1O le tusi lenei o poloa‘iga a le Atua
ma le tulafono ‘ua tumau i le fa‘avavau.
O i latou uma e tausi i ai, latou te o‘o atu i le ola;
a o ē latou te tu‘ulafoa‘iina, e ō ifo i le oti.
2Iakopo e, ‘ia e toe fo‘i mai ma tago atu i ai,
‘ia e savali i le ala e aga‘i atu i lona pupula, i lona lava malamalama.
3‘Aua ne‘i e tu‘u atu lou vi‘iga i se tasi ma lou mamalu i nu‘u ‘ese.
4‘Amu‘ia i tatou, Isaraelu,
auā ‘ua malamalama ‘iā i tatou o mea e fiafia i ai le Atua. O le Fa‘amafanafanaga ‘iā Ierusalema
5‘Ia e loto tele, o oe le nu‘u o le Atua, le fa‘amanatuga o Isaraelu.
6‘Ua lē fa‘atauina ‘outou i nu‘u ‘ese ‘ina ‘ia ‘outou fano ai,
‘ae ‘ona ‘ua ‘outou ita ma fa‘aoso le Atua i le to‘atama‘i,
o lea ‘ua tu‘uina atu ‘outou i o ‘outou fili.
7Auā ‘ua ‘outou fa‘a‘ono‘ono tele i lē ‘ua na faia ‘outou, o le Atua e fa‘avavau,
o fai taulaga i temoni, ‘ae lē o le Atua.
8Auā ‘ua galo ‘iā te ‘outou le Atua ‘ua na fafaga ‘iā te ‘outou,
‘ua ‘outou fa‘atigā i lo ‘outou tinā tausi o Ierusalema.
9Auā ‘ua na iloa atu le to‘asā o le Atua e o‘o mai ‘iā te ‘outou, ma ‘ua fai ane:
Fa‘alogo mai ia ‘outou, tuā‘oi o Siona; auā ‘ua fa‘ao‘o mai ‘iā te a‘u e le Atua le fa‘anoanoa tele;
10auā ‘ua ‘ou iloa le tāfeaga o lo‘u nu‘u, o a‘u tama tane ma a‘u tama fafine,
‘ua fa‘ao‘o mai ‘iā te i latou e lē fa‘avavau.
11Na ‘ou fafaga ‘iā te i latou ma le fiafia,
‘ae ‘ua ‘ou tu‘u atu i latou e ō ma le tagi ma le fa‘anoanoa.
12‘Aua le fiafia se tasi ‘iā te a‘u, o le fafine ‘ua oti lana tane,
o le fafine pagātia; ‘ua tu‘ulafoa‘iina lava a‘u e ni isi e to‘atele
‘ona o agasala a la‘u fānau, auā ‘ua latou fulitua i le tulafono a le Atua.
13‘Ua latou lē iloa ana fa‘amasinoga, ‘ua lē sāvavali i latou i ala o poloa‘iga a le Atua
ma ‘ua latou lē ulu atu ma le fa‘amaoni i magāala o lana ‘upu moni.
14‘Inā ō mai ia o i latou e tuā‘oi ma Siona,
‘ia latou fa‘amanatua le nofopologa o a‘u tama tane ma a‘u tama teine
‘ua fa‘asalaina ai i latou e lē fa‘avavau.
15Auā ‘ua na fa‘aoso ‘iā te i latou le nu‘u mai le mea mamao,
o le nu‘u sauā, nu‘u ‘ua gagana ‘ese.
16‘Ua latou le āva i le toeaina, ‘ua latou le alolofa fo‘i i tamaiti;
‘ua latou ‘aveina le fānau pele a le fafine ‘ua oti lana tane,
‘ua latou tu‘upagātia i ē aunoa mana tama.
17A o a‘u, e mafai fa‘apefea ‘ona ‘ou fesoasoani atu ‘iā te ‘outou?
18Auā o lē na fa‘ao‘o mai ‘iā te ‘outou nei leaga uma,
o ia lava na te lavea‘iina ‘outou a‘i lima o ē ita mai ‘iā te ‘outou.
19La‘u fānau e, sāvavali, ‘inā sāvavali ia;
auā o a‘u nei ‘ua tu‘upagātia.
20‘Ua ‘ou tō‘ese le ‘ofu o le manuia, ‘ua ‘ou ufitia a‘u i le ‘ie talatala o lē ‘ai‘oi,
‘ou te ‘alaga atu i le Silisili‘ese i aso o lo‘u ola.
21‘Ia ‘outou loto malosi, la‘u fānau e, ‘outou vala‘au atu i le Ali‘i,
‘ona ia lavea‘i lea ‘iā te ‘outou a‘i lima o ali‘i sili o ē ita mai.
22Auā ‘ua ‘ou fa‘alagolago i lē fa‘avavau, na te lavea‘iina ‘outou;
o lē pa‘ia ‘ua na fa‘afiafia lo‘u loto i lona agaalofa,
e fa‘ao‘o mai ‘iā te ‘outou e lo tatou olataga e fa‘avavau.
23Na tatou fa‘amāvae ma ‘outou i la‘u auega ma le liligi o o‘u loimata;
‘ae toe ta‘ita‘iina mai ‘outou ‘iā te a‘u e le Atua i le fiafia ma le ‘oli‘oli e o‘o i le fa‘avavau.
24Auā e pei ‘ona iloa mai e i latou e tuā‘oi ma Siona la ‘outou tāfeaga ‘ua fa‘ao‘o mai e le Atua,
e fa‘apea fo‘i ‘ona latou iloa mai lo ‘outou fa‘aolataga mai le Atua,
e vave ‘ona fa‘ao‘o mai ‘iā te ‘outou ma le fa‘aaloalo tele ma le mamalu e fa‘avavau.
25Le fānau e, ‘ia ‘outou tali ma le ‘onosa‘i le to‘asā ‘ua o‘o mai i o ‘outou luga;
auā ‘ua tuliloaina oe e lē ‘ua ita ‘iā te oe,
‘ae lē pine ‘ona e iloa atu ‘ua fano lava ia, ‘e te soli fo‘i i lona ua.
26O la‘u fānau pelepeleina na latou sāvavali i ala gaoā;
auā ‘ua ta‘ita‘iina i latou e pei o se lafu mamoe na faoa e i latou ‘ua ita mai.
27‘Ia fa‘amafanafanaina ‘outou, le fānau e, ma ‘ia ‘outou vala‘au atu i le Ali‘i,
auā ‘ua manatua pea ‘outou e lē ‘ua na ‘ave ‘outou.
28Auā e pei ‘ona ‘outou loto e fesēa‘i mamao ma le Atua,
e fa‘asautuasefulu fa‘apea ‘ona ‘outou toe liliu atu ma sā‘ili‘ili ‘iā te ia.
29Auā o lē na fa‘ao‘o mai le leaga ‘iā te ‘outou,
o ia lava na te toe foa‘i mai ‘iā te ‘outou le ‘oli‘oli e fa‘avavau i lo ‘outou olataga.
‘Ua Mautinoa le Fesoasoani mo Ierusalema30‘Ia e loto malosi, Ierusalema e, auā o lē na vala‘au mai ‘iā te oe i lou igoa,
o ia ‘ua fa‘amafanafana mai ‘iā te oe.
31O tagata sauā na latou fa‘aleaga mai ‘iā te oe,
e fano lava o i latou,
a o ē na ‘oli‘oli i le fa‘atafunaina o oe,
e fa‘asalaina ai i latou.
32O ‘a‘ai na faia ai lau fānau ma pologa, e fa‘asalaina i latou,
e fa‘apea ma lē na na ‘ave lau fānau.
33Auā e pei ‘ona fiafia i le fa‘atafunaina o oe, ma ‘ua ‘oli‘oli i lou pa‘ū,
e fa‘apea ‘ona fa‘anoanoa o ia i le fa‘atafunaina lava o ia.
34E liliu‘eseina lona ‘oli‘oli i le to‘atele o ona tagata,
o lona fiafia fo‘i e liua i le auega.
35Auā e o‘o mai ‘iā te ia le afi mū mai lē fa‘avavau,
i ni aso e tele, e ‘ainā lava ia e le ‘au temoni i tausaga e tele.
36Ierusalema e, ‘ia e tepa atu i sasa‘e ma e iloa atu ai le fiafia ‘ua sau ‘iā te oe mai le Atua.
37Auā fa‘auta, e ō mai lau fānau, o ē na ō ‘ese ‘iā te oe, na fa‘ata‘ape‘apeina,
o lenā ‘ua ō mai o fa‘apotopotoina i latou mai le itū i sisifo ma le itū i sasa‘e,
i le fetalaiga a lē ‘ua pa‘ia, o ‘oli‘oli i latou ma vivi‘i atu ai i le Atua.
Who We AreWhat We EelieveWhat We Do
2025 by iamachristian.org,Inc All rights reserved.
