Iopu 4 - Revised Samoan Catholic Bible

Talanoaga Muamua(4.1—14.22)Elifasa

1‘Ona tali mai ai lea o Elifasa le Timanu,

‘ua fa‘apea mai,

2“A taumafai atu se ‘upu ‘iā te oe, pe ‘e te tigā ai ‘ea?

A o ai sē na te mafaia ‘ona tāofi lana ‘upu?

3Fa‘auta mai, na e apoapoa‘i atu i tagata e to‘atele,

na e fa‘amalosia lima vaivai.

4O au ‘upu sa fa‘amautūina ai lē sa tautevateva,

sa e fa‘amalosia fo‘i tulivae sa vaivai.

5A o lenei, ‘ua o‘o mai ‘iā te oe, ‘ua e fa‘avaivai ai;

‘ua papa‘i mai ‘iā te oe, ‘ua e atuatuvale ai.

6O lou fa‘atuatuaga, o lou fa‘amoemoega ma le tonu o ou ala,

e lē o lou mata‘u ‘ea lea i le Atua?

7“Se‘i e manatu, po o ai ‘ea ‘ua fano fua ‘ae lē sala?

po o fea fo‘i ‘ua fa‘aumatia ai ē ‘ua amiotonu?

8O la‘u va‘ai lea, o ē ‘ua suatia le agasala, ma lūlūina le amio leaga,

latou te selesele mai ai lava.

9E fano i latou i le mapugatama‘i o le Atua,

e fa‘aumatia fo‘i i latou i le mānava o ona pogaiisu.

10O le tagi o le leona ma le leo o le leona,

ma nifo o leona ta‘anoa, ‘ua gāugau lava ia.

11‘Ua fano le leona, auā e leai sana mea o saeia,

e fa‘ata‘ape‘apeina fo‘i le toloa‘i a le leona fafine.

12“‘Ua fa‘ao‘o mai fa‘alilolilo se ‘upu ‘iā te a‘u;

‘ua lagona ai fo‘i o‘u taliga nai mea itiiti.

13O mafaufauga i mea e va‘aia i le po,

‘ina o moe gagase tagata;

14‘ua o‘o mai ai ‘iā te a‘u le mata‘u ma le gatete,

na tetemū ai o‘u ivi uma.

15Na ui ane i o‘u luma le agaga,

‘ua mātatili ai lo‘u tino.

16Na tu mai o ia, a ‘ou te le‘i iloa le uiga o lona tino mai;

sa i ai le ata i luma o o‘u mata,

sa ligoligo, ‘ona ‘ou fa‘alogo ai lea i le leo.

17‘Pe sili ‘ea le amiotonu a le tagata i lo le Atua?

pe sili ‘ea le lelei o le tagata i lē na faia o ia?

18Fa‘auta, ‘ua lē fa‘alagolago o ia i ana ‘au‘auna;

‘ua ia ta‘uvaleleaina ana agelu.

19E atili ai ‘ona fa‘apea i ē o nonofo i fale ‘omea,

o i ai lo latou fa‘avae i le ‘ele‘ele,

‘ua tu‘imomomoina i latou e pei o le pepe.

20E tu‘imomomoina i latou e āfua i le taeao e o‘o i le afiafi,

‘ua fano i latou e fa‘avavau ‘ua leai fo‘i se tasi e manatuaina i latou.

21‘Ua lē ‘avea ‘ea lo latou fa‘asilisili sa ‘iā te i latou?

‘Ua oti, valelea i latou.’