Salāmo 146 - Revised Samoan Catholic Bible

‘Ia Fa‘atuatua i le Atua na te Fesoasoani Mai

1‘Ia ‘outou vivi‘i atu i le ALI‘I.

Lo‘u agaga e, ‘ia e vivi‘i atu i le ALI‘I.

2‘Ou te vivi‘i atu i le ALI‘I a o ‘ou ola;

‘ou te fai pesega i lo‘u Atua a o ‘ou tumau i le ola nei.

3‘Aua tou te fa‘atuatua i ali‘i,

po o le fānau a tagata, e lē o i ai se olataga.

4E alu ‘ese lona agaga, e fo‘i atu i le ‘ele‘ele na i ai o ia;

e fa‘aumatia i lea lava aso ‘ona mānatunatu.

5‘Amu‘ia le tagata o i ai le Atua o Iakopo e fai mōna fesoasoani;

o i ai lona fa‘amoemoe i le ALI‘I lona Atua;

6o lē na faia le lagi ‘atoa ma le lalolagi,

o le sami ma mea uma o i ai;

o lē na te tausia le fa‘amaoni e fa‘avavau.

7O lē na te faia le fa‘amasinoga mo ē o sauāina;

na te avatua le mea e ‘ai i ē o fia ‘a‘ai;

e tatala e le ALI‘I i ē ‘ua noanoatia.

8E fa‘afepulafi e le ALI‘I ē ‘ua tauaso;

e fa‘atutusa‘oina e le ALI‘I ē ‘ua fa‘ano‘uno‘u;

e alofa le ALI‘I i ē amiotonu.

9O le ALI‘I na te tausia tagata ‘ese;

e fai ma lagolago mo lē ‘ua aumatuā

ma le fafine ‘ua oti lana tane;

a o le ala o ē ‘ua amio leaga e fa‘api‘opi‘oina e ia.

10E pule le ALI‘I e fa‘avavau lava;

Siona e, e pule lou Atua e au tupulaga.

‘Ia ‘outou vivi‘i atu i le ALI‘I.