Poto Fa‘atomuaga - Revised Samoan Catholic Bible

Fa‘atomuagaO le tusi lenei sa tusia i le gagana Eleni e se tusitala Iutaia ‘ua poto lelei i le gagana Eleni. O lo‘o i ai se talitonuga o le tausaga po o le 50 T.L.M sa tusia ai lenei tusi i Alesania i Aikupito. O le tele o faiga ma mafaufauga o le tusitala e mafuli lava i manatu fa‘a-Iutaia fa‘apenā fo‘i ni mafaufauga fa‘a-Eleni e tau momoli atu ai le fe‘au o le Atua na te tauia i latou uma o ē fa‘amaoni ‘iā te ia. O le lasiga o le tusi e talanoa ai i le talatu‘u ta‘uta‘ua o le alofa mutimutivale o le Atua i lona nu‘u filifilia, e ala lea i lana tausiga ma lana lavea‘i mai o Isaraelu nai le nofo pologa i Aikupito. O le isi ‘autū tāua o le tusi o le fia fa‘ailoa mai lea o le tāua tele ma le aogā o le poto i le tagata.O le Fa‘asologa o Matā‘upu:O le taui lelei mo ē amiotonu ma le fa‘asalaga mo ē amio leaga 1.1—5.24O le vi‘ia o le poto 6.1—9.18E puipuia e le poto le tagata 10.1—12.27O le ‘inosia o le ifo i tupua 13.1—15.13O fa‘amanuiaga ma le malaia o Isaraelu a o latou tu‘ua Aikupito 15.14—19.20