Kenese 49 - Revised Samoan Catholic Bible

‘Ua Fa‘amanuia Iakopo i ona Atali‘i

1‘Ona ‘a‘ami lea o Iakopo ona atali‘i, ma na fa‘apea atu, “Fa‘apotopoto mai ia ‘outou, a a‘u fa‘aali atu ‘iā te ‘outou o mea e o‘o ‘iā te ‘outou i aso amulī.

2Fa‘apotopoto mai ia ma fa‘alogologo mai ‘outou atali‘i o Iakopo;

Ma fa‘alogologo mai ia i lo ‘outou tamā o Isaraelu.

3O Reupena, o la‘u ulumatua lava oe o lo‘u malosi,

ma lē na amata mai ai lo‘u mamalu,

o lē ‘ua silisili ‘ona mamalu, ‘ua silisili ‘ona malosi.

4‘Ua e oso vale pei o le vai,

e lē fa‘asili lava oe,

auā na e alu a‘e i le moega o lou tamā i le ‘ua leaga ‘iā te oe;

na alu a‘e ia i lo‘u moega.

5O Simeona ma Levi o le uso i lā‘ua;

‘ua fai a lā‘ua pelu ma ‘au‘upega e fa‘asauā ai.

6‘Aua ne‘i usita‘i lo‘u loto i la lā‘ua taupulepulega nanā;

‘aua ne‘i fa‘atasi lo‘u mamalu i lo lā‘ua potopotoga;

auā na la fasioti le tagata i lo lā‘ua ita,

o lo lā‘ua fīnau vale fo‘i na la fa‘apipili ai o vae o le povi.

7‘Ia fetu‘uina lo la ita ‘ina ‘ua silisili,

mo la ita tele lava ‘ina ‘ua la fīnau vale ai;

‘ou te vavaeina i lā‘ua i le nu‘u o Iakopo,

‘ou te fa‘ata‘ape‘apeina i lā‘ua i Isaraelu.

8O oe na Iuta, e vi‘ia oe e ou uso.

E o‘o lou lima i ua o ē ita ‘iā te oe,

e ifo ‘iā te oe le fānau a lou tamā.

9O le tama‘i leona Iuta;

lo‘u atali‘i e, ‘ua e alu a‘e nai le mea ‘ua saeia;

na ia ta‘oto, na ia fa‘apuga pei o le leona, e pei o se leona fafine.

O ai sē na te fa‘alili ‘iā te ia?

10E lē ‘avea le to‘oto‘o ‘iā Iuta,

po o le faipule a‘i ona vae se‘ia maliu mai Sailo,

e usiusita‘i fo‘i atunu‘u ‘iā te ia.

11O lo‘o nonoa lana asini i le vine,

ma lana tama‘i asini i le vine lelei;

o lo‘o ta ona ‘ofu i le uaina,

ma lona ‘ie pulupulu i le toto o le fua o le vine.

12E mūmū ona mata i le uaina,

e sisina ona nifo i le suāsusu.

13O Sepulona e tu matāfaga le mea e mau ai o ia.

E i ai fo‘i o ia i le mea e tau ai va‘a;

e o‘o fo‘i lona tuā‘oi i Saitonu.

14O Isakara e pei o le asini malosi o ia.

O lo‘o ta‘oto i le vā o avega e lua.

15‘Ua iloa atu e ia le mālōlōga ‘ua lelei,

ma le fanua ‘ua matagofie,

‘ona tu‘uina atu lea o lona ua i le ‘amoga,

‘ua fai fo‘i ma pologa e fai taulaga.

16E fa‘amasino e Tanu lona nu‘u.

Pei o le tasi itū‘āiga o Isaraelu.

17E fai Tanu ma gata i le ala o le mālō,

o le gata fe‘ai i le ala,

e utia ai mulivae o le solofanua,

e pa‘ū ai i tua lē ti‘eti‘e ai.

18Le ALI‘I e, ‘ua ‘ou fa‘amoemoe i le olataga mai ‘iā te oe.

19O Kato, e mālō se ‘au ‘iā te ia;

a o ia, e i‘u ‘ina mālō lava ia.

20Mai ‘iā Asera o mea lololo,

o lana mea e ‘ai lea;

o ia fo‘i na te avatua o mea e fa‘afiafia a‘i tupu.

21O Nafatali o le ‘aila ‘ua tatalaina atu ia,

o lē na te talatalaina atu i ‘upu lelei.

22O Iosefa o le la la‘au o ia e fua,

o le la la‘au e fua i tafatafa o le vaipuna,

e sosolo ‘ona la i luga i le pā.

23Na fa‘atigāina o ia e i latou o ē fanafana u;

na latou fanafana atu ‘iā te ia ma ita ‘iā te ia.

24A ‘ua tumau pea le malosi o lana ‘aufana,

o ona lima fo‘i ‘ua fa‘amalosia ia e ‘a‘ao o lē Malosi o Iakopo;

o lo‘o tupu mai ai fo‘i le leoleo mamoe o le ma‘a lea o Isaraelu.

25E a le Atua o lou tamā o le fesoasoani ‘iā te oe,

o Lē e ona le malosi uma lava

na te fa‘amanuia oe i manuia mai le lagi i lugā,

ma manuia mai le mea loloto o lo‘o i lalō,

e manuia o susu ma le manava.

26O manuia o lou tamā ‘ua sili lava ia i manuia o o‘u tupuga,

‘ua o‘o i le tuā‘oi lava o mauga o le vavau;

e o‘o pea lava ia i luga o le ulu o Iosefa,

ma le tumua‘i o lē na sili i ona uso.

27O Peniamina o le luko na te saeia;

o le taeao e ‘ai ai e ia le mea ‘ua maua;

o le afiafi e vavaeina ai e ia o mea ‘ua faoa.”

28O i latou ‘atoa nei o itū‘āiga e sefulu ma le lua o Isaraelu; o ‘upu fo‘i ia a lo latou tamā ‘iā i latou. ‘Ua ia fa‘amanuia ai fo‘i i latou, e ta‘ito‘atasi ma lona manuia ‘ua ia fa‘amanuia ai i latou.

O le Oti o Iakopo

29‘Ua fai atu fo‘i o ia ‘iā te i latou, o lo‘o fa‘apea atu ‘iā te i latou, “O le a fa‘aopoopoina atu a‘u i lo‘u nu‘u, ‘ia ‘outou tanu lava a‘u fa‘atasi ma o‘u tamā i le ana o lo‘o i le fanua o Eferona o le sa Hetī.