Ioelu 2 - Revised Samoan Catholic Bible

E Faigatā le To‘asā o le Atua

1‘Ia ‘outou ilia le pū i Siona, ‘ia ta‘alili i lo‘u mauga pa‘ia,

‘ia tetemū i latou uma o ē nonofo i le nu‘u;

auā o le a o‘o mai le aso o le ALI‘I, auā ‘ua latalata mai.

2O le aso pouliuli ma le pogisā,

o le aso malumalu ma le pogisā lava,

e pei o le malamalama o le taeao ‘ona sosolo i mauga.

O le nu‘u tele ma le malolosi, e leai sona tusa mai vavau;

a mavae ia e lē toe fa‘apea lava i lea tupulaga ma lea tupulaga.

3O lo‘o i o latou luma le afi e fano ai,

o lo‘o i o latou tua fo‘i le afi mumū;

o le fanua i o latou luma e pei o le fa‘ato‘aga i Etena ia,

a o latou tua, ‘ua fa‘alalaoina ia;

e leai lava se mea e sao ‘iā te i latou.

4E tino mai i latou e fa‘apei ‘ona tino mai o solofanua;

pei o ē ti‘eti‘e i solofanua,

e fa‘apea lava ‘ona latou taufetuli.

5Latou te taufaioso, e pei o le ta‘alili o kariota i tumutumu mauga,

e pei o le ta‘alili o le mū o le afi e susunuina ai tagutugutu o saito,

e pei o le nu‘u malosi ‘ua pae tau.

6E gatete tagata i luma ‘iā te i latou,

e sesega mata o tagata uma.

7Latou te taufetuli e pei o tagata totoa;

latou te tausili i le ‘aupā e pei o tagata tau;

latou te sāvavali ta‘itasi i lona ala,

latou te lē ‘alo fo‘i ai le mea e ui ai i latou.

8E le tulei le tasi i le tasi;

latou te sāvavali ta‘itasi i lona ala;

a latou pa‘u‘ū fo‘i i tao e le manunu‘a ai.

9Latou te tamomo‘e i le ‘a‘ai;

latou te taufetuli fo‘i i le ‘aupā;

latou te fea‘e‘ei i fale;

latou te ulufale atu i fa‘amalama e pei o se gaoi.

10E tetemū le lalolagi i o latou luma; e lūlūina le lagi;

e pouliuli le lā ma le masina,

o fetū fo‘i e lē toe fepulafi mai.

11O le ALI‘I fo‘i na te tulei mai lona si‘ufofoga i ana ‘au;

auā e matuā tele lava lana itūtau‘a;

auā e malosi o ia le na te fa‘ataunu‘uina lana afioga.

Auā e mamafa le aso o le ALI‘I, e matuā mata‘utia.

Po o ai sē na te mafaia ‘ona talia?

O le Vala‘au ‘ina ‘ia Salamō

12O lenei, ‘ua fa‘apea mai le ALI‘I:

‘Ia ‘outou toe fo‘i mai ‘iā te a‘u ma o ‘outou loto ‘atoa,

ma le anapogi ma le fētāgisi ma le tagiauē.

13‘Ia ‘outou saeia o ‘outou loto, ‘ae lē o ‘outou ‘ofu,

ma toe fo‘i mai i le ALI‘I lo ‘outou Atua

auā e alofa fua ma alofa mutimutivale o ia,

e telegese lona to‘asā ‘ua tele fo‘i lona alofa,

e salamō ia ‘ona o le leaga.

14Po o ai se tasi ‘ua iloa,

pe toe fo‘i mai o ia, ma salamō ma tu‘uina mai le manuia pe a mavae atu ia mea

o le taulaga lea i mea e ‘ai ma le taulaga i mea e inu i le ALI‘I lo ‘outou Atua?

15‘Ia ‘outou ilia le pū i Siona,

‘ia ‘outou ‘atofaina ni aso e anapogi ai,

‘ia ‘outou tala‘iina se fa‘apotopotoga.

16‘Ia ‘outou fa‘apotopotoina le nu‘u,

‘ia ‘outou fa‘apa‘iaina le potopotoga,

‘ia ‘outou fa‘apotopotoina toeaina,

‘ia aofia tamaiti, ‘atoa ma ē o fesusui;

‘ia alu atu le fa‘ato‘āfaiavā a‘i lona potu

ma le fa‘ato‘ānofotane a‘i lona afeafe.

