Salāmo 31 - Revised Samoan Catholic Bible

O le Fa‘atuatua i le Atua i ona Po o le PuapuagāMa le usu pese. O le salāmo a Tavita

1Le ALI‘I e,

‘ou te fa‘atuatua lava ‘iā te oe;

‘aua ne‘i fa‘amāina a‘u e o‘o i le fa‘avavau;

‘ia e lavea‘i mai ‘iā te a‘u i lau amiotonu.

2‘Ia e liliu mai ou fofoga ‘iā te a‘u;

‘ia e vave lavea‘i ‘iā te a‘u;

‘ia fai oe mo‘u papa malosi,

o le ‘olo mauga ‘ou te ola ai.

3Auā o oe lava lo‘u papa ma lo‘u ‘olo;

‘ia e ta‘ita‘i mai ma tausi ‘iā te a‘u ‘ona o lou suafa.

4‘Ia e ‘ave ‘ese ‘iā te a‘u i lea lava ‘upega na latou natia ‘ia maua ai a‘u;

auā o oe lava lo‘u malosi.

5‘Ou te tu‘uina atu lo‘u agaga i lou ‘a‘ao;

le ALI‘I e, le Atua fa‘amaoni, ‘ua e togiolaina a‘u.

6‘Ou te ‘ino‘ino i ē ‘ua ‘ana‘ana i mea fa‘atauva‘a ma le pepelo;

‘ae ‘ou te fa‘atuatua lava i le ALI‘I.

7‘Ou te fiafia ma ‘ou ‘oli‘oli i lou alofa mai;

auā ‘ua e silasila i lo‘u tigā;

‘ua e silafia a‘u ‘ina o puapuagātia.

8‘Ua e lē tu‘uina fo‘i a‘u i le pule a ē ita mai ‘iā te a‘u;

‘ua e fa‘atūina o‘u vae i le mea lautele.

9Le ALI‘I e,

‘ia e alofa mai ‘iā te a‘u,

auā na ‘ou puapuagā;

‘ua fole o‘u mata, ‘atoa ma lo‘u agaga ma lo‘u manava i le tigā.

10Auā ‘ua fa‘auma lo‘u ola i le fa‘anoanoa,

ma o‘u tausaga i le mapuitigā;

‘ua fa‘avaivaiina lo‘u malosi i a‘u agasala,

‘ua gagase fo‘i o‘u ivi.

11‘Ua fa‘alumaina a‘u e i latou uma o ē ita mai ‘iā te a‘u,

‘ae sili lava i latou matou te tuā‘oi;

‘ua ‘avea a‘u ma fa‘amata‘u i ē sa matou masani;

‘ua sōsōla ‘ese ‘iā te a‘u o ē iloa mai a‘u i fafo.

12‘Ua fa‘agalogaloina a‘u e pei o lē ‘ua oti,

‘ua lē manatua lava peiseaī a‘u se ipu ‘ua nutilili‘i.

13Auā ‘ua ‘ou fa‘alogo i le fa‘aleaga mai e le to‘atele;

‘ua si‘osi‘omia a‘u e le mata‘u,

‘ona ‘ua latou taupulepule fa‘atasi ‘iā te a‘u,

‘ua latou manatu i se togafiti ‘ou te oti ai.

14‘Ae peita‘i a‘u nei,

‘ou te fa‘alagolago ‘iā te oe le ALI‘I e,

‘ou te fa‘apea atu, “O oe lava o lo‘u Atua.”

15O lo‘o i ou ‘a‘ao o‘u aso;

‘ia e lavea‘i mai ‘iā te a‘u a‘i lima o ē ita mai,

ma ē ‘ua tuliloa mai ‘iā te a‘u.

16‘Ia malamalama mai ou fofoga i lau ‘au‘auna;

‘ia e fa‘aola mai ‘iā te a‘u ‘ona o lou alofa.

17Le ALI‘I e,

‘aua ne‘i fa‘amāina lava a‘u,

auā ‘ou te vala‘au ‘iā te oe;

‘ia fa‘amāina o ē fai amio leaga

‘ia fa‘alologo i latou i seoli.

18‘Ia fa‘alologo laugutu pepelo o ē tautala fa‘asiasia,

ma le fa‘amaualuga ma le ‘ino‘ino i le tagata amiotonu.

19‘Ua tele lava lou agalelei,

‘ua teua e oe mo ē ‘ua matata‘u ‘iā te oe,

‘ua e faia i luma o le fānau a tagata

mo ē fa‘atuatua ‘iā te oe.

20E natia i latou ē oe i le mea lilo i ou luma,

‘ia lē o‘o ‘iā te i latou taupulepulega a tagata;

‘e te fa‘alilo ‘iā te i latou i lou fale apitaga,

‘ina ‘ia lē o‘o ai le finauga a laulaufaiva.

21Fa‘afetai i le ALI‘I,

auā na ia fa‘asilisili lona alofa ‘iā te a‘u

i le ‘a‘ai nofo ‘olo.

22O a‘u fo‘i na ‘ou fai atu i lo‘u polepole vale,

“‘Ua fa‘ate‘aina a‘u a‘i ou luma;”

‘ae peita‘i ‘ua e fa‘afofoga mai i le leo

o la‘u ‘ai‘oi atu i lo‘u ‘alaga atu ‘iā te oe.

23O ‘outou na uma lava o ona tagata amio Atua,

‘ia ‘outou alolofa atu i le ALI‘I;

e leoleoina e le ALI‘I o ē fa‘amaoni,

‘ae matuā tauia e ia o ē amio fa‘amaualuga.

24O ‘outou na uma lava, o ē fa‘amoemoe i le ALI‘I,

‘inā fa‘alototetele ia;

e fa‘amalolosia fo‘i e ia o ‘outou loto.