Iutita 5 - Revised Samoan Catholic Bible

O le Fono a Holofene ma Ta‘ita‘i ‘Au

1Ma ‘ua ta‘ua mai e nisi ‘iā Holofene, le ta‘ita‘i o ‘au a tagata Asuria, ‘ua nofo sauni le fānauga a Isaraelu e tete‘e atu ‘iā te ia ma ‘ua latou punitia ala i mauga.

2‘Ona mū ai lea o lona loto i le tigā anoanoa‘i ma le ita tele, ‘ua vala‘au mai i ta‘imua uma o Moapi ma ta‘ita‘i o Amona.

3Ma ‘ua fai atu ‘iā te i latou: ‘Inā ‘outou ta‘u mai ia po o ai lenei nu‘u ‘ua na si‘omia le atu mauga, po o ā o latou ‘a‘ai, pe fia pe tele fo‘i; po o le a fo‘i lo latou malosi, po o le to‘atele o i latou; po o ai le ta‘ita‘i o a latou ‘au.

4Po o le a fo‘i le mea ‘ua na o i latou, i tagata uma lava e nonofo i le itū i sasa‘e, na latou tauemu ‘iā te i tatou, ma ‘ua latou le fa‘afetaia‘i ‘iā i tatou e tali ai i tatou ma le filemū?

O le Fa‘amatalaga a Akiora

5‘Ona tali mai lea o Akiora, i le ta‘ita‘i o le fānauga uma lava a Amona, ‘ua fa‘apea mai: A e finagalo malie e fa‘alogo mai ‘iā te a‘u, lo‘u ali‘i e, ‘ou te ta‘u atu i ou luma le ‘upu moni e uiga i lenei nu‘u ‘ua nofo i le atu mauga, e leai fo‘i se ‘upu pepelo e tasi e alu nai lo‘u gutu.

6O lenei nu‘u o le fānauga i latou a tagata Kaletaia.

7Na mua‘i nonofo i latou i Mesopotamia, ‘ae na mumusu ‘ona mulimuli atu i atua o latou tamā sa i le ‘ele‘ele o Kaletaia.

8O lenei ‘ua latou tu‘ulafoa‘i sauniga a o latou tamā sa to‘atele o latou atua,

9ma ‘ua latou ‘au‘auna tasi i le Atua o le lagi, o ia lea na poloa‘i atu ‘iā te i latou ‘ia latou ō ‘ese i lea mea ma ‘ia latou mau i Karana. A ‘ua vela vela le oge i le lau‘ele‘ele uma, ‘ona latou ō ifo lea i Aikupito, ma ‘ua fa‘ato‘ateleina i latou i lea mea i tausaga e fa selau, ‘ua lē toe mafaitaulia ai la latou ‘au.

10Ma ‘ua mafatia i latou e le tupu o Aikupito, ‘ua na fa‘apologaina i latou i le atiina a‘e o ona ‘a‘ai i le ‘omea ma le ma‘a ‘omea, ‘ona latou ‘alalaga atu ai lea i lo latou Atua, ma ‘ua taia le lau‘ele‘ele ‘atoa o Aikupito i mala ‘ese‘ese.

21O aso uma fo‘i sa latou le agasala ai i luma o lo latou Atua, ‘ua manuia ai lava i latou; auā e ‘ino‘ino lo latou Atua i le amio leaga.

23Mulimuli mai nei, ‘ua latou toe fo‘i atu i le Ali‘i lo latou Atua, ‘ona toe aofa‘iina ai lea i latou a‘i le tāfeaga na tāfea ai i latou, ma ‘ua latou a‘e i nei atumauga uma ma ‘ua latou toe maua Ierusalema, o le mea o i ai lo latou malumalu.

24O lenei, lo‘u ali‘i e, ‘ia e su‘esu‘e po o i ai sa latou agasala i luma o lo latou Atua; ‘ona tatou a‘e lea e tau ma i latou, auā e tu‘uina lava i latou ‘iā te oe e lo latou Atua, e fa‘ato‘ilaloina fo‘i i latou i lalo o lau pule.Iuti 11.9

25Peita‘i, a leai se amio leaga a lenei nu‘u i luma o lo latou Atua, tatou te lē lavā tete‘e atu ‘iā te i latou, auā e puipui lo latou Atua ‘iā te i latou, ‘ae ‘avea i tatou ma tauemuga i nu‘u uma lava.

O le Tete‘e o Tagata

26A ‘ua o‘o ‘ina fa‘auma e Akiora o ana ‘upu ia, ‘ona tigā ai lea o ali‘i sili uma o Holofene, ma ‘ua latou manatu e fasioti ‘iā te ia, o fetautalatala‘i i latou:

27Po o ai lava lenei ‘ina ‘ua fa‘apea mai e mafai ‘ona te‘ena le tupu o Nepukanesa māna ‘au e le fānauga a Isaraelu, o tagata ‘ua leai ni ‘au‘upega, o tagata vaivai ma le lē masani i le tau‘a?

28O lenei, ‘ia tatou a‘e i le atumauga, ‘ina ‘ia iloa ai e Akiora ‘ua na fa‘asesē ‘iā te i tatou; a uma fo‘i ‘ona pu‘eina o latou ali‘i sili, ‘ona tuia fo‘i o ia i le pelu fa‘atasi ma i latou,

29‘ina ‘ia iloa ai e nu‘u uma lava o Nepukanesa o le atua ia o le lau‘ele‘ele ma ‘ua leai se tasi, ‘ua na o ia lava.