Fa‘ata‘oto 4 - Revised Samoan Catholic Bible

O le Apoapoa‘iga ‘ina ‘ia Sā‘ili le Poto

1Fa‘alogo mai ia, ‘outou le fānau e,

i le a‘oa‘o atu a le tamā ma ua‘i mai o ‘outou taliga ‘ina ‘ia fa‘aatamamaiina ‘outou.

2Auā ‘ou te avatu ‘iā te ‘outou le poto e lelei;

‘aua ne‘i tou tu‘ulafoa‘i i la‘u ‘upu e a‘oa‘o atu.

3Auā o a‘u nei, o le atali‘i o lo‘u tamā, o le pele to‘atasi a lo‘u tinā.

4Na ia a‘oa‘o mai ‘iā te a‘u ma na fai mai ‘iā te a‘u,

“‘Ia tāofi a‘u ‘upu i lou loto, ‘ia tausiusi i a‘u poloa‘iga ‘e te ola ai.

5‘Ia maua le poto, ‘ia maua le atamai;

‘aua ne‘i galo ‘iā te oe o nei mea;

‘aua fo‘i ne‘i e liliu ‘ese i ‘upu a lo‘u gutu.

6‘Aua ‘e te lafoa‘i ‘iā te ia, ‘ona tausia lea o oe e ia;

‘ia e alofa ‘iā te ia, ‘ona leoleoina lea o oe e ia.

7O le poto o le mea sili lea, ‘ia maua le poto;

o mea uma ‘e te maua ia maua mai ai le atamai.

8‘Ia e vivi‘i ‘iā te ia, ‘ona fa‘aeaina lea o oe e ia;

na te fa‘amamaluina oe pe a e fusi ‘iā te ia.

9Na te avatu le pale matagofie i lou ulu;

o le paleali‘i lālelei na te foa‘iina atu ‘iā te oe.”

10Fa‘alogo mai, lo‘u atali‘i e, ma e talia a‘u ‘upu,

‘ona fa‘ateleina ai lea o tausaga o lou olaga.

11‘Ou te fa‘asino ‘iā te oe le ala o le poto;

‘ou te ta‘ita‘iina oe i ala sa‘o,

12A e savali e lē fa‘alavelaveina lau la‘asaga;

a e momo‘e ‘e te lē tausuai.

13‘Ia e tāofi mau i ‘upu e a‘oa‘oina,

‘aua ne‘i tu‘uina atu; ‘ia e leoleo i ai; auā o lou ola lava lea.

14‘Aua ‘e te alu i le ala o ē agasala;

‘aua fo‘i ‘e te ui i le ala o ē fai amio leaga.

17Auā ‘ua latou ‘a‘ai le areto a le agasala;

‘ua latou inu fo‘i le uaina a le sauāga.

18A o le ala o ē amiotonu, e tusa ia ma le malamalama o le ao,

o lo‘o tupu pea lona malamalama e o‘o i le totonu o le la.

19O le ala o ē amio leaga e tusa lea ma le pogisā;

latou te lē iloa le mea latou te tausuai ai.

20Lo‘u atali‘i e,

‘ia e fa‘alogo mai i a‘u ‘upu;

‘ia ua‘i mai ou taliga i mea ‘ou te fai atu ai;

21‘aua ne‘i te‘a ‘ese ia mea i ou mata;

‘ia e tausi i ai i totonu o lou loto;

22auā o ia mea o le ola lea i ē ‘ua maua;

ma le mea e mālōlō ai o latou tino uma.

23‘Ia sili ‘ona leoleoina o lou loto i le leoleoina o mea uma;

auā e tupu mai ai le amio.

24Tu‘u ‘ese ‘iā te oe le gutu fa‘api‘opi‘o ma laugutu fa‘atu‘i‘ese,

‘ia mamao ia ‘iā te oe.

25‘Ia va‘ai sa‘o ou mata i ou luma ma ou laumata,

‘ia fa‘asagatonu ia i ou luma.

26‘Ia mafaufau i le ala o ou vae;

‘ona fa‘atumauina ai lea o ou ala uma.

27‘Aua ne‘i afe i le itū taumatau po o le itū tauagavale;

‘ia ‘alo ‘ese ou vae i le leaga.