Isaia 26 - Revised Samoan Catholic Bible

O le Pese o le Manumālō o Iuta

1O lea aso e pese ai lenei pese i le lau‘ele‘ele o Iuta:

‘Ua ‘iā te i tatou le ‘a‘ai malosi;

o le fa‘aolataga na te faia lea ma pā ma ‘olo.

2‘Inā tō mai ia e ‘outou o puipui,

‘ina ‘ia ulufale mai ai le nu‘u amiotonu

o ē tausi le mea moni.

3‘E te leoleoina ‘ia fīfīlemū lava lē ‘ua mausalī lona loto;

auā ‘ua ia fa‘atuatua ‘iā te oe.

4‘Inā fa‘atuatua ia ‘outou i le ALI‘I e fa‘avavau lava;

auā o le ALI‘I, o le papa e fa‘avavau ia.

5Auā ‘ua ia lafotūina i lalo ē sa nonofo i le mea maualuga;

o le ‘a‘ai sa maualuga ‘ua fa‘amaulaloina e ia.

‘Ua fa‘amaulaloina ‘ua o‘o i le ‘ele‘ele,

‘ua fa‘agatasia ma le efuefu.

6E solia ia e vae, o vae lava o ē tigāina,

o vae fo‘i o ē matitiva.

7‘Ua laugatasi le ala o lē ‘ua amiotonu;

o oe na lē amiotonu,

‘ua e fa‘alauleleiina le ala o lē ‘ua amiotonu.

8E moni, le ALI‘I e,

‘ua matou fa‘atalitali ‘iā te oe i le ala o au fa‘amasinoga.

O le mana‘o o matou loto o lo‘o i ai lea i lou suafa

ma le fa‘amanatuga ‘iā te oe.

9‘Ua mana‘o lo‘u loto ‘iā te oe i le po;

e moni, e ala sā‘ili ‘iā te oe lo‘u agaga i totonu ‘iā te a‘u.

Auā e a‘oa‘oina ē o nonofo i le atu laulau,

pe a faia au fa‘amasinoga i le lalolagi.

10E alofagia lē ‘ua amio leaga,

‘ae lē a‘oa‘o lava o ia i le amiotonu.

O le nu‘u o i ai le amiotonu e agafa‘api‘opi‘o ai o ia,

nā te lē manatua fo‘i le mamalu o le ALI‘I.

11Le ALI‘I e, e si‘itia lou ‘a‘ao,

‘ae latou te lē va‘ava‘ai; latou te va‘ava‘ai lava.

E fa‘amāina fo‘i i latou; o le mā‘elegā ‘ona o lou nu‘u,

e moni, o le afi ‘ona o ē ‘ua ita ‘iā te oe e fa‘aumatia ai i latou.

12Le ALI‘I e,

‘e te tu‘uina mai le manuia ‘iā te i matou;

auā fo‘i ‘ua e faia mo i matou a matou galuega uma.

13Le ALI‘I e, lo matou Atua,

sa pule ‘iā te i matou nisi ali‘i e lē na o oe;

‘ua na o oe lava matou te vivi‘i atu ai i lou suafa.

14‘Ua oti i latou, latou te lē toe ola;

o agaga i latou, latou te lē toe tutū.

Auā ‘ua e fa‘asalaina, ma fa‘aumatia i latou,

‘ua e fa‘agaloina lava le manatu uma ‘iā i latou.

15‘Ua e fa‘ato‘ateleina le nu‘u,

le ALI‘I e, ‘ua e fa‘ato‘ateleina le nu‘u;

‘ua vi‘ia lava oe; ‘ua e fa‘amamaoina tuā‘oi uma o le nu‘u.

16Le ALI‘I e, na latou sā‘ili‘ili ‘iā te oe i lo latou puapuagā,

na latou fa‘apa‘ūina atu le tatalo

‘ona o lau a‘oa‘iga sa ‘iā te i latou.

17E pei o le fafine tō ‘ua latalata ‘ona fānau,

‘ua tigā ia ma uiō i lona fa‘atigā;

le ALI‘I e, sa fa‘apea lava i matou i ou luma.

18Sa totō i matou,

sa fa‘atigā, e peiseaī na matou fānau mai le savili.

E le‘i faia e i matou se fa‘aolataga i le lalolagi,

o le‘i pa‘u‘ū fo‘i ē o nonofo i le atu laulau.

19E toe ola mai ou tagata oti,

o latou tino oti e toe tutū mai.

‘Inā ala mai ia ma ‘alalaga fiafia ‘outou ē o nonofo i le efuefu;

auā o lou sau e pei o le sau o le vao iti ia;

e lafo atu fo‘i e le ‘ele‘ele ē ‘ua oti.

O le Fa‘amasinoga ma le Toe Fa‘afouga

20‘Inā ō mai ia, lo‘u nu‘u e;

‘inā ulu atu ia i o ‘outou afeafe

ma pupuni o ‘outou faitoto‘a.

‘Ia ‘outou lalafi e pei se ‘emo ‘ona pu‘upu‘u,

se‘ia mavae atu le to‘asā.

21Auā fa‘auta, o lo‘o afio mai le ALI‘I a‘i le mea o afio ai o ia,

‘ina ‘ia fa‘asalaina o ē o nonofo i le lalolagi

‘ona o a latou amio leaga.

E fa‘aalia fo‘i e le ‘ele‘ele lana toto,

na te lē toe ufitia fo‘i lana fasi.