Sirako 9 - Revised Samoan Catholic Bible

O le Fa‘afeagai ma Fafine ‘atoa ma Tagata ‘Ese‘ese

1‘Aua ne‘i e fuā i lau avā ‘ua ta‘oto i lou fatafata,

‘ina ne‘i tutupu mai ai ni ona manatu leaga ma aliali i lo ‘oulua vā.

2‘Aua ne‘i fa‘aifo lou loto i le pule a le fafine,

‘ina ne‘i faia‘ina ai lou malosi, ‘ona e māsiasi ai lea.

3‘Aua ne‘i tepa ou mata i le fafine talitane,

‘ina ne‘i e mao pa‘ū i ana mailei.

4‘Aua ‘e te to‘aga na‘uā i le fafine faisiva, ‘aua le fa‘alogo i ai,

‘ina ne‘i fano ai oe ‘ona o lona poto.

5‘Aua ne‘i e tepa i se taupou,

‘ina ne‘i ‘avea lona ‘aulelei ma mea ‘e te fano ai.

6‘Aua ne‘i pipi‘i lou loto i le fafine talitane,

‘ina ne‘i fano ai lava oe ‘atoa ma ‘oloa o lou tofi.

7‘Aua ‘e te tilotilo solo i auala o le ‘a‘ai,

‘aua ‘e te tafaovale i ona malae.

8‘Ia e ua‘i ‘ese ou mata i le fafine ‘ua teuteu anoanoa‘i lona tino,

‘aua fo‘i ne‘i e pulato‘a i le ‘aulelei o le fafine ‘ese.

9O le lālelei o le fafine na fano ai nisi e to‘atele,

auā e oso ai le tu‘inanau ‘ua ‘a‘asa e pei o le afi mumū.

10O fafine talitane uma lava e solipalaina i latou e pei o se otaota i le ala.

11‘Ua i‘u malaia ni isi e to‘atele ‘ona ‘ua latou pulato‘a i le lālelei o se fafine ‘ese;

auā e mū lana talatalaga e pei o se afi.

12‘Aua ‘e te fa‘alatalata atu i se fafine nofotane,

‘aua ne‘i e ta‘oto i le la‘o‘ai fa‘atasi ma ia,

13‘aua ne‘i lua finafinau ma ia i le inu i le uaina,

‘ina ne‘i ua‘i atu ai lou loto ‘iā te ia, ‘ona e fano ai lea i le masa‘a o lou toto. O le Fa‘auō ma isi Tagata

14‘Aua ‘e te tu‘ulafoa‘i i lau uō tuai, auā e lē tusa ma ia o lau uō fou.

15O le uō fou o le uaina fou lea; e i‘u ‘ina fa‘alevaleva,

‘ona e inua ai lea ma le fiafia.

16‘Aua ‘e te matau‘a i le mamalu ma le mau‘oa o le tagata agasala,

auā ‘e te lē iloa pe fa‘apefea ‘ona fano lava ia.

17‘Aua ne‘i e fiafia i le fa‘asauā a ē amio leaga;

‘ia e iloa e lē talileleia lava le tagata amio leaga, e o‘o lava i le tu‘ugamau.

18‘Ia e tu mamao ma lē ‘ua i ai le pule e fasioti,

‘ona e lē lagona ai lea le fefe i le oti.

19‘Āfai fo‘i ‘e te fa‘alatalata atu ‘iā te ia,

‘aua ne‘i sesē o sau amio, ‘ina ne‘i pule o ia i lou ola.

20‘Ia e manatua ‘ua ‘oulua mafuta pea ma le oti;

‘ua e savali i le vā o mailei, ‘ua e soli le ‘au‘upega o ē manunu‘a.

21‘Ia e fa‘aeteete i lē lua te tuā‘oi,

‘ia e filifili fo‘i fa‘atasi ma tagata popoto ma le fa‘autauta.

22‘Ia ‘outou ‘a‘ai fa‘atasi ma ē amiotonu,

‘ia e mitamita i le mata‘u i le Atua;

23‘ia i ai pea i lou loto le manatu i le Atua;

‘ia faia fo‘i au talatalaga uma i tulafono a le Silisili‘ese.

24E vi‘ia le tufuga i galuega a ona lima,

e vi‘ia le ta‘imua i le poto i ana lauga,

a o le toeaina e vi‘ia pe a sa‘o lana tautala.

25E mata‘utia le tagata tautalatala i totonu o lona ‘a‘ai,

e ‘inosia le tagata faitatala ‘ona o ana ‘upu e so‘ona fai.