1 Timoteo Fa‘atomuaga - Revised Samoan Catholic Bible

Fa‘atomuagaO Timoteo (Timotheos i le gagana Eleni), o le so‘o a Paulo i le galuega tala‘i. O lona tinā o le fafine Iutaia a o lona tamā o se tagata Eleni. Talu ai ‘ona o ia o le tagata Iutaia o lea sa fa‘atonuina ai e Paulo o ia ‘ina ‘ia peritomeina, auā le vā feagai ai ma tagata Iutaia.(Galu 16.1-3) Sa tofia e Paulo ‘ia Timoteo na te tausia le Ekalesia o Efeso (1.3) a o i ai pea le fa‘amoemoe a Paulo na te asiasi atu ‘iā te ia i se taimi o i luma.O nisi o vaega tāua o lenei tusi, o apoapoa‘iga a Paulo ‘iā Timoteo ‘ia loto tele ma taumafai e tete‘e atu i a‘oa‘oga sesē o lo‘o fa‘asagatau mai i a‘oa‘oga moni, lea ‘ua salalau i totonu o Efeso. (1.3-20; 6.3-16) Sa fautuaina fo‘i e Paulo Timoteo, ‘ina ‘ia filifilia ni isi o tagata Efeso, lo‘o ola i le fa‘atuatuaga moni ma amio Kerisiano e fai ma ‘ona fesoasoani. (3.1-13) ‘Ia ma sa tima‘i malosi pea le ‘aposetolo ‘iā Timoteo ‘ia ‘avea pea o ia ma ‘au‘auna lelei a Iesu Keriso, e ala lea i amioga lelei o lona olaga. (2.1-15)O le manatu a le ‘au popoto i le ‘upu a le Atua, o le tusi lenei sa tusia i le tausaga 65, i le vaitaimi lava o le Ali‘i. (Anno Domini)O le Fa‘asologa o Matā‘upu:O le ‘upu fa‘afeiloa‘i 1.1-2O fa‘atonuga e uiga i matā‘upu i le Ekalesia i Efeso 1.3—3.16O fautuaga ‘iā Timoteo e uiga ma lana galuega 4.1—6.21