Iopu 24 - Revised Samoan Catholic Bible

O Toe ‘Upu o le Tali a Iopu ‘iā Elifasa

1“‘Ua lē lilo tausaga i Lē e ona le malosi uma lava,

o lenei, se a le mea ‘ua, lē iloa ai ona aso e i latou ‘ua masani ma ia?

2‘Ua si‘i tuā‘oi nisi; ‘ua latou faoa le lafu mamoe, ma latou fafaga ai.

3‘Ua latou ‘avea le asini a ē na aumatuā,

‘ua latou ‘ave le povi a le fafine ‘ua oti lana tane e fai ma mea tu‘u fa‘afa‘atau.

4‘Ua latou tuleia ē ‘ua matitiva nai le ala;

‘ua lalafi fa‘atasi ai o ē ‘ua puapuagātia i le nu‘u.

5Fa‘auta, e pei o asini o le vao,

latou te ō atu ai ‘iā latou galuega,

e ala sā‘ili i se mea e fao;

o le vao latou te maua mai ai mea e ‘ai ma a latou fānau.

6‘Ua latou selesele mea e faga a‘i a latou manu i le fanua ‘ese;

‘ua latou tau le fua o le tō vine ‘ua maua i le amio leaga.

7‘Ua aoina o latou o fa‘asautia o ē matitiva,

e leai fo‘i so latou ‘ie afu i le ma‘alili.

8‘Ua susū i latou i le timuga i mauga,

‘ua fa‘amalu fo‘i i le papa ‘ina ‘ua leai se mea e malu ai.

9“‘Ua latou faoa nai fānau iti mai o latou tinā ‘ua oti o latou tamā,

ma fa‘atau atu e totogi a‘i ‘aitalafu.

10O i latou ‘ua fealua‘i telenoa ma le lē lavalavā;

‘ua fia ‘a‘ai fo‘i i latou o ē tautu‘u a latou fusi saito.

11‘Ua latou tatau le suāu‘u i o latou fale,

‘ua latou solisoli i o latou soligāvine, a ‘ua latou fia inu.

12O lo‘o feoi tagata i le ‘a‘ai, o lo‘o ‘alalaga fo‘i o ē ‘ua manunu‘a;

‘ae le‘i fa‘afofoga le Atua ‘iā latou tatalo.

13“E i ai nisi e ‘ino‘ino i le malamalama;

latou te lē iloa ona ala, latou te lē tumau fo‘i i ona magāala.

14‘Ua tula‘i i le vave ao le fasi tagata,

‘ua ia fasioti i lē ‘ua puapuagātia ma lē ‘ua mativa;

‘ua pei o se gaoi fo‘i o ia i le po.

15‘Ua fa‘atalitali fo‘i le tagata mulilua i le segisegi,

o lo‘o fa‘apea ifo, ‘E lē iloa a‘u e se tasi;’

‘ua ia ufiufi fo‘i ona mata.

16Latou te uluulu i fale i le po,

‘ae lalafi i le ao;

auā latou lē manana‘o i le malamalama.

17Auā e fiafia i latou i le po nai lo le ao,

e lē fefefe fo‘i i latou i le mata‘utia o le po.

18“E tusa i latou ma se mea māmā i luga o le vai;

‘ua fa‘afanoina o latou tofi i le lalolagi;

‘ua lē fa‘asaga i latou i le ala i tōvine.

19‘Ua fa‘aumatia vai kiona i le lā ma le vevela,

e fa‘aumatia fo‘i o ē agasala i le tu‘ugamau.

20E fa‘agalogaloina o ia e le manava o lona tinā,

e suamalie o ia i ilo, e lē toe manatua o ia;

e gauia fo‘i lē ‘ua amioletonu e pei o le la‘au.

21“E agaleaga o ia i le fafine pā ‘ua lē fānau;

‘ua ia lē agalelei fo‘i i le fafine ‘ua oti lana tane.

22E gausia e le Atua o ē ‘ua malolosi i lona malosi;

a tula‘i le Atua, ‘ona lē fa‘atuatua ai lea o se tasi i lona ola.

23E tu‘uina e le Atua ‘iā te ia ‘ia saogalemū,

‘ua ia fa‘alagolago fo‘i i ai;

e silasila fo‘i o ia i o latou ala.

24E fa‘amaualulugaina i latou i nai aso,

‘ona leai lea o i latou; ‘ua fa‘aumatia fo‘i i latou,

‘ua fa‘apotopotoina e pei o tagata uma;

e salaina fo‘i i latou e pei o le tumutumu o ‘au o saito.

25‘Āfai e lē fa‘apea,

O ai sē na te fa‘ailoa mai lo‘u pepelo,

ma fa‘alēaogāina la‘u ‘upu?”