1Le leoleo o Isaraelu e,
‘ia e fa‘afofoga mai,
o oe o lē ta‘ita‘i ‘iā Iosefa e pei o se lafu mamoe,
o oe lē ti‘eti‘e i le vā o kerupi,
‘ia e fa‘aali mai lou pupula.
2‘Ia e fa‘aoso lou malosi i luma o Efaraima, ma Peniamina ma Manase,
ma e afio mai e fa‘aola ‘iā te i matou.
3Le Atua e,
‘ia e fa‘afoisia i matou,
ma ‘ia malamalama mai ou fofoga;
‘ona fa‘aolaina ai lea o i matou.
4Le ALI‘I e, le Atua o ‘au,
e pusa mai lou to‘asā i le tatalo a lou nu‘u se‘ia afea?
5‘Ua e fafagaina i latou i loimata e fai ma mea e ‘ai,
o loimata fo‘i e tele ‘ua e avane ‘iā te i latou e inu ai.
6‘Ua e faia i matou ma mea e femisa‘i ai ē ‘ua matou tuā‘oi;
‘ua tauemu mai fo‘i ‘iā te i matou o ē ita mai ‘iā i matou.
7Le Atua o ‘au e,
‘ia e toe fa‘afoisia i matou,
ma ‘ia malamalama mai ou fofoga;
‘ona fa‘aolaina ai lea o i matou.
8Na e ‘aumaia le vine nai Aikupito;
na e tulia nu‘u ‘ese ma e totōina ai.
9Na e teuteua le lau‘ele‘ele mo lea vine,
na e fa‘asosoloina fo‘i ona a‘a, ‘ua tumu ai le nu‘u.
10‘Ua malu‘ia mauga i lona paolo,
o ‘ona la fo‘i e pei o arasi silisili.
11‘Ua ia fa‘asosolo atu ona lava la e o‘o atu i le sami,
o ona tātupu fo‘i e o‘o atu i le vaitafe.
12Se a le mea e sōloia ai ona pā,
‘ina ‘ia tau ona fua e i latou uma o ē ui ane i le ala?
13‘Ua fa‘atauma‘oi ai e le pua‘a mai le vao,
o manu fo‘i e tata‘a latou te ‘a‘ai ai.
14Le Atua o ‘au e, ‘ia e toe fo‘i mai lava;
‘ia e silasila mai mai le lagi,
ma e silafia ma ‘ia e asiasi i lenei vine.
15O le pogai lava na totōina e lou ‘a‘ao taumatau,
o le atali‘i fo‘i na e fa‘amalosia mo oe.
16‘Ua susunuina i le afi, ‘ua tu‘u i lalo;
e fano i latou i le a‘oa‘iga mai ou fofoga.
17‘Ia fa‘ae‘e lou ‘a‘ao i luga o le tagata o lou ‘a‘ao taumatau,
o le atali‘i o le tagata na e fa‘amalosia mo oe.
18Matou te lē tu‘umuli ‘iā te oe;
‘ia e fa‘aola mai ‘iā te i matou,
‘ona matou vala‘au atu ai lea i lou suafa.
19Le ALI‘I e, le Atua o ‘au,
‘ia e fa‘afoisia i matou;
‘ia malamalama mai ou fofoga;
‘ona fa‘aolaina ai lea o i matou.
Who We AreWhat We EelieveWhat We Do
2025 by iamachristian.org,Inc All rights reserved.
