Daniel Greek 9 - Revised Samoan Catholic Bible

O le Tatalo a Tanielu ma Vaiasosa e Fitugafulu

1O le tausaga muamua o Tariu le atali‘i o Asueru, o lē na tupu mai Metai, sa fai o ia ma tupu i le mālō o Kaletaia,

7“Le Ali‘i e, ‘ua ‘iā te oe le amiotonu, a ‘ua ‘iā te i matou le māsiasi, pei ‘ona i ai i ona po nei, ‘ua i tagata o Iuta ma ē sa nonofo i Ierusalema ma Isaraelu uma, o ē ‘ua latalata mai, ‘atoa ma ē ‘ua mamao i nu‘u uma na e tulia ai i latou, ‘ona o a latou agasala na latou agasala ai ‘iā te oe.

8Le Ali‘i e, ‘ua ‘iā te i matou le māsiasi, o matou tupu ma o matou ali‘i, ‘atoa ma o matou tamā, auā ‘ua matou agasala ‘iā te oe.

9O lo‘o i le Ali‘i, lo matou Atua, le alofa mutimutivale ma le fa‘amāgaloina o sala, auā ‘ua matou fouvale ‘iā te ia.

15“O lenei, le Ali‘i e, lo matou Atua, o lē na ‘aumaia lou nu‘u ma le ‘a‘ao malosi a‘i le nu‘u o Aikupito, ‘ua e maua fo‘i vi‘iga e pei ‘ona fai i nei ona po; ‘ua matou agasala, ‘ua matou amio leaga.

16Le Ali‘i e, ‘ou te ‘ai‘oi atu ‘iā te oe, ‘ona o lau amiotonu uma, ‘ia e liliu‘eseina lou to‘atama‘i ma lou to‘asā a‘i lau ‘a‘ai o Ierusalema, o lou mauga pa‘ia; auā o a matou agasala, ma amioletonu a o matou tamā ‘ua ‘avea ai Ierusalema ‘atoa ma lou nu‘u ma luma e i latou uma o ē vagavagai mai ‘iā te i matou.

24“‘Ua ‘atofaina vaiasosa e fitugafulu i lou nu‘u ma lau ‘a‘ai pa‘ia, e fa‘auma ai le solitulafono ma fa‘ai‘u ai agasala; e fai ai fo‘i le togiola mo agasala, ma fa‘ao‘oina mai ai le amiotonu e fa‘avavau, e fa‘amaufa‘ailogaina fo‘i le fa‘aaliga ma le valo‘aga, e fa‘au‘uina ai fo‘i le mea e silisili ‘ona pa‘ia. se‘ia o‘o i le i‘uga o le mea ‘ua tu‘u pule i ai ma ‘ua fa‘ao‘o i lē na te fa‘atafunaina.”