Sirako 21 - Revised Samoan Catholic Bible

O le ‘Ino‘ino i le Agasala

1Lo‘u atali‘i e, ‘ua e agasala ‘ea? ‘Aua la ‘e te toe faia;

‘ae talosaga atu ‘ona o agasala na e mua‘i faia, ‘ina ‘ia fa‘amāgaloina.

2‘Ia e ‘alo ‘ese i le agasala e pei ‘ona ‘alo ‘ese i le gata;

‘āfai ‘e te fa‘alata atu i ai, e utia ai oe.

3O ona nifo, o nifo o le leona, e fasiotia ai agaga o tagata.

4O amioga leaga uma ‘ua pei o se pelu e fa‘atauma‘ai ona itū e lua;

a manu‘a ai, e lē ai se fofō.

5O le fa‘amata‘u ma le ‘upuvale e fa‘aumatia ai le ‘oloa,

a o le ‘āiga o le mau‘oloa e fa‘aumatia ‘ona o le fa‘amaualuga;

e lia‘i‘eseina fo‘i le ‘oloa a le tagata fa‘afiasili.

6E taunu‘u lava i ona taliga le ōlega a‘i laugutu o le tagata mativa,

‘ona fa‘afuase‘i lea ‘ona pesi mai ‘iā te ia le fa‘amasinoga.

7O lē ‘ino‘ino i le a‘oa‘iga e savali o ia i tulagāvae o le tagata agasala,

a o lē mata‘u i le Atua e liliu atu i ai lona loto ‘atoa.

8E iloa mamao mai le tagata ‘ua malosi lona laulaufaiva,

‘ae iloa o le tagata mafaufau le itūlā ‘ua sasi ai o ia.

9O lē ‘ua fa‘atū lona fale i tupe ‘ese ‘ua pei o le tagata na te fa‘aputuputu ma‘a mo le vaitausaga malūlū.

10O le fa‘apotopotoga o tagata agasala, o se fa‘aputuga vavae,

e i‘u ‘ina mū i le afi.

11O le ala o tagata agasala, o le ala tanu i ma‘a tetele,

a o lona i‘uga o seoli ma le pogisā ma le puapuagā. O le Tagata Poto ma le Tagata Valea

12O lē tausi i tulafono, na te pulea ona lava manatu.

13O le fua o le mata‘u i le Atua, o le poto lea ma le mafaufau.

14E lē maua le a‘oa‘oga e le tagata ‘ua lē faipoto i le amio lelei.

15‘Ae ‘ua i ai ma le poto e fua mai i ni amio leaga e tele;

‘ua leai se mafaufau o le tagata pe ‘āfai ‘ua tigā lona loto.

16O le atamai o le tagata poto e fa‘ateleina e pei o se vai ‘ua lolo,

‘ae mautū ana fa‘atonuga e pei o se punāvai ola.

17O le loto o le vale e pei o se ipu ‘ua ta‘e, e lē tāofia ai lava se poto.

18‘Ai se tagata poto ‘ua fa‘alogo o ia i se ‘upu loloto,

‘ua vivi‘i atu lava ia i ai ma fa‘aaogā mo ia lava;

a fa‘alogo i ai le tagata ulavale, e ‘ino‘ino lava i ai ma togi ai i ona tua.

19O le tala a le tagata valea ‘ua pei o se avega i le tagata malaga,

a o laugutu o le tagata mafaufau e maua ai le ‘upu mālie.

20E sā‘ilia i le fa‘apotopotoga o laugutu o le tagata poto,

latou te mafaufau i ana ‘upu i o latou lava loto.

21E pei o se fale ‘ua lepetia, e fa‘apea le poto i le mafaufau o le vale;

o ni ‘upu ‘ua so‘ona fai, o le poto lenā o le vale.

22E pei o ni noanoaga i ona vae, e fa‘apea le a‘oa‘oga i le tagata valea,

e pei o se filifili u‘amea i lona lima taumatau.

23A ‘ata le vale, e ta‘alili ai lona leo;

a o le tagata poto e fa‘aleleoa lana ‘ata, e seāseā fo‘i ‘ona ‘ata o ia.

24O le a‘oa‘oga ‘ua pei o se teu auro i le tagata mafaufau,

e pei o se taulima i lona lima taumatau.

25E televave atu le savali a le vale i le fale o lē la te tuā‘oi,

a o le tagata poto e tu fa‘aeteete lava ia i luma o le tagata mamalu.

26O le vale e tilotilo lava ia i le fa‘amalama o le fale,

a o le tagata a‘oa‘oina e tu lava ia i fafo.

27O le fa‘alogologo i le faitoto‘a, o le mea fa‘avalea lea;

‘ana mafaufau le tagata, po ‘ua mafatia ai lava ia i le māsiasi.

28O laugutu o ē vālelea e pa‘u‘ū mai ai tala fa‘atauva‘a,

a o ‘upu a ē popoto e fuatia i le fua fa‘atautau.

29O le loto o le vale ‘ua i ona laugutu,

a o laugutu o le tagata poto ‘ua i lona loto.

30A fa‘afano le tagata amio leaga ‘iā Satani, ‘ua fa‘afano o ia i lona lava agaga.

31O lē fela‘ua‘i tala e fa‘a‘ele‘elea e ia lona lava agaga,

e ‘inosia o ia e tagata uma; ‘ai sē nofo fa‘atasi ma ia, e ‘inosia fo‘i o ia;

‘ae fa‘amamaluina le tagata fa‘alogologo ma le mafaufau.