Sirako 38 - Revised Samoan Catholic Bible

O le Poto Fa‘afoma‘i

1‘Ia e fa‘aaloalo i le foma‘i auā e aogā lava o ia;

auā ‘ua faia o ia e le Silisili‘ese.

2Auā e mai le Atua le soifua mālōlōina,

e talia e le foma‘i ni mea alofa mai le tupu.

3O le a‘oa‘oina o le foma‘i e ea ai lona ao,

e vi‘ivi‘ia lava ia i luma o ē mamalu.

4O le Silisili‘ese ‘ua na fa‘atupuina o vaila‘au mai le lau‘ele‘ele,

e lē ‘ino‘ino i ai le tagata fa‘autauta.

5Pe na lē ‘avea ‘ea le vai ‘o‘ona ma vai māgalo i le la‘au?

6E ao ‘ina iloa e tagata lo latou aogā; ma ‘ua foa‘iina mai e le Silisili‘ese le poto i tagata,

‘ina ‘ia fa‘aaloaloina i latou i ana galuega ofoofogia.

7O vaila‘au e fa‘amālōlōina a‘i, e ‘ave‘esea a‘i le tigā;

e palua ai e le faivai ni vai aogā,

na te faia ni vaimili e fa‘amālōlōina a‘i o tagata ma ‘ua lē uma ai ana galuega,

8a ‘ua o‘o mai le filemū o le Atua i luga o le lau‘ele‘ele.

9Lo‘u atali‘i e,

‘āfai ‘ua e ma‘i, ‘aua ‘e te tu‘ulafoa‘i ‘iā te oe;

‘ae ‘ia e tatalo atu i le Ali‘i, o ia na te fa‘amālōlō ‘iā te oe.

10‘Ia e ‘alo ‘ese i soligātulafono, ‘ia e fa‘asagatonu ou lima,

‘ia e fa‘amamā lou loto a‘i agasala uma lava.

11‘Ia e momoli le mea manogi ma le falaoa mata aupito lelei,

‘ia faia se taulaga lololo, ‘ona e vala‘au ai lea i le foma‘i.

12Auā ‘ua faia lava ia e le Atua; ‘aua le ‘alo ‘ese o ia ‘iā te oe,

auā e matuā aogā ana galuega ‘iā te oe.

13Auā e o‘o i se aso ‘e te pa‘ū ai lava i o latou lima;

14‘ae latou te fa‘atoga atu i le Atua ‘ina ‘ia ala mai ‘iā te i latou le filemū

ma le mālōlōina o le tino, ‘ona o a latou asiasiga.

15O lē agasala i luma o lē ‘ua na faia o ia,

e pa‘ū o ia i lima o le foma‘i.

O le Fa‘anoanoa i le Tagata Oti

16Lo‘u atali‘i e,

‘ia e liligi ou loimata i le tagata oti,

ma ‘ia e amata le lauaitu e pei o sē ‘ua fa‘asauāina lava ia;

‘ia e teu lona tino i le ala e tatau ai,

‘aua fo‘i ‘e te fa‘atamala i le falelauasi ‘iā te ia.

17‘Ia e tagi lotulotu i ai e tusa ma le aso e tasi,

‘ina ne‘i faia ai ni tala leaga, ‘ona toe mafanafanaina lea o lou loto.

18‘Ia e fa‘anoanoa, e tusa ma le mamalu o lē ‘ua oti,

po o se aso e tasi, po o le lua, ‘ina ne‘i ta‘uleagaina ai oe.

19Auā o le fa‘anoanoa e televave mai ai le oti, e gau a‘i le malosi;

o le fa‘anoanoa o le loto e punou a‘i le ulu o le tagata.

20E tumau le fa‘anoanoa i lē pagātia,

a o le ‘oloa o le tagata mativa, o le fiafia lea o lona loto.

