Salāmo 111 - Revised Samoan Catholic Bible

‘Ua Vivi‘i atu i le Atua i Mea ‘ua na Faia

1‘Ia ‘outou vivi‘i atu i le ALI‘I.

‘Ou te vivi‘i atu i le ALI‘I ma le loto ‘atoa

i le saofa‘iga a ē amiotonu, ‘atoa ma le fa‘apotopotoga.

2O mea ‘ua faia e le ALI‘I, o mea tetele lava ia,

o lo‘o sā‘ilia e i latou uma lava o ē fiafia i ai.

3O mea e vi‘ia ma le matagofie o ana galuega ia,

e tumau fo‘i lana amiotonu e fa‘avavau.

4‘Ua fai ma fa‘amanatuga ona vāvega; o lo‘o

alofa fua mai ma alofa mutimutivale mai le ALI‘I.

5‘Ua foa‘iina mai e ia le mea e ‘ai i ē matata‘u ‘iā te ia;

e manatua e ia lana feagaiga e fa‘avavau.

6‘Ua na fa‘aali atu le mana o ana galuega i lona nu‘u,

‘ina ‘ua avatu ‘iā i latou le tofi o nu‘u ‘ese.

7O galuega a ona ‘a‘ao e moni ia ma le tonu;

e fa‘amaoni ana fe‘au uma lava.

8E fa‘atumauina ia mea e fa‘avavau fa‘avavau lava;

‘ua faia i le fa‘amaoni ma le tonu.

9Na ia avatu le togiola mo lona nu‘u;

na poloa‘i i lana feagaiga ‘ia fa‘avavau lava;

e pa‘ia ma le mata‘utia lona suafa.

10O le mata‘u i le ALI‘I,

o le amataga lea o le poto;

‘ua i ai le mafaufau lelei ‘iā te i latou uma o ē fai ia mea.

E tumau lona vi‘iga e fa‘avavau lava.