Sirako 25 - Revised Samoan Catholic Bible

O le Fa‘afeagai ma Uso

1E tolu ni mea e fiafia i ai lo‘u agaga ma ‘ua lelei lava i luma o le Atua ma tagata.

2O le lotogatasi o uso, o le fealofani o ē tuā‘oi,

o le fētausia‘i o le tane ma lana avā.

3E tolu itū‘āiga tagata e ‘ino‘ino i ai lo‘u agaga,

e matuā mafatia lava o a‘u i o latou olaga.

4O le tagata mativa ‘ua fa‘amaualuga, o le tagata mau‘oloa e talapelo

ma le toeaina valea e faita‘aga.

O le Taimi Matua

5O mea na e lē fa‘aputuina i aso o le talavou,

‘ae maua fa‘apefea mea ia i aso a o toeaina ai oe?

6Se mea a matagofie, o le poto o le ulusinā i fai fa‘amasinoga

ma le iloa e toeaina fai fa‘atonuga lelei.

7E matuā ono lava le poto i ē toeaina,

o le mafaufau ma le fa‘atonuga lelei i ē mamalu.

8O le poto a‘ia‘i o le pale lea o ē toeaina,

o le mata‘u i le Atua o lo latou mamalu lea.

9O mea e iva ‘ua ta‘uleleia i lo‘u loto ma le lē māsalosalo;

a o lona sefulu ‘ou te ta‘uta‘u i tagata i lo‘u gutu.

10O le tagata ‘ua fa‘amanuiaina o ia i lana fānau;

o lē na te iloa atu i aso o lona ola le fano o ona fili.

11‘Amu‘ia le tagata ‘ua la nonofo ma se fafine mafaufau ma le tagata ‘ua lē agasala o ia i ana ‘upu,

ma lē ‘ua lē ‘au‘auna i se matai ‘ua leaga ‘iā te ia.

12‘Amu‘ia lē ‘ua na maua se uō fa‘amaoni ma lē fa‘amatala atu le amiotonu i taliga fa‘alogo.

13E ta‘uta‘ua lava le tagata ‘ua na maua le poto ma le a‘oa‘oga,

‘ae lē sili o ia i lē mata‘u i le Ali‘i.

14O le mata‘u i le Atua, ‘ua sili lea i mea uma lava.

15‘Amu‘ia le tagata ‘ua foa‘iina mai ‘iā te ia le mata‘u i le Atua;

o lē ‘ua ‘iā te ia lea mata‘u e fa‘atusaina ‘ea ‘iā te ai?

16O le mata‘u i le Atua o le amataga lea o le alofa ‘iā te ia;

‘ae tatau ‘ona fa‘atasi ai ma le amataga o le fa‘atuatua.

O le Fafine Leaga

17O le fa‘anoanoa o le loto, o le aofa‘iga lea o puapuagā,

a o le leaga o le fafine, o le aofa‘iga lea o mea fa‘atigā.

18So se puapuagā lava, na o puapuagā o le loto e lē lavā ‘o‘ono ai.

19So se loto leaga lava, na o le loto leaga o le fafine e lē lavā ‘onosa‘i ai.

20So se mea fa‘atigā lava, na o le fa‘atigā mai,

a i latou ‘ua ‘ino‘ino ‘iā te i tatou ‘ua lē lavā ‘o‘ono ai.

21So se fa‘asalaga lava, na o le fa‘asala mai a le fili e lē lavā tali.

22E leai se gutu e sili ‘ona leaga i le gutu o le gata,

23ma ‘ua leai se ita e sili ‘ona leaga i le ita o le fafine.

‘Ua feoloolo le nofo fa‘atasi ma le leona po o le tarako,

a ‘ua leaga le nofo fa‘atasi ma le fafine amio leaga.

24O le loto leaga o le fafine e liua ai ona mata, ‘ua fa‘apogisāina ai,

e pei o mata o le urosa, e pei o se atigi taga.

A fa‘atasi ma tagata o lona ‘āiga,

25‘ua mapuitigā lana tane ma ‘ua ōi lemū o fa‘alogologo ‘iā te i latou.

26E feoloolo o loto leaga o ni isi uma pe a fa‘atatau ma le loto leaga o le fafine.

‘Ia pa‘ū i ona luga le fa‘asalaga o tagata agasala.

27E pei o le faupuega oneone i lalo o vae o le toeaina,

e fa‘apea le fafine tautalatala i lana tane pe a fia filemū o ia.

28‘Aua ne‘i e matamata i le lālelei o fafine,

‘aua fo‘i ‘e te tu‘inanau i se fafine ‘ona o lona lālelei.

29E tupu mai i fafine le ita ma le fa‘alemigao ma le māsiasi tele.

30‘Āfai ‘ua pule le fafine, e fouvale ai o ia i lana tane.

31O le avā amio leaga e mafatia ai le mafaufau,

e fa‘anoanoa ai o mata, e puapuagātia ai le loto.

32‘Ua fa‘avaivai o lima o le tane ma gatete ona tulivae,

pe a le tausi alofa lana avā ‘iā te ia.

33O le fafine o le mafua‘aga lava ia o le agasala,

o ia ‘ua tatou oti uma ai.

34‘Aua le tu‘u i lau fa‘atanoa sina ala mo le vai,

‘aua fo‘i ‘e te fa‘ataga i le avā leaga ‘ona fai lona ia loto.

35‘Āfai ‘ua lē savali o ia i le mea e ta‘ita‘iina ai e lou lima,

na te fa‘amasiasi ai ‘iā te oe i luma o ou fili.

36‘Ia e vavae ‘ese o ia i lou tino,

‘ina ne‘i saga fa‘aleaga pea o ia ‘iā te oe.