Salāmo 45 - Revised Samoan Catholic Bible

O le Vi‘iga i le TupuMa le usu pese i le susana. Ma le fānauga a Koru. O le salāmo e a‘oa‘o ai. O le pese i le alofa

1‘Ua puna mai lo‘u loto i ‘upu lelei;

‘ou te tautala atu i mea ‘ua ‘ou faia i le Tupu;

o lo‘u laulaufaiva o le peni lea a le tusi‘upu lima vave.

2‘Ua sili lava lou ‘aulelei i atali‘i o tagata;

‘ua masa‘a ifo i ou laufofoga ‘upu alofa;

o le mea lea e fa‘amanuia ai oe e le Atua e fa‘avavau.

3‘Inā fusi ia lau pelu i lou vae, o oe na le toa,

o lou vi‘iga ma lou mamalu.

4O lou mamalu fo‘i ‘ia e ti‘eti‘e ai i le manu ma le manuia,

‘ona o le ‘upu moni ma le agamalū ma le amiotonu;

‘ia a‘oa‘oina fo‘i oe e lou ‘a‘ao taumatau i mea e mata‘utia ai.

5E ma‘ama‘ai au ū fanafana;

e pa‘u‘ū ai tagata ‘iā te oe;

e tuia ai loto o ē faia le Tupu mo latou fili.

6Le Atua e,

o lou nofoāli‘i e fa‘avavau fa‘avavau lava lea;

o le to‘oto‘o o lou mālō, o le to‘oto‘o o le amiotonu lea.

7‘Ua e finagalo i le amiotonu,

ma ē ‘ino‘ino i le amio leaga;

o le mea lea ‘ua fa‘au‘uina ai oe e le Atua,

o lou Atua lava, i le suāu‘u o le fiafia,

e sili lava i ē tou te fa‘atasi.

8Ou ‘ofu uma lava ‘ua ni muro ma aloe ma kesia,

mai maota nifo o elefane ‘ua latou fa‘afiafia ai ‘iā te oe.

9O lo‘o fa‘atasi o alofafine o tupu,

ma ē ‘ua fa‘apelepeleina e oe;

‘ua tu mai le masiofo i lou itū taumatau

‘ua ‘ofu ia i le auro lelei mai Ofeira.

10‘Inā fa‘afogafoga mai ia, le alofafine e,

ma silasila ma liliu mai ou fofoga;

‘ia e fa‘agalogalo fo‘i i lou nu‘u ma le ‘āiga o lou tamā.

11‘Ona naunau ai lea o le Tupu i lou lālelei;

auā o ia lava lou ALI‘I, ‘ia e ifo ‘iā te ia.

12E sau le tama fafine a Turo ma le mea alofa;

e ole atu ‘iā te oe o ē tamao‘āiga i le nu‘u.

13‘Ua matuā matagofie le alofafine o le Tupu i totonu;

‘ua teuteua lona ‘ofu i le auro.

14E ta‘ita‘iina o ia i le Tupu ma ona ‘ofu lanu ‘ese‘ese;

o ana uō, o taupou o ē mulimuli atu ‘iā te ia,

e ‘aumaia i latou ‘iā te oe.

15E ta‘ita‘iina i latou ma le fiafia ma le ‘oli‘oli;

e ulufale atu i latou i le maota o le Tupu.

16E suia ou tamā i ou alo;

‘e te tofia i latou e fai ma ali‘i sili i le lalolagi uma.

17‘Ou te ta‘uta‘u atu lou suafa i augatupulaga uma lava;

o le mea lea e vivi‘i atu ai tagata ‘iā te oe e fa‘avavau fa‘avavau lava.