Fa‘ata‘oto 15 - Revised Samoan Catholic Bible

1O le tali filemū e liliu‘eseina ai le ita;

a o le ‘upu fa‘atigā e tupu ai le ita.

2O laulaufaiva o ē popoto e fa‘afiafia tagata i le poto;

a o gutu o ē vālelea e luai mai ai le valea.

3O lo‘o i mea uma lava fofoga o le ALI‘I;

o lo‘o matuā silasila i ē amio leaga ma ē amio lelei.

4O le laulaufaiva e mālōlō ai, o le la‘au o le ola lea;

a o le laulaufaiva fa‘api‘opi‘o e momomo ai le loto.

5E tete‘e atu e le vale le a‘oa‘o atu a lona tamā;

a o lē usiusita‘i i le a‘oa‘iga, e fa‘autauta lava ia.

6O lo‘o i le fale o lē amiotonu le ‘oloa e tele;

a o le puapuagā, ‘ua i ai lea i mea e maua o lē ‘ua amio leaga.

7E fa‘asalalauina le poto i laugutu o ē popoto;

‘ae lē fa‘apea loto o ē vālelea.

8O le taulaga a ē amio leaga e ‘inosia lea e le ALI‘I;

a o le tatalo a ē amio sa‘o o lona lea fiafia.

9E ‘inosia e le ALI‘I le ala o ē amio leaga;

‘ae alofa o ia i lē ‘ua tausisi atu i le amiotonu.

10E leaga le a‘oa‘iga i lē ‘ua tu‘ua le ala,

o lē ‘ino‘ino i le a‘oa‘iga, e oti lava ia.

11O seoli ma le malaia, o lo‘o i luma o le ALI‘I ia;

e lē sili ‘ea ‘ona fa‘apea loto o tagata?

12E lē alofa le tauemu i le a‘oa‘i atu ‘iā te ia;

na te lē alu atu i ē popoto.

13O le loto fiafia e tupu ai mata fiafia;

a o le loto fa‘anoanoa e momomo ai le agaga.

14O le loto o lē ‘ua mafaufau, ‘ua sā‘ili lea i le poto;

a o gutu o ē vālelea ‘ua ‘a‘ai i le valea.

15O aso uma o lē ‘ua tigāina, ‘ua leaga ia;

a o le loto fiafia o le tausamiga e lē aunoa lea.

16E sili ‘ona lelei o se mea itiiti, a o i ai le mata‘u i le ALI‘I,

i le ‘oloa tele, a o i ai le atuatuvale.

17E sili ‘ona lelei o le fa‘aalumaga o la‘au ‘aina,

a o i ai le alofa, i le povi a‘i le fale povi, a o i ai le ‘ino‘ino.

18O le tagata lotoa, na te fa‘atupuina le misa;

a o lē fa‘ato‘ato‘a e tu‘u lelei ‘iā te ia le finauga.

19O le ala o le paiē, e tusa ma le ‘ai la‘au tuitui;

a o le ala o ē amio sa‘o, e fa‘alauleleiina lea.

20O le atali‘i poto e fa‘afiafia e ia le tamā;

a o le tagata valea, e fa‘alēaogāina e ia lona tinā.

21O le valea, o le mea e ‘oli‘oli ai lea i lē ‘ua leai sona mafaufau;

a o le tagata fa‘autauta, ‘ua savali o ia ma le amio sa‘o.

22E fa‘alēaogāina mafaufauga pe a leai se filifiliga;

‘ae fa‘atumauina i le to‘atele o faipule.

23O lo‘o i ai le fiafia i le tagata i le tali atu a lona gutu;

ma le ‘upu i ona aso ‘ua tatau i ai, e lelei na‘uā lea.

24O le ala o le ola, o lo‘o i luga lea i lē ‘ua poto;

‘ina ‘ia ‘alo ‘ese ai o ia i seoli i lalō.

25E lia‘iina e le ALI‘I le fale o ē fa‘amaualuga;

‘ae fa‘atumauina e ia le tuā‘oi o le fafine ‘ua oti lana tane.

26E ‘inosia e le ALI‘I mafaufauga o lē ‘ua leaga;

‘ae sao ‘ona lelei o ‘upu matagofie.

27O lē ‘ua matape‘ape‘a i le ‘oloa, e fa‘atigāina e ia lona lava ‘āiga;

a o lē ‘ino‘ino i mea alofa, e ola o ia.

28E mānatunatu le loto o lē amiotonu, ‘ina ‘ia fai se tali;

a o gutu o ē amio leaga, e luai mai ai mea leaga.

29E mamao le ALI‘I i ē amio leaga;

‘ae fa‘afofoga mai o ia i le tatalo a ē amiotonu.

30O le malamalama o mata e fiafia ai le loto;

o le tala lelei e lololo ai ivi.

31O le taliga ‘ua fa‘alogo i le a‘oa‘iga e ola ai,

e mau lea fa‘atasi ma ē popoto.

32O lē na te te‘ena mea e a‘oa‘oina, e fa‘alēaogāina e ia lona lava ola;

a o lē fa‘alogo i le a‘oa‘iga, e maua e ia le poto.

33O le mata‘u i le ALI‘I, o le a‘oa‘oina lea e poto ai;

e muamua fo‘i le fa‘amaulalo i le vi‘ia.