Salāmo 21 - Revised Samoan Catholic Bible

O le Salāmo e Fa‘afetai ai i le Manuia ‘ua MauaMa le usu pese. O le salāmo a Tavita

1Le ALI‘I e,

e ‘oli‘oli le tupu i lou malosi;

e matuā fiafia lava ia i lau fa‘aolataga.

2‘Ua e foa‘iina ‘iā te ia le mana‘o o lona loto;

‘ua e lē fa‘afiti fo‘i ‘iā te ia le mea na ole atu ai ona laugutu. Selā.

3Auā ‘ua tomua mai ‘iā te ia le manuia silisili mai ‘iā te oe;

‘ua e fa‘ae‘e i lona ao le paleali‘i auro lelei.

4Na ia fa‘atogaina atu ‘iā te oe ‘ina ‘ia ola,

‘ona e foa‘iina mai ai lea ‘iā te ia

o le ola tulu‘i e fa‘avavau fa‘avavau lava.

5‘Ua tele lava lona mamalu i lau fa‘aolataga;

‘ua e fa‘ae‘etia i ona luga le vi‘iga ma le matagofie.

6Auā ‘ua e tu‘uina ‘iā te ia le manuia e o‘o i le fa‘avavau;

‘ua e fa‘a‘oli‘oliina o ia i le fiafia i ou luma.

7Auā ‘ua fa‘atuatua le tupu i le ALI‘I;

‘ona o le alofa o lē Silisili‘ese e lē fa‘agae‘etia ai o ia.

8E maua o lou ‘a‘ao o i latou uma o ē ita ‘iā te oe;

e maua lava e lou ‘a‘ao taumatau o ē ‘ino‘ino ‘iā te oe.

9‘E te faia i latou e pei o le umu ‘a‘asa i ona po o lou to‘asā;

e fa‘aumatia i latou e le ALI‘I i lona to‘asā,

e fa‘aumatia i latou i le afi.

10E fano lava ‘iā te oe o latou gafa a‘i le lalolagi,

ma a latou fānau e fano ia nai le fānau a tagata.

11Auā na latou manatu i se mea leaga ‘ia o‘o ‘iā te oe;

‘ua latou mafaufau i se togafiti leaga,

‘ae latou te lē mafaia.

12Auā ‘e te fa‘aliutuaina mai i latou,

‘e te saunia au fu‘a e fana atu ai ‘iā te i latou.

13Le ALI‘I e,

‘ia fa‘asilisiliina oe i lou malosi;

matou te pepese ma fai pesega i lou mana.