1Sa i Kaisareia le tasi tagata o Konelio le igoa, o le ta‘ita‘i o le to‘aselau i le ‘au e igoa i le ‘au a Italia;
2o le tagata amio Atua, ma le mata‘u i le Atua, ‘atoa ma lona ‘āiga uma, o lē avatu mea alofa e tele i le nu‘u, ma ‘ua tatalo i le Atua e lē aunoa.
3‘Ua na iloa tino i le fa‘aaliga, i le itūlā pe tusa o le tolu i le afiafi, o le agelu a le Atua ‘ua ulufale mai ‘iā te ia, ‘ua fa‘apea mai ‘iā te ia, “Konelio e.”
4‘Ua pulato‘a o ia i le agelu, ‘ona fefe ai lea, ‘ua fa‘apea atu, “Le ali‘i e, se a ‘ea?”
‘Ua fai mai le agelu, “‘Ua ō a‘e ‘au tatalo ma au mea alofa o fai ma fa‘amanatuga i luma o le Atua.
5O lenei, ‘a‘au atu ia ni tagata i Iopa e ‘a‘ami ‘iā Simona e igoa ia Peteru;
6o lo‘o nonofo o ia ma le tasi Simona o le fai pa‘u o manu, e latalata i le sami lona fale; o ia na te ta‘u atu ‘iā te oe mea e tusa ‘ona e faia.”
7‘Ua alu le agelu sa tautala ma Konelio, ‘ona vala‘au lea o ia i ana ‘au‘auna e to‘alua ma le tagata tau e amio Atua o le tasi o i latou e lē te‘a ‘iā te ia;
8‘ua ia fa‘amatala ‘iā te i latou mea uma, ‘ona ‘a‘au atu lea o ia ‘iā te i latou i Iopa.
9O le taeao, a o i le ala i latou ma na latalata i le ‘a‘ai, ‘ua alu a‘e ai Peteru i luga o le fale e tatalo i le itūlā po ‘ua tutonu le lā.
10‘Ua matelaina o ia, ‘ua manatu e ‘ai; o latou o sauni, ‘ua o‘o ‘iā te ia le fa‘aaliga;
11‘ua va‘ai atu i le lagi ‘ua avanoa, ma le tasi mea ‘ua alu ifo ‘iā te ia, pei se ‘ie lautele, ‘ua noatia i ona pito e fa, ma tu‘utu‘u ifo i le lalolagi;
12na i ai manu vaefā uma lava e tata‘a, ma manu fe‘ai, ma mea fetolofi, ma manu felelei.
13‘Ona tulei mai lea o le si‘ufofoga ‘iā te ia, “Peteru e, ‘inā tu ia i luga, ‘inā fasi ma ‘ai.”
14A ‘ua fai atu Peteru, “Le Ali‘i e, ‘aua lava auā ‘ou te le‘i ‘ai lava se mea e sa po o se mea e leaga.”
15‘Ua fo‘i fa‘alua mai le si‘ufofoga ‘iā te ia, “O mea ‘ua fa‘amamāina e le Atua ‘aua ‘e te ta‘ua e sa.”
16‘Ua fai fa‘atolu mai lenei mea; ‘ona toe ‘ava‘e lea o le mea i le lagi.
17‘Ua māsalosalo Peteru i lona lava loto pe se a lea fa‘aaliga ‘ua iloa e ia, fa‘auta fo‘i, o tagata na ‘a‘auina e Konelio, sa latou sā‘ili i le fale o Simona, ‘ua tutū mai i le faitoto‘a,
18o vala‘au ma fesili, po o nofo ai Simona e igoa ‘iā Peteru.
19‘Ua mānatunatu ifo Peteru i le fa‘aaliga, ‘ae fetalai mai le Agaga ‘iā te ia, “Fa‘auta, o lo‘o sā‘ili mai tagata e to‘atolu ‘iā te oe.
20‘Ae tu ia i luga, ‘inā alu ifo, tou te ō ma i latou, ‘aua lava le māsalosalo vale; auā ‘ua ‘a‘auina i latou e a‘u lava.”
21‘Ona alu ifo lea o Peteru i tagata na ‘a‘auina e Konelio ‘iā te ia, ‘ua fai atu ai, “Fa‘auta, o a‘u lenei ‘ua ‘outou sā‘ilia; se a le mea na ‘outou ō mai ai?”
22‘Ona fai mai lea o i latou, “O Konelio le ta‘ita‘i o le to‘aselau, o le tagata amiotonu, ma le mata‘u i le Atua, ‘ua ta‘uleleia e le nu‘u o Iutaia uma lava, na poloa‘iina o ia mai le Atua e le agelu pa‘ia e ‘a‘ami ‘iā te oe, ‘e te alu i lona fale, ia fa‘alogo o ia i ‘upu ‘ua ‘iā te oe.”
23‘Ona fai atu lea o ia ‘iā te i latou e ō mai i le fale, ‘ua na talia fo‘i i latou.
O le taeao fo‘i ‘ua latou ō ai ma Peteru, ‘ua ō fo‘i fa‘atasi ma ia nisi o le ‘au uso mai Iopa.
24O le tasi taeao fo‘i ‘ua o‘o atu ai i latou i Kaisareia. ‘Ua fa‘atali fo‘i Konelio ‘iā te i latou, ‘ua fa‘apotopotoina e ia lona ‘āiga ma ana aumea mamae.
25‘Ua ulufale atu Peteru, ‘ona fa‘afetaia‘i lea o Konelio ‘iā te ia, ‘ua fa‘apa‘ū i ona vae, ma ifo ‘iā te ia.