21‘Aua ‘e te tu‘u atu lou loto i le fa‘anoanoa,

‘ae ‘ia e tuli ‘ese lava ‘iā te oe ma ‘ia e manatua lou i‘uga.

22‘Aua ne‘i galo ‘iā te oe, auā e leai sē toe fo‘i mai;

e lē aogā oe ‘iā te ia, a e fa‘aleagaina oe e oe.

23‘Ia e manatua lo‘u i‘uga; auā e fa‘apea fo‘i lo oe i‘uga.

O a‘u i le asō, a o oe a taeao.

24A ta‘oto ma le filemū le tagata oti, ‘ia filemū fo‘i ma le manatu ‘iā te ia,

tau ‘ona ‘ua e fa‘amafanafana i ai ‘ina ‘ua mavae atu o lona agaga.

O Tagata Faigaluega

25O le poto o le tusi‘upu e maua i aso e mapu ai o ia;

e ‘avea ma tagata poto o lē ‘ua leai ni ana galuega e tele e fai.

Fa‘apefea ‘ona fa‘atumuina i le poto,

26o le tagata na te ta‘ita‘iina le suō tōsina,

o lē ‘ua mimita i lana tui ma fa‘aoso a‘i ana povi,

lē ‘ua fa‘atasi ma i latou ‘iā latou galuega ma ‘ua talatala tasi i tama‘i o le lafu povi?

27E sagai lona loto i le suatia tonu o lona fanua;

o lona to‘aga, o le fa‘apeti o ana povi fafine.

28E fa‘apea fo‘i le tufuga ma le matai tufuga, la te galulue i le po e pei lava o le ao;

o lē na te tāina o tusiga, i fa‘amaufa‘ailoga,

o lona to‘aga o le fa‘a‘ese‘ese o fa‘ailoga ‘ua i ai;

e sagai lona loto i le tāina o le tusiga ma ‘ua fa‘ai‘u lana galuega i leoleoga o le po.

29E fa‘apea fo‘i le tu‘ifao ‘ua nofo i tala ane o le u‘amea talitā,

o va‘ava‘ai i le fasi u‘amea e galue ai; o le asu mai le afi e fa‘amagumagu a‘i lona tino;

na te ‘onosa‘i fo‘i i le ‘a‘asa o le ‘ogāumu.

30O le pa‘ō o le samala e saga fa‘alogo i ai lona taliga,

a o ona mata e sagai atu pea i le ata o le mea na te gaosia.

31E fa‘asaga lona loto i le fa‘amae‘a o ana galuega,

e filigā lava i le teuina ma le lelei ‘atoa.

32E fa‘apea lava le fai ipu ‘omea, e nofo i lana galuega,

o vili lana uili i ona vae, e to‘aga tasi pea o ia i lana galuega,

o le fia gaosi ni ipu ‘ia lava.

33O ona lima na te palu ai le ‘omea,

na te fa‘avaivai le ‘omea ‘atoa i luma o ona vae.

34‘Ua popole lona loto e fa‘amae‘a le vali o le ipu;

e fa‘amamāina lona ‘ogāumu i le mataala ai i le po.

35O i latou uma ia e fa‘alagolago lava i o latou lima,

‘ua popoto i latou, ta‘itasi i lona ia faiva.

36E aunoa ma i latou ia e lē faia se ‘a‘ai.

37Latou te lē tu‘ua o latou fale, e lē fai malaga i latou,

e lē taulia i latou i le fa‘apotopotoga.

38E lē nonofo i latou i le nofoa o le fa‘amasino,

latou te lē lagona tulafono o fa‘amasinoga,

latou te lē fa‘amatalaina o a‘oa‘oga ma tulafono,

e lē maua mai ‘iā i latou ni fa‘ata‘oto.

39‘Ae latou te fa‘atumauina mea fa‘aletino,

‘ua talileleia i latou ‘ona o galuega o lo latou faiva;

e fa‘asaga atu i ai o latou agaga ma ‘ua latou sā‘ili le tulafono a le Silisili‘ese.