Salāmo 51 - Revised Samoan Catholic Bible

O le Tatalo a Tavita i le Atua ‘ina ‘ia Fa‘amāgaloina ana AgasalaMa le usu pese. O le salāmo a Tavita ‘ina ‘ua alu atu le perofeta o Natano ‘iā te ia, ‘ina ‘ua uma ‘ona alu ane o ia ‘iā Patesepa

1Le Atua e,

‘ia e alofa mai ‘iā te a‘u,

e tusa ma lou lava alofa;

e tusa ma le tele o lou alofa mutimutivale

‘ia e sōloi‘esea ‘ou solitulafono.

2‘Ia e matuā fufulu mai ‘iā te a‘u i la‘u amio leaga,

ma ‘ia e fa‘amamā mai ‘iā te a‘u i la‘u agasala.

3Auā ‘ua ‘ou iloa e a‘u lo‘u solitulafono;

e lē aunoa fo‘i ‘ona i ai i o‘u luma o la‘u agasala.

4‘Ua ‘ou agasala atu ‘iā te oe na o oe lava;

‘ua ‘ou faia fo‘i lenei mea leaga i ou luma;

e tonu ai oe i lau fetalaiga,

e sa‘o fo‘i oe pe a e fa‘amasino.

5Fa‘auta, na fānaua a‘u ma le amio leaga;

na ‘ou i ai fo‘i i le manava o lo‘u tinā ma le agasala.

6Fa‘auta, ‘ua e finagalo i le fa‘amaoni o le loto;

ma e fa‘ailoa mai ‘iā te a‘u le poto i le mea lilo.

7‘Ia e fa‘amamā ‘iā te a‘u, i le isopo,

‘ona mamā ai lea o a‘u;

‘ia e fufulu mai ‘iā te a‘u,

‘ona sinasina ai lea o a‘u e sili i lo le kiona.

8‘Ia ‘ou fa‘alogo mai ‘iā te oe i le ‘oli‘oli ma le fiafia;

‘ina ‘ia fiafia ivi ‘ua e fa‘amomomoina.

9‘Ia ‘alo ou fofoga i a‘u agasala,

ma ‘ia e sōloi ‘ese a‘u amio leaga uma.

10Le Atua e, ‘ia e faia se loto mamā mo a‘u;

ma ‘ia e fa‘afouina se loto mau i totonu ‘iā te a‘u.

11‘Aua ‘e te lafoa‘iina a‘u i ou luma;

‘aua fo‘i ‘e te ‘ave‘eseina lou Agaga Pa‘ia ‘iā te a‘u.

12‘Ia e fa‘afoisia mai ‘iā te a‘u le ‘oli‘oli o le olataga mai ‘iā te oe;

‘ia e tāofimauina fo‘i o a‘u ma le loto fiafia.

13‘Ou te a‘oa‘o atu ai ou ala i ē ‘ua solitulafono,

‘ona fa‘aliliuina atu ai lea ‘iā te oe o ē ‘ua agasala.

14Le Atua e,

le Atua o lo‘u olataga,

‘ia e lavea‘i mai ‘iā te a‘u a‘i le sala o le toto;

‘ona pese fiafia ai lea o lo‘u laulaufaiva

i lē amiotonu mai ‘iā te oe.

15Le ALI‘I e,

‘ia e fa‘amatala mai o‘u laugutu;

‘ona ta‘uta‘u atu lea e lo‘u gutu lou vi‘iga.

16Auā ‘ua e lē finagalo i se taulaga;

ana e finagalo i ai po ‘ua ‘ou avatu lava;

‘ua e lē fiafia i se taulaga mū.

17O taulaga i le Atua, o le loto momomo lea;

le Atua e, ‘e te lē ‘inosia le loto momomo ma le nutimomoia.

18‘Ia e fa‘amanuia mai i Siona i lou finagalo alofa;

‘ia e ati a‘e le pā o Ierusalema.

19‘Ona e finagalo ai lea i taulaga tonu,

o le taulaga mū ma le taulaga mū uma

‘ona latou fa‘ae‘e ai lea o povi po‘a i lau fatafaitaulaga.