17‘Ia fētāgisi le ‘au ositaulaga o ‘au‘auna a le ALI‘I,

i le vā o le fa‘apaologa ma le fatafaitaulaga,

ma ‘ia latou fa‘apea atu, “Le ALI‘I e ‘ia e fa‘asaoina lou nu‘u,

‘aua fo‘i ‘e te tu‘uina atu lou tofi ‘ia fa‘alumaina,

‘ina ne‘i fai ma fa‘atusa o nu‘u ‘ese;

latou te fa‘apea i se a i nu‘u, ‘O ifea lo latou Atua?’”

‘Ua Toe Fa‘atamao‘āigaina e le Atua le Lau‘ele‘ele

18‘Ona fuā lea o le ALI‘I ‘ona o lona nu‘u,

na te alofa mutimutivale i ona tagata.

19E tali mai le ALI‘I, ma fa‘apea mai i lona nu‘u:

Fa‘auta mai, ‘ou te foa‘iina atu ‘iā te ‘outou le saito,

ma uaina ma suāu‘u tou te mā‘o‘ona ai;

‘ou te lē toe tu‘uina atu ‘iā te ‘outou ‘ia fa‘alumaina e nu‘u ‘ese.

20‘Ou te fa‘ate‘a mamao ‘iā te ‘outou o ‘au mai le itū i matū,

‘ou te tulia i latou i le nu‘u naumati ma le gaogao,

e fa‘asaga o latou mata i le sami i sasa‘e;

e fo‘i o latou tua i le sami tupito,

e alu a‘e fo‘i lo latou elo, e alu a‘e fo‘i ma lona sauga,

auā o mea tetele ‘ua ia faia.

21Le fanua e, ‘aua ‘e te fefe;

‘ia e fiafia ma ‘oli‘oli,

auā e faia e le ALI‘I mea tetele.

22O manu vaefā o le vao e, ‘aua tou te fefefe,

auā ‘ua tupu le mutia i mea e tata‘a ai manu o le vao,

auā ‘ua fua mai le la‘au i lona fua,

o le mati ‘atoa ma le vine ‘ua matuā fua mai lava.

23O ‘outou fo‘i o le fānau a Siona e, ‘ia ‘outou fiafia ma ‘oli‘oli i le ALI‘I lo ‘outou Atua;

auā ‘ua ia foa‘iina fa‘atatau mai ‘iā te ‘outou le timuga muamua,

na te fa‘atotōina ifo fo‘i le timu mo ‘outou, o le timuga muamua,

‘atoa ma le timuga mulimuli i le masina muamua.

24E tūtūmu mea e sasa ai saito i saito,

e taumasuasua o latou tu‘ugāuaina i le uaina ma le suāu‘u.

25‘Ou te taui atu ‘iā te ‘outou

o tausaga na ‘aina e le sē akerise, ma le sē aleka, ma le se kasili, ma le sē kasama,

o la‘u itūtau‘a tele na ‘ou ‘auina atu ‘iā te ‘outou.

26Tou te ‘a‘ai lava ma mā‘o‘ona ai,

tou te vivi‘i atu fo‘i i le suafa o le ALI‘I lo ‘outou Atua,

o lē ‘ua faia vāvega ‘iā te ‘outou;

e lē mā fo‘i lo‘u nu‘u e fa‘avavau.

27Tou te iloa fo‘i, ‘ou te i ai ‘iā Isaraelu,

o a‘u lava o le ALI‘I lo ‘outou Atua,

‘ae leai se tasi; e lē mā lo‘u nu‘u e fa‘avavau.

O le Aso o le Ali‘i

28Mulimuli ane, e i‘u ‘ina ‘ou liligi ifo ai lo‘u Agaga i luga i tagata uma;

ona perofeta ai lea o ‘outou atali‘i ma o ‘outou afafine,

e fai miti o ‘outou toeaina, e iloa fa‘aaliga e o ‘outou taulele‘a.

29‘Ou te liligi ifo fo‘i lo‘u Agaga

i ‘au‘auna ma ‘au‘auna fafine, i ia ona aso.

30‘Ou te tu‘uina atu fo‘i vāvega

i le lagi ma le lalolagi,

o le toto ma le afi ma le asu fa‘aniutū.

31E muamua ‘ona liua le lā i le pouliuli ma le masina i le toto,

i le o‘o ai i le aso tele ma le silisili o le ALI‘I.

32E i‘u fo‘i ‘ina fa‘aolaina o i latou uma lava o ē vala‘au atu i le suafa o le ALI‘I;

auā e i ai le fa‘aolataga i le mauga o Siona ma Ierusalema,

fa‘apei ‘ona fetalai mai ai o le ALI‘I,

e i ai fo‘i i ē ‘ua totoe o i latou ia e vala‘auina e le ALI‘I.