Sirako 40 - Revised Samoan Catholic Bible

O Itū Lelei ma Itū Leaga o le Ola o le Tagata i le Lalolagi

1‘Ua tu‘uina mai se tigā tele i tagata uma ma le avega mamafa i le fānau a Atamu,

e āfua mai i le aso ‘ua latou ulufafo ai i le manava o lo latou tinā,

se‘ia o‘o i le aso e tanumia ai i totonu o le tinā faitele.

2O o latou manatu, o le atuatuvale o le loto,

o le mafaufau e su‘esu‘e i ai, o le aso e i‘u ai i latou.

3E amata mai i lē ti‘eti‘e i le nofoāli‘i mamalu,

e o‘o atu i lē fa‘amaulaloina i le ‘ele‘ele ma le lefulefu.

4E amata mai i lē ‘ofu i le ‘ie pāuli, e o‘o atu i lē ufitia i le ‘ie lino talatala,

o le loto tigā, o le matau‘a, le atuatuvale, o le fa‘alotolotolua

ma le mata‘u i le oti, o le ita fa‘asulusulu ma femisa‘iga.

5O le itū aso e fa‘amālōlō ai o ia i le afeafe,

e liua ona manatu i lana moe i le po.

6E mālōlō i sina itūpō fa‘atauva‘a, e pei lava e lē leai,

‘ona fai lea o lana miti e peiseaī o lona aso e leoleo ai.

7E atuatuvale o ia i mea e va‘ai atu ai i lona loto;

e pei o sē ‘ua sola i le aso o le tau‘a; o le itū aso e sao ai,

‘ua ala ai o ia ma ‘ua ofo i lona fefevale.

8E fa‘apea o ē uma e ola, e amata mai i le tagata e o‘o i le manu,

‘ae sili a‘e fa‘afitu mo tagata agasala.

9E fa‘aopoopo i ai ma le oti, le toto masa‘a, o misa, o le pelu,

o fa‘asauāga, o le oge, le olopalaina, ma mea tigā.

10O mea uma ia na faia mo tagata agasala;

na faia fo‘i le lolo ‘ona o i latou.

11O mea uma ‘ua mai le ‘ele‘ele e toe fo‘i atu i le ‘ele‘ele,

e pei o vai uma lava e toe fo‘i atu i le sami.

12O taui uma ma ‘oloa uma o le amioletonu e fa‘aumatia,

a o le fa‘amaoni e tumau lava ia e fa‘avavau.

13O ‘oloa a tagata agasala e fa‘aumatia e pei ‘ona mate le vaitafe,

e pei o le ta‘alili tele o le faititili i timuga.

14E ‘oli‘oli lē ‘ua na iloa fa‘amafola ona lima,

a o ē solitulafono e i‘u ‘ina olopalaina lava i latou.

15E lē fa‘ateleina o latou lā e fānau a ē agasala,

a o a‘a ‘ele‘elea e ta‘alili i luga o le papa mato.

16O lauvao e tutupu i luga o vai po o ‘auvai o le vaitafe,

e muamua i isi vao uma ‘ona lia‘iina.

17O le agalelei ‘ua pei o se parataiso o fa‘amanuiaga,

a o le agaalofa e tumau ia i le fa‘avavau. O Fiafiaga o le Olaga o le Tagata

18E suamalie le olaga o le tagata faigaluega ‘ua lavā tausi o ia ‘iā te ia;

‘e te maua ai lava se tu‘ugā‘oloa.

19O le fānau ma le fa‘atū o se ‘a‘ai, e fa‘amausalīina a‘i le igoa o le tagata,

‘ae sili ‘ona taulia le fafine amio mamā i luga o mea ia.

20O le uaina ma le siva e fa‘afiafia ai le loto;

‘ae sili a‘e ai i mea ia e lua le sā‘iliga o le poto.

21O le fagufagu ma le kitara e maua ai se fati malie,

‘ae sili i mea ia e lua le laulaufaiva agamalū.

22E naunau ou mata i le lālelei ma le matagofie,

‘ae sili lava i mea ia e lua le lanulau‘ava o le laufanua.

23E feiloa‘i i nisi itū aso le uō ma lē masani;

‘ae sili a‘e ‘iā i lā‘ua le tane ma lana avā.

24O le ‘au uso ‘ua ‘avea ma fesoasoani i aso o le puapuagā;

‘ae sili i ai le agaalofa na te lavea‘i i le tagata.

25O le auro ma le ario e fa‘amausalīina ai o vae,

‘ae sili i mea ia e lua le fa‘atonuga lelei.

26O le ‘oloa ma le tino malosi e fa‘aea a‘i le loto;

‘ae sili i mea ia e lua le mata‘u i le Ali‘i.

27E lē mativa i se mea lē ‘ua mata‘u i le Ali‘i,

e lē aogā fo‘i ‘iā te ia ‘ona sā‘ili i se fesoasoani mai.

28O le mata‘u i le Ali‘i ‘ua pei o se fa‘ato‘aga o fa‘amanuiaga,

e fa‘a‘ofuina lava ia i se mamalu e sili i mamalu uma. E Matagā le Ola ‘Aisi

29Lo‘u atali‘i e,

o aso a e ola ai, ‘aua ‘e te ‘aisi,

auā e lelei le oti ‘ae leaga le ‘aisi.

30O le tagata e fa‘asisila i le la‘o‘ai a le tasi,

e lē taulia o se ola lona olaga,

auā ‘ua na fafaga lona ola i mea e ‘ai a tagata ‘ese.

31A o le tagata a‘oa‘oina ma le poto e ‘alo ‘ese ai lava o ia.

32E suamalie le ‘aisi i le gutu o le tagata lē fa‘autauta,

a ‘ua mū le afi i ona tōtōga.