ua i lo latou malosi,

o tagata ‘ua tūtūmu i le poto,

o fa‘amamalu ‘iā latou valo‘aga le igoa lelei o perofeta,

4o tu‘u atu i le nu‘u o poloa‘iga e tusa ma le mea sa tatau i o latou aso,

o fa‘asolo atu i tupulaga o ‘upu pa‘ia lava,

‘ona o le mautū o lo latou fa‘autauta.

5O ē popoto i fai pese,

‘ua fatu e i latou ni solo mālie ma ‘ua latou tusitusia.

6O tagata mau‘oloa i le amiotonu,

e fiafia i latou i tu lelei, o tausi i le fealofani i o latou ‘āiga.

7O i latou uma ia na fa‘amamaluina e tupulaga o lo latou nu‘u,

na vi‘ia uma i latou i o latou lava aso.

8O ē na fānau mai ‘iā te i latou,

‘ua latou tu‘ua mai se igoa

‘ua mafai ‘ona talaina mai ai o latou vi‘iga.

9‘Ua i ai ma ni isi ‘ua lē toe manatua lava,

‘ua mavae atu i latou e peiseaī ‘ua le‘i ola lava i latou;

‘ua ‘avea e pei o ni tagata e le‘i fānau mai lava

ma ‘ua fa‘apea fo‘i a latou fānau.

10O ē ‘ua ‘ou mua‘i ta‘uatua, o tagata amio Atua i latou,

‘ua lē galoina a latou amio pa‘ia,

11e fa‘amausalīina le manuia i o latou gafa.

12O le tofi pa‘ia la latou lava fānau,

e fa‘amaoni lo latou gafa i le feagaiga.

13E tumau la latou fānau ‘ona o i latou,

e o‘o i le fa‘avavau, e lē mavae atu lava lo latou gafa ma lo latou mamalu.

14‘Ua teuina o latou tino ma le fīfīmalie,

e ola lo latou igoa i tupulaga uma lava.

15‘Ua talaina e nu‘u lo latou poto,

e tala‘iina lo latou vi‘iga e le fa‘apotopotoga.

O Enoka

16‘Ua finagalo malie le Atua ‘iā Enoka ma ‘ua si‘itia ai o ia i le parataiso,

‘ina ‘ia fa‘atupu ai i nu‘u le loto salamō. O Noa

17Na maua o Noa, o lelei a‘ia‘i o ia ma le amiotonu;

o aso o le to‘asā na ‘avea ai o ia ma puluvaga.

18O le mea lea na tu‘ua ai se toe i le lalolagi ‘ina ‘ua o‘o mai le lolo.

19Na osia ma ia le feagaiga e fa‘avavau, ‘ia ‘aua le toe fa‘aumatia i le lolo o mea ola uma. O Aperaamo

20O Aperaamo, o le tupuga mamalu ia o nu‘u e tele ma ‘ua lē maua se tasi la te tutusa ma ia i le mamalu;

‘ua tausia e ia le tulafono a le Silisili‘ese ma ‘ua osi feagaiga ma ia.

21‘Ua na fa‘amausalī le feagaiga i lona lava tino, ma ‘ua maua o ia o fa‘amaoni i le tofotofoga.

22O le mea lea na tautō ai le Atua e fa‘amamalu ‘iā te ia i lona lava gafa;

e fa‘ato‘ateleina i latou e pei o le efuefu o le fogā‘ele‘ele.

23E fa‘aeaina lava lana fānau e pei o fetū o le lagi,

e fai lo latou tofi e pau mai i le tasi sami e o‘o atu i le tasi sami;

e pau mai le vaitafe e o‘o atu i tulu‘iga o le lalolagi. O Isaako ma Iakopo

24‘Ua fa‘apea fo‘i ‘ona ia faia ‘iā Isaako, ‘ona o Aperaamo lona tamā.

25‘Ua foa‘i mai ‘iā te ia e le Ali‘i le fa‘amanuiaga o nu‘u uma

ma ‘ua na fa‘amausalī lana feagaiga i luga o le ulu o Iakopo.

26‘Ua na fa‘ailogaina o ia i ana fa‘amanuiaga,

‘ua foa‘iina ‘iā te ia le tofi ma ‘ua na vaevaeina mo ia,

i ona itū‘āiga e sefulu ma le lua;

27ma ‘ua tutupu mai ai ‘iā te ia o tagata agaalofa,

na ta‘uleleia i latou e tagata uma lava.