1 Tupu 5 - Revised Samoan Catholic Bible

O le Feagaiga na Osia e Solomona ma Hiramo(2 No 2.1-18)

1‘Ua ‘a‘auina atu e Hiramo le tupu o Turo o ana ‘au‘auna ‘iā Solomona; auā na ia fa‘alogo ‘ua latou fa‘au‘uina o ia e fai ma tupu e sui a‘i lona tamā; auā sa alofa Hiramo ‘iā Tavita i ona aso uma.2 Samu 5.11; 2 No 2.3

2‘Ua alu fo‘i le fe‘au a Solomona ‘iā Hiramo, ‘ua fa‘apea atu,

3“‘Ua e silafia na lē mafaia e lo‘u tamā o Tavita ‘ona fai o se fale i le suafa o le ALI‘I lona Atua, ‘ona o tau‘a na si‘osi‘oina ai o ia, ‘ina se‘ia tu‘uina ifo i latou e le ALI‘I i lalo i ona alofivae.1 No 22.8; 28.3; 2 No 2.3-16

4A o lenei, ‘ua foa‘iina mai ‘iā te a‘u e le ALI‘I lo‘u Atua le filemū i itū uma, ‘ua leai sē ‘ua ita mai, po o se leaga ‘ua tupu.1 Tu 4.24; 1 No 22.9

5Fa‘auta, ‘ou te manatu e fai se fale i le suafa o le ALI‘I lo‘u Atua, e fa‘apei ‘ona fetalai mai le ALI‘I i lo‘u tamā o Tavita, ‘ua fa‘apea mai, ‘O lou atali‘i, ‘ou te fa‘anofoina i lou nofoāli‘i e fai mou sui, o ia na te faia le fale i lo‘u igoa.’2 Samu 7.12-13; 1 No 17.11-12

6O lenei, ‘ia e fetalai atu, ‘ia latou taia mai ma a‘u o arasi mai Lepanona; e fa‘atasi fo‘i a‘u ‘au‘auna ma au ‘au‘auna; ‘ou te avatu fo‘i ‘iā te oe le totogi mo au ‘au‘auna, e tusa ma mea uma ‘e te fetalai mai ai; auā ‘ua e silafia ‘ua lē o ‘iā te i matou se tagata ‘ua iloa ta la‘au e pei o tagata o Saitonu.”

7‘Ua fa‘alogo Hiramo i ‘upu a Solomona, ‘ona fiafia tele ai lea o ia, ‘ua fa‘apea fo‘i o ia, “‘Ua fa‘afetai i le ALI‘I i le aso nei, o lē ‘ua avatua ‘iā Tavita lona atali‘i poto na te pule i lenā nu‘u tele.”

8‘Ona sau lea o le fe‘au a Hiramo ‘iā Solomona, ‘ua fa‘apea mai, “‘Ua ‘ou fa‘alogo i mea na sau ai lau fe‘au ‘iā te a‘u; ‘ou te faia mea uma ‘ua e finagalo i ai i la‘au o arasi ma la‘au o perosi.

9E ‘ave ifo ai e a‘u ‘au‘auna a‘i Lepanona i le sami; ‘ou te faia fo‘i ma va‘a la‘au, ma momoli i le sami i le mea ‘e te fetalai mai ai ‘iā te a‘u ma ‘ou fai atu ‘ia tatalaina i lea mea, ‘e te ‘ava‘e ai. ‘E te faia fo‘i le mea ‘ou te mana‘o i ai ‘ia ‘aumai mea e ‘ai ma lo‘u ‘āiga.”Esera 3.7; Galu 12.20

10‘Ona ‘ave ai lea e Hiramo ‘iā Solomona o la‘au o arasi ma la‘au o perosi, o mea uma na ia mana‘o i ai.

11‘Ua avatu fo‘i e Solomona ‘iā Hiramo o saito e lua sefulu o afe o kori e fai ma mea e ‘ai mā lona ‘āiga; ma suāu‘u e tu‘ia o kori e luafulu; ‘ua fa‘apea ‘ona avatu e Solomona ‘iā Hiramo i lea tausaga ma lea tausaga.

12‘Ua foa‘iina mai fo‘i e le ALI‘I o le poto ‘iā Solomona, e pei ‘ona ia fetalai mai ‘iā te ia; ‘ua la nofo lelei o Hiramo ma Solomona, ‘ua la osia fo‘i la la feagaiga.

13‘Ua togia tagata e le tupu o Solomona mai ‘iā Isaraelu uma; o ē na togia fo‘i e tolu sefulu o afe o tagata.

14‘Ua ia ‘a‘auina atu i latou i Lepanona e auaua‘i, o le masina ma le sefulu o afe; o le masina e tasi sa i ai i latou i Lepanona, a o masina e lua sa i ai i o latou ‘āiga; ‘ua pule fo‘i Atoniramo i ē na togia.1 Tu 12.18

15Sa ‘iā Solomona fo‘i o ē ‘ave avega e fitu sefulu o afe ma le valu sefulu o afe o ē tala‘i i le mauga;1 Tu 9.20-22; 2 No 2.18

16‘atoa fo‘i ma ali‘i sili o ē na tofia e pule e Solomona, o ē na pule i le galuega e tolu afe ma le tolu o selau i latou; na pule i latou i le nu‘u na faia le galuega.

17‘Ua poloa‘i atu le tupu, ‘ona latou ‘aumai ai lea o ma‘a tetele, o ma‘a silisili, e fai ma fa‘avae o le fale; o ma‘a ‘ua talai.1 Tu 6.7; 1 No 22.2

18‘Ua talai fo‘i e tufuga a Solomona ma tufuga a Hiramo, ‘atoa ma tagata o Kavali, ‘ua latou saunia la‘au ma ma‘a e fai a‘i le fale.