Esoto 33 - Revised Samoan Catholic Bible

‘Ua Fa‘atū ‘ese e Mose o lona Fale

1‘Ua toe fetalai mai le ALI‘I ‘iā Mose, “‘Inā alu ia ma ‘ia ‘outou ō a‘e ai lenei mea, o oe ma le nu‘u na e ‘aveina a‘e nai Aikupito, i le nu‘u na ‘ou tautō atu ai ‘iā Aperaamo, ma Isaako, ma Iakopo, ‘ua fa‘apea atu, ‘‘Ou te tu‘uina atu ai i lau fānau.’Kene 12.7; 26.3; 28.13

2‘Ou te ‘auina atu fo‘i i ou luma le agelu; ‘ou te tuli ‘ese atu fo‘i o sa Kanana, ma sa Amorī, ma sa Heti, ma sa Perisē, ma sa Hivī, ma sa Iepusē.

3O le nu‘u lea o lo‘o tafe ai le suāsusu ma le meli; auā tatou te lē ō a‘e ma ‘outou, auā o le nu‘u ‘outou ‘ua ma‘a‘a le ua; ne‘i ‘ou fa‘aumatia ‘outou i le ala.”

4‘Ua fa‘alogo le nu‘u i lenei tala leaga, ‘ona latou fa‘anoanoa ai lea, e lē teuteu fo‘i se tasi i ana teuga;

5auā na fetalai mai le ALI‘I ‘iā Mose, “Fai atu ia i le fānauga a Isaraelu, ‘O le nu‘u ‘ua ma‘a‘a le ‘ua ‘outou, o le ‘emo o le mata ‘ou te alu a‘e ai i totonu o ‘outou, ma ‘ou fa‘aumatia ‘outou; ma tu‘u ‘ese ia o a ‘outou teuga ‘iā te ‘outou, se‘ia ‘ou iloa, pe se a se mea ‘ou te faia ‘iā te ‘outou.’”

6‘Ona tō ‘ese lava lea e le fānauga a Isaraelu o a latou teuga i le mauga o Horepa.

O le Fale ‘ie

7A o Mose, ‘ua ‘ave e ia le fale ‘ie, ‘ua fa‘atū ai e ia i tala atu o le togālauapi, e vāvā mamao ma le togālauapi; ‘ua ia fa‘aigoa ai fo‘i, le fale ‘ie o le fa‘apotopotoga; ‘ona ō ai lea o i latou uma ē na sā‘ili i le ALI‘I i le fale ‘ie o le fa‘apotopotoga i tala atu o le togālauapi.

8A o‘o ‘ina alu atu Mose i le fale ‘ie, ‘ona tutū lea i luga o le nu‘u ‘atoa uma, ‘ua ta‘itasi ma tu mai i le faitoto‘a o lona fale ‘ie, ‘ua latou tulimata‘i ‘iā Mose, ‘ina se‘ia ulu atu ia i le fale ‘ie.

9‘Ua ulu atu Mose i le fale ‘ie, ‘ona ifoifo ai lea o le ao fa‘aniutū, ‘ua tu fo‘i i le faitoto‘a o le fale ‘ie; ‘ona fetalai mai lea o le ALI‘I ‘iā Mose.

10‘Ua iloa e le nu‘u ‘atoa uma o le ao fa‘aniutū, o lo‘o tu i le faitoto‘a o le fale ‘ie, ‘ona tula‘i lea o le nu‘u uma, ma ifo atu ai, e ta‘ito‘atasi i le faitoto‘a o lona fale ‘ie.

11‘Ua fetalai mai fo‘i le ALI‘I ‘iā Mose, o lo‘o fesagai lava, fa‘apei o le tagata ‘ona tautalatala ma lana uō; ‘ua fo‘i atu Mose i le togālauapi, a o lana ‘au‘auna o Iosua, o le atali‘i o Nuno, o le taule‘ale‘a, e le‘i alu ‘ese lava o ia i le fale ‘ie.

‘Ua Folafola e le Ali‘i e ō ma Isaraelu

12‘Ua fai atu fo‘i Mose i le ALI‘I, “Silasila mai, ‘ua e fetalai mai ‘iā te a‘u ‘‘Ia ‘ou ‘aveina a‘e le nu‘u nei,’ a ‘e te le‘i fa‘ailoa mai, po o ai ‘e te ‘auina mai ma te to‘alua, a ‘ua e fetalai mai fa‘apea, ‘‘Ua ‘ou iloa oe i lou lava igoa, ‘ua alofagia fo‘i oe e a‘u.’

13O lenei, ‘āfai ‘ua alofagia a‘u e oe, ‘ia e fa‘ailoa mai ‘iā te a‘u lou ala, ‘ina ‘ia ‘ou iloa oe, ‘ina ‘ia alofagia a‘u e oe, ma ‘ia e manatu o ou tagata le nu‘u nei.”

14‘Ona fetalai mai lea o le ALI‘I, “Tā te ō atu lava ma a‘u; ‘ou te avatua fo‘i le mapusaga mo oe.”

15‘Ona tali atu lea o ia ‘iā te ia, “Pe ‘āfai tā te lē afio atu ma oe, ‘aua le ‘aveina a‘e i matou nai le mea nei.

16Se a lava le mea e iloa ai ‘ua alofagia a‘u e oe, o a‘u ‘atoa ma lou nu‘u, na o lea, ‘ina ‘ua e afio atu fa‘atasi ma i matou? ‘Ona vavae‘eseina lea o i matou, o a‘u ma lou nu‘u ai nu‘u uma lava i le fogā‘ele‘ele.”

17‘Ona fetalai mai lea o le ALI‘I ‘iā Mose, “O le mea ‘ua e fai mai ai na ‘ou te faia lava, auā ‘ua alofagia oe e a‘u; ‘ua ‘ou iloa fo‘i oe i lou lava igoa.”

18‘Ona fai atu lea o Mose, “‘Ia e fa‘aali mai ‘iā te a‘u lou mamalu.”

19‘Ona fetalai mai lea o ia, “‘Ou te fa‘aui atu lo‘u lelei uma i ou luma; ‘ou te ta‘u atu fo‘i le igoa, ‘O le ALI‘I’ i ou luma; ‘ou te alofa atu fo‘i i ē ‘ou te fia alofa atu i ai, ma ‘ou alofa, mutimutivale i ē ‘ou te fia alofa mutimutivale i ai.”Roma 9.15

20‘Ua ia fetalai mai fo‘i, “‘E te lē mafaia ‘ona va‘ai mai i o‘u mata; auā e lē mafai ‘ona va‘ai mai lava se tagata ‘iā te a‘u, ma ola pea ia.”

21‘Ua fetalai mai le ALI‘I, “Fa‘auta i le mea e latalata ane ‘iā te a‘u, ‘e te tu ai i luga o le papa,

22a ui ane ai lo‘u mamalu, ‘ou te tu‘uina oe i le māvaevae o le papa, ‘ou te ufitia oe i lo‘u lima se‘ia mavae ane a‘u;

23a a‘u ‘ave ‘ese lo‘u lima, ‘ona e iloa mai lea o lo‘u tua; a o o‘u mata e le va‘aia lava ia.”