Isaia 27 - Revised Samoan Catholic Bible

O le Fa‘aolataga o Isaraelu

1O lea aso e fa‘asalaina ai e le ALI‘I o leviatana, o le gata tele vave, o leviatana lava, o le gata ta‘ata‘ai, e fa‘asalaina lava i lana pelu ma‘a‘a, ma le tele ma le malosi; e fasimatea lava e ia le tanimo o lo‘o i le vai.

2O lea aso:

‘Ia ‘outou pepese ai i le tōvine.

3O a‘u o le ALI‘I, ‘ou te leoleo i ai;

‘ou te fa‘asūsū pea lava i ai.

‘Ou te leoleo lava i ai i le po ma le ao,

ne‘i o‘o i ai se leaga.

4‘Ou te lē ita lava a‘u;

tā fia maua la‘au tuitui ma la‘au talatala i le tau‘a;

‘ou te alu atu ‘iā te i latou,

‘ou te susunu fa‘atasi lava i latou.

5Pe se‘i tago o ia i lo‘u malosi,

‘ia mā lelei ma ia,

e lelei fo‘i o ia ma a‘u.

6O ona po amulī e sosolo ai a‘a o Iakopo;

e fuga mai ma mātala o Isaraelu,

‘ona tumu ai lea o le fogā‘ele‘ele uma i ona fua.

7‘Ua na taia ‘ea o ia, e pei ‘ona taia e ia o i latou na taia o ia?

Po ‘ua fasia o ia, e pei o le fasi na fasia ai e ia?

8Na e finau fa‘atatau ma ia ‘ina ‘ua tulia o ia;

na ia ‘avea o ia i lona matagi tetele i le aso na agi mai ai le matagi mai sasa‘e.

9O le mea lea e fa‘amāgaloina ai le agasala a Iakopo i lea mea;

o ona i‘uga uma fo‘i ia, ‘ina ‘ia fa‘ate‘a‘eseina ai lana agasala.

Pe a faia e ia o ma‘a uma o le fatafaitaulaga

ia pei o ma‘a panisina ‘ua nutilili‘ia;

e lē toe tutū i luga o tupua o Asaira ma tupua o le la.

11Pe a mamago ‘ona la la‘au,

‘ona gaui‘eseina ai lea.

E ō mai fafine latou te susunuina;

auā e lē se nu‘u mafaufau lea;

o le mea lea e lē alofagia ai i latou e lē na faia i latou,

o ia fo‘i na faia i latou na te lē alofa lava ‘iā te i latou.

12O lea lava aso e sasa ifo ai e le ALI‘I ona fua, e āfua i le mea e tafe ai le vaitafe, e o‘o atu i le alia o Aikupito; e fa‘apotopotoina fo‘i ‘outou e ta‘ito‘atasi, o ‘outou le fānauga a Isaraelu.

13O le aso fo‘i lea e ili ai le pū latele, ‘ona ō mai ai lea o i latou na fai a fano i le nu‘u o Asuria, ‘atoa fo‘i ma ē na ‘aunu‘ua i le nu‘u o Aikupito, latou te ifo i le ALI‘I i le mauga pa‘ia i Ierusalema.