26A ‘ua fa‘atū e Peteru ‘iā te ia, ‘ua fa‘apea atu, “‘Inā tu ia i aluga, o a‘u nei lava o le tagata,”
27‘Ona ulufale lea, o lo‘o tautala i lā‘ua, ‘ua iloa e ia e to‘atele ‘ua fa‘apotopotoina.
28‘Ua fai atu o ia ‘iā te i latou, “‘Ua ‘outou iloa lava ‘ua sa i le tagata Iutaia ‘ona fa‘atasi pe fa‘alatalata i le tagata ‘ese; a ‘ua fa‘asino mai e le Atua ‘iā te a‘u, auā ‘ou te ta‘uina atu ‘ua sa pe leaga se tasi tagata.
29O le mea lea ‘ua ‘ou sau ai ma le lē fe‘alo‘alofa‘i, ‘ina ‘ua ‘a‘ami atu o a‘u; o lenei, ‘ou te fesili atu, Se a le mea ‘ua ‘outou ‘a‘ami atu ai a‘u?”
30‘Ona fai mai lea o Konelio, “O lona fa o aso talu ai na o‘o i le itūlā fa‘apenei; o le itūlā fo‘i e tolu i le afiafi sa ‘ou tatalo ai i lo‘u fale, fa‘auta fo‘i, na tu mai le tagata i o‘u luma ma le ‘ofu pupula,
31‘ua na fai mai, ‘Konelio e, ‘ua fa‘afofogaina lau tatalo, ‘ua manatua fo‘i au mea alofa i luma o le Atua.
32O lenei, ia ē ‘a‘auina atu nisi i Iopa, e ‘a‘ami ‘iā Simona, e igoa ‘iā Peteru; o lo‘o nofo o ia i le fale o Simona, le fai pa‘u o manu, e latalata i le sami.’
33O lea na ‘ou ‘a‘auloaina atu ai nisi; ‘ua lelei lava ‘ina ‘ua e maliu mai, o lenei, o lo‘o ‘i‘inei i matou uma lava i luma o le Atua e fa‘alogologo atu i mea uma lava ‘ua poloa‘i mai ai le Atua ‘iā te oe.”
O le Lauga a Peteru34‘Ona o‘o atu lea o le lauga a Peteru, ‘ua fa‘apea atu, “E moni, ‘ua ‘ou iloa e lē fa‘ailogaina tagata e le Atua;Teu 10.17
35‘ae peita‘i o le mata‘u ‘iā te ia i nu‘u uma lava, ma fai le amiotonu ‘ua talia i latou e ia.
36‘Ua ‘outou iloa le ‘upu na molia e ia i le fānauga a Isaraelu, ‘ua folafola ai le tala lelei o le manuia ia Iesu Keriso, o le Ali‘i ia o tagata uma lava;
37o le ‘upu lea sa i Iutaia uma, na āfua i Kalilaia, ‘ina ‘ua mavae o le papatisoga sa tala‘iina e Ioane;
38o Iesu o le Nasareta, o lē na fa‘au‘uina e le Atua i le Agaga Pa‘ia ma le mana, o ia sa femaliua‘i ma agalelei ma fa‘amālōlō atu i ē na fa‘ato‘ilaloina uma lava e le tiapolo; auā sa ‘iā te ia le Atua.
39O molimau fo‘i i matou i mea uma lava na faia e ia i le nu‘u o Iutaia ‘atoa ma Ierusalema; o lē na fasiotia fo‘i e i latou i lo latou fa‘atautau i le la‘au.
40O ia na toe fa‘atūina e le Atua i le aso tolu, ma na fa‘aalitinoina o ia,
41e lē o le nu‘u uma lava, a o molimau na ulua‘i filifilia e le Atua, o i matou nei lava sa matou ‘a‘ai ma feinu ma ia, ma na toetū mai o ia i ē ‘ua oti.
42‘Ua na poloa‘i mai fo‘i ‘iā te i matou e tala‘i atu i le nu‘u, ma molitino atu, o ia lava lē ‘ua tofia e le Atua e fai ma fa‘amasino i ē o ola ma ē ‘ua oti.
43‘Ua molitinoina mai o ia e le ‘au perofeta uma, ‘ona o lona suafa e maua ai le fa‘amāgalo o agasala a ē fa‘atuatua ‘iā te ia uma lava.”
‘Ua Talia e Nu‘u ‘Ese le Agaga Pa‘ia44‘Ua tautala atu Peteru i nei ‘upu, ‘ae afio ifo le Agaga Pa‘ia ‘iā te i latou uma lava o ē ‘ua fa‘alogo i le ‘upu.
45‘Ona matuā ofo lea o ē na peritomeina, o ē fa‘atuatua, o ē na ō mai ma Peteru ‘ina ‘ua liligi ifo i nu‘u ‘ese le alofa o le Agaga Pa‘ia.
46Auā ‘ua latou fa‘alogo atu ‘iā te i latou ‘ua tautala mai i gagana ‘ese‘ese ma vivi‘i atu i le Atua. ‘Ona fai atu lea o Peteru,
47“E mafai ‘ea e se tasi ‘ona vavao i le vai, ‘ina ‘ia lē papatisoina ai i latou nei, o ē ‘ua maua le Agaga Pa‘ia e pei o i tatou nei?”
48‘Ua fai atu fo‘i o ia ‘ia papatisoina i latou i le Suafa o le Ali‘i. ‘Ona ‘ai‘oi lea o i latou ‘iā te ia ‘ia latou nonofo ma ia i nisi aso.
Who We AreWhat We EelieveWhat We Do
2025 by iamachristian.org,Inc All rights reserved